МЕҲНАТ ЯРМАРКАСИДА 109 ТА КОРХОНА 595 ТА БЎШ ИШ ЎРИНЛАРИ БИЛАН ИШТИРОК ЭТДИ

Сўнгги йилларда Амударё туман камбағалликни қисқартириш ва бандликка кўмаклашиш бўлими томонидан аҳолининг иш изловчи ва иш билан банд бўлмаган қатламини ижтимоий жиҳатдан қўллаб-қувватлаш мақсадида меҳнат ярмаркалари ўтказиш, унда барча тоифадаги иш изловчи аҳоли вакиллари иштирок этишлари учун шароит яратиш, ўз касби ва лаёқатига мос ишга жойлашишларига кўмаклашиш, ишлаш истагида бўлган фуқароларни касб-ҳунарга ўқитиш орқали уларнинг бандлигини таъминлашга алоҳида эътибор қаратилмоқда.

Жорий йилнинг 12 сентябрь куни Ўзбекистон Маҳаллалар уюшмаси Амударё тумани бўлими биносида бўлиб ўтган меҳнат ярмаркасида ҳам бўш иш ўринлари мавжуд бўлган корхона ва ташкилотларнинг масъул мутахассислари иш изловчиларга зарур маълумот ва тавсияларни тақдим этдилар.

Ярмаркада Амударё туман прокурори, адлия маслаҳатчиси Абат Жумамуратов, Амударё тумани ИИБ ходими Илхом Абутов, маҳаллаларда тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича туман ҳокими ёрдамчилари ҳамда бошқа ҳамкор ташкилотлар, тижорат банклари вакиллари, шунингдек, 102 нафар ишсиз фуқаролар, алимент тўловчилар, ногиронлиги бўлган шахслар ҳамда битирувчи ёшлар қатнашдилар.

Тумандаги 109 та корхона ва ташкилотларда мавжуд 595та бўш иш ўринлари таклиф этилган ярмаркани Амударё тумани Камбағалликни қисқартириш ва бандликка кўмаклашиш бўлими бошлиғи Рашид Салаев очди ва олиб борди.

Ярмаркада 2-сектор раҳбари, Амударё туман прокурори, адлия маслаҳатчиси Абат Жумамуратов сўзга чиқиб, иштирокчиларга ўзларига мақбул келган иш ўринлари билан танишиб, ишга жойлашишларида улар танлаган иш ўринлари ҳақида масъул мутахассислар яқиндан ёрдам беришларини, агар зарур бўлса ҳуқуқий томондан йўл-йўриқлар кўрсатилишини таъкидлади. Шунингдек, туман прокурори ўзига бириктирилган, яъни оталиққа олинган ишсиз ёшларнинг доимий ишга жойлашишлари учун иш берувчилар билан мулоқотда бўлиб, уларнинг бандлигини таъминлаш чоралари кўрилишини, ишлаш истагида бўлган ҳар бир ёш эътибордан четда қолмаслигини алоҳида қайд этди.

Меҳнат ярмаркаси жараёнида иштирокчиларга Камбағалликни қисқартириш ва бандликка кўмаклашиш бўлими ходимлари томонидан бўш иш ўринлари ва уларга аҳолини ишга жойлаштириш, ишсиз аҳолини касб-ҳунарга ўқитиш, хоҳловчиларни хорижий давлатларга ишга жойлаштириш, аҳолининг меҳнат ҳуқуқлари ва меҳнат муҳофазасини таъминлаш масалалари бўйича ҳуқуқий маслаҳат ва маълумотлар олишлари учун барча шароитлар, жумладан, видеороликлар, баннерлар, брошюралар, буклетлар ҳам ташкил қилинди.

Тадбирда ўзини-ўзи банд қилиш орқали доимий даромадга эга бўлиш ниятида бўлган 16 нафар ишсиз хотин-қизларга ҳоким ёрдамчилари тавсиялари асосида субсидияга дазмол, мотоблок ва бошқа уй-рўзғор буюмлари ҳамда аёллар гўзаллик салони учун асбоб-ускуналар, тикув машиналари берилди ҳамда уларнинг бандлиги таъминланди.

Амударё тумани Камбағалликни қисқартириш ва бандликка кўмаклашиш бўлимига қарашли Қипчоқ овулида жойлашган касб-ҳунарга ўқитиш масканида 3 ойлик ўқув курсини битирган 10 нафар ишсиз хотин-қизларга эса тикувчилик йўналиши бўйича сертификатлар топширилди ва уларга ушбу йўналишда субсидия асосида тикув машиналари олишлари мумкинлиги тушунтирилди.

Ярмаркада 35 нафар фуқаро доимий ишга жойлаштирилди, шундан 15 нафари хотин-қизлар, 9 нафари ёшлар, 9 нафари олий таълим муассасаси битирувчиларидир. Шунингдек, 5 нафар фуқаро ҳақ тўланадиган жамоат ишларига жойлаштирилди, улардан 2 нафари ногиронлиги бўлган шахс ҳисобланади. 4 нафар фуқаро эса касб-ҳунарга ўқитишга жалб қилинди.

Ярмарка давомида бўлим ходимлари томонидан бўш иш ўринлари бўйича 23 нафар фуқарога, ишсиз аҳолини касб-ҳунар ва тадбиркорликка ўқитиш бўйича 26 нафар фуқарога, хорижий давлатларда ишга жойлаштириш бўйича 14 нафар фуқарога, меҳнат ҳуқуқлари ва меҳнат муҳофазасини таъминлаш бўйича эса 19 нафар фуқарога ҳуқуқий маслаҳатлар, керакли маълумот ва тавсиялар берилди. Шунингдек, чет давлатларда ишлаш истагини билдирган фуқароларга ZOOM платформаси орқали тўғридан-тўғри иш берувчилар билан суҳбатларда қатнашиш имкониятлари мавжудлиги тўғрисида ҳам зарур тушунча ва маълумотлар тақдим этилди.

Рашид Салаев, Амударё тумани Камбағалликни қисқартириш ва бандликка кўмаклашиш бўлими бошлиғи.