Мактаб ўқувчилари учун йўл хавфсизлиги сабоқлари ўтказилди

Ёш авлоднинг ҳаёти ва саломатлигини асраш, уларни кичик ёшдан бошлаб йўлларда ўзини тўғри тутишга ўргатиш бугунги кунда таълим муассасалари, ички ишлар органлари ва оила зиммасидаги умумий вазифа ҳисобланади. Ўқув йили бошланиши билан кўчаларда болалар оқими кескин ортиши инобатга олинган ҳолда, бу йўналишдаги профилактик ишлар ҳар йили алоҳида режа асосида олиб борилади.

Республикамиз ҳудудида жорий йилнинг 2 сентябрь-22 сентябрь кунлари оралиғида болалар иштирокидаги йўл-транспорт ҳодисаларининг олдини олиш ва уларнинг хавфсизлигини таъминлаш мақсадида “Диққат, болалар!” тадбири ўтказилмоқда. Тадбир айнан ўқув йилининг дастлабки кунларига тўғри келиши бежиз эмас — бу даврда болаларнинг кундалик ҳаракат йўналишлари ўзгаради, мактабга бориш ва уйга қайтиш вақтида кўчаларни кесиб ўтиш ҳолатлари кўпаяди.

Ушбу тадбир доирасида Нукус шаҳридаги 16-сонли мактаб ўқувчилари билан учрашув бўлиб ўтди. Учрашув давомида болаларга йўл ҳаракати қоидалари, йўлларда ҳаракатланиш маданияти, светофор ишоралари ва йўл белгиларининг мазмуни бўйича батафсил тушунтириш ишлари олиб борилди. Мавзу ўқувчиларнинг ёшига мослаб, содда ва тушунарли тарзда баён этилди.

Суҳбат мобайнида ўқувчиларга йўлни кесиб ўтишда пиёдалар ўтиш жойидан фойдаланиш, транспорт воситаси тўлиқ тўхтаганига ишонч ҳосил қилиш ҳамда йўл яқинида ўйин ўйнамаслик каби оддий, аммо ҳаётий аҳамиятга эга талаблар амалий мисоллар ёрдамида кўрсатиб ўтилди. Шунингдек, болаларнинг ўзлари берган саволларга жавоблар қайтарилиб, улар кундалик ҳаётда дуч келадиган вазиятлар биргаликда таҳлил қилинди.

Бундан ташқари, болаларга йўл ҳаракати қоидалари акс эттирилган эслатмалар тарқатилди. Бундай тарқатма материаллар ўқувчиларнинг олган билимларини мустаҳкамлаши, шу билан бирга уларни оила аъзолари билан бирга кўриб чиқиш орқали катталар ўртасида ҳам огоҳликни оширишга хизмат қилиши қайд этилди. Зеро, боланинг йўлдаги хатти-ҳаракати кўп жиҳатдан у кундалик ҳаётда кузатадиган ва уларга намуна бўладиган катталарга ҳам боғлиқ бўлади.

Мактаб ёшидаги болаларда йўл ҳаракати маданиятини шакллантириш бир марталик тадбир билан чекланмайдиган, узлуксиз давом этадиган жараёндир. Ана шундай сабоқлар ўқувчилар онгида хавфсизлик тушунчасини мустаҳкамлаб, уларнинг мактабга ва уйга соғ-саломат етиб боришини таъминлайдиган ишончли восита саналади.