55-СОНЛИ МАКТАБ ЎҚУВЧИ-ЁШЛАРИ ИШТИРОКИДА ҲУҚУҚБУЗАРЛИКЛАР ПРОФИЛАКТИКАСИГА БАҒИШЛАНГАН МАЪРИФИЙ ТАДБИР ЎТКАЗИЛДИ

Ўсиб келаётган ёш авлодни турли хавф-хатарлардан ишончли ҳимоя қилиш, хусусан, ҳуқуқбузарлик ва жиноятчилик каби салбий иллатларга берилиб кетишларининг олдини олиш мақсадида ҳар ҳафтанинг пайшанба кунида маҳаллаларда, умумтаълим мактабларида тизимли равишда ўтказилиб келинаётган ҳуқуқбузарликлар профилактикаси куни тадбирлари ўзининг ижобий натижаларини бермоқда. Мазкур тадбирлар доирасида ҳуқуқни муҳофаза қилиш органлари ходимлари иштирокида амалга оширилаётган “Ҳуқуқий маслаҳат” ва “Сиз қонунни биласизми?” мавзусидаги учрашув ва маърифий суҳбатларга турли ёш тоифасидаги фуқаролар, айниқса, таълим-тарбия муассасаларининг ўқувчи-ёшлари кенг қамраб олинмоқда.

Ана шундай тадбирлардан бири жорий йилнинг 14 ноябрь санасида Амударё туман Мактабгача ва мактаб таълими бўлими тасарруфидаги 55-сонли умумтаълим мактабида ҳам бўлиб ўтди.

“Ҳуқуқбузарлик ва жиноятчилик, шунингдек, йўл-транспорт ҳодисаларининг олдини олиш” мавзусида ўтказилган профилактик тадбирда Миллий гвардиянинг Қорақалпоғистон Республикаси бошқармаси Болалар билан ишлаш бўлимининг Амударё тумани бўйича инспектор-психологи, капитан Нурлан Ўрозбоев, Амударё тумани йўл-патруль хизмати бўлими бошлиғи, лейтенант Анвар Юсупов, Ойбек номли маҳалла ёшлар етакчиси Шоҳруҳ Ўрозимбетов, 55-сонли мактаб директори Даврон Ариков ҳамда мазкур мактабнинг юқори синф ўқувчилари иштирок этдилар.

Тадбирда масъуллар инсоннинг турли хавф-хатарлардан холи яшаши, энг аввало унинг ўзига боғлиқлиги хусусида сўз юритишиб, билиб-билмай бирон бир қалтис ҳаракатни содир этиб, жиноят йўлига кириб қолиши оқибатида нафақат ўзига, балки оиласига ҳам жабр қилиши тўғрисида ҳаётий мисоллар орқали тушунча ва зарур маълумотлар бердилар.

Айниқса, ҳали мактаб ўқувчиси бўлатуриб, вояга етмаган 13-14, ҳатто ундан ҳам кичик ёшдаги болаларнинг отасига ёки ўзидан катта акаларига тегишли бўлган автомашина ва скутерларни катта йўлларда бошқаришлари оқибатида содир этилаётган йўл-транспорт ҳодисалари туфайли ёш-ёш болалар умрбод майиб бўлиб қолаётгани, айрим ҳолатларда бундай йўл-транспорт ҳодисалари инсон ўлимига сабаб бўлаётгани жуда ачинарли ҳолат эканлиги таъкидлаб ўтилди.

Ҳаёт гўзал, яшаш эса жуда мароқли. Унинг ҳар бир дақиқасини эзгу орзулар рўёби учун янада яхши ўқиш, бири-биридан фойдали амаллар билан шуғулланиб, мароқли ўтказиш эса инсонга завқ-шавқ бағишлайди. Бунинг учун, албатта катталар, яъни ота-оналар ўз фарзандларига жуда ёшлигидан йўлларда ҳаракатланиш қоидаларига амал қилишни ўргатиб боришлари, болалар эса бу борада фаоллик кўрсатиб, ота-оналарининг ўгит ва маслаҳатларига, йўл ҳаракати қоидалари хусусидаги устозлари берган таълим ва тавсияларига пухта амал қилишлари талаб этилади. Ўзбошимчалик билан отаси ёки акаси номидаги транспорт воситасини бошқаришга интилиш эса ҳали мактаб ўқувчиси бўлган ўсмирлар учун нафақат одобсизлик ва ахлоқсизлик, балки ҳуқуқбузарлик саналади.

Бундан ташқари, “бир марта сигарета чексам” ёки “бир марта спиртли ичимлик истеъмол қилсам нима бўпти?” қабилида ўзини катталардай ҳис қилувчи ўсмирлар бориб-бориб ашаддий кашанда ва ичкиликка мойил бўлиб қолиши табиий ҳолдир. Жамоат жойларида, халқимизнинг тў-ю томошаларида вояга етмаганлар томонидан содир этилаётган ҳуқуқбузарликлар асосан ана шундай фикрдаги ўсмирлар ҳисобига тўғри келаётгани ҳеч кимга сир эмас.

Шу ва шу каби масалалар бўйича батафсил тўхталган масъуллар тадбир давомида ҳуқуқбузарликлар ва турли кўринишдаги жиноятчиликнинг келиб чиқиш сабаблари ва уларнинг олдини олиш юзасидан ўқувчи-ёшларга зарур маслаҳат ва тавсиялар бердилар.

Шунингдек, ўқувчи-ёшларни қизиқтирган саволларга масъуллар ҳаётий мисоллар орқали жавоблар бериб, уларни огоҳлик ва ҳушёрликка чорладилар.

Робия Йўлдошева.