Спорт лигаси туман босқичида техникум ўқувчилари ғолиблари аниқланди
Ёшларнинг бўш вақтини мазмунли ташкил этиш ва уларни жисмоний тарбияга йўналтириш бўйича олиб борилаётган ишлар орасида “Беш муҳим ташаббус” доирасидаги мусобақалар алоҳида ўрин тутади. Бу йўналишдаги мусобақалар касб-ҳунар таълими тизимида таҳсил олаётган ўқувчиларни ҳам тўлиқ қамраб олмоқда.
“Беш ташаббус олимпиадаси” доирасида касб-ҳунар таълими муассасалари ўқувчилари ўртасида ташкил этилган “Спорт лигаси” мусобақалари ҳам ёшларни спортга жалб қилиш ва уларда соғлом турмуш тарзи тамойилларини қарор топтиришда муҳим восита бўлмоқда. Шу йилнинг 6–7 октябрь кунлари Амударё туманида “Спорт лигаси” мусобақаларининг туман босқичи бўлиб ўтиб, унда 1-сонли, 2-сонли ва 3-сонли техникумлар ўқувчилари енгил атлетика, шашка ва стол тенниси бўйича кучларини синаб кўрди.
Мусобақалар икки манзилда — Дўстлик маҳалласи Ваҳум аҳоли пунктидаги стадионда ҳамда Амударё тумани 3-сон техникуми биносида ўтказилди. Мусобақа жадвали икки кунга тақсимланиб, ҳар бир спорт тури бўйича ўғил болалар ва қизлар алоҳида гуруҳларда беллашди, шу тариқа ғолиблар икки тоифада аниқланди.
Енгил атлетика бўйича ўғил болалар ва қизлар ўртасидаги беллашувларда 1-сонли техникум жамоалари иккала тоифада ҳам биринчи ўринни қўлга киритди. Иккинчи ўрин 2-сон техникум вакилларига, учинчи ўрин эса 3-сон техникум ўқувчиларига насиб этди.
Ақл ва сабр синови ҳисобланган шашка мусобақаларида ўғил болалар ўртасида 1-сонли техникум, қизлар ўртасида эса 3-сонли техникум ўқувчилари биринчи ўринни эгаллади. 2-сонли техникум вакиллари ҳам совриндорлар қаторидан жой олди. Шу ўринда айтиш керакки, бу спорт тури ўқувчиларда диққат ва мантиқий фикрлаш кўникмасини мустаҳкамлайди.
Стол тенниси бўйича ўғил болалар ўртасида 3-сонли техникум вакили барча рақибларидан устун келиб, ҳудудий босқичга йўлланма олди. 2-сонли техникумнинг ўғил ва қиз ўқувчилари эса иккинчи ўринни эгаллади. Бу натижа ўқувчиларнинг йил давомидаги машғулотлари самарасини кўрсатди. Шунингдек, туман босқичида ғолиб бўлган ўқувчилар энди Қорақалпоғистон Республикаси ҳудудий босқичида куч синашади.
Бундай беллашувлар ёшларни спортга кенг жалб этиш, уларда соғлом турмуш тарзига интилиш ва жамоавий руҳни шакллантириш имконини бераётгани билан эътиборга сазовордир. Касб-ҳунар таълими даргоҳларида спортнинг ривожи эса малакали кадр тарбиясининг бир қисмига айланиб бормоқда. Майдонда синалган ирода ва интизом кейинчалик касб эгаллаш йўлида ҳам ўз самарасини кўрсатиши табиий.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
