“АДЛИЯ САЙЛИ” ТАДБИРИ ЎТКАЗИЛДИ

Аҳолининг ҳуқуқий онги ва ҳуқуқий маданиятини ошириш, шунингдек, бу борада давлат органлари ҳамда ташкилотларнинг фаолиятини мувофиқлаштириш, услубий ёрдам бериш Адлия органлари ва муассасаларининг асосий вазифаларидан биридир. Амударё туманининг Дўстлик маҳалласи ҳудудида Адлия вазирлиги ташаббуси билан ўтказилган тадбир ҳам ана шу мақсадга қаратилди.

Жорий йилнинг 22 ноябрь санасида бўлиб ўтган “Адлия сайли” тадбирида Амударё туманидаги давлат органлари ва ташкилотлари, нодавлат нотижорат ташкилотлари “Халқ давлат идораларига эмас, давлат органлари халққа хизмат қилиши керак” шиори остида ҳамжиҳатлик билан иштирок этиб, аҳолини ўз фаолиятлари билан яқиндан таништирдилар.

Айтиш жоизки, аҳолининг ҳуқуқий саводхонлигини ошириш жамият тараққиёти ва давлатимизда қонунийликни таъминлашнинг муҳим жиҳатларидан бири ҳисобланади. Бу жараёнда ҳуқуқшунослар, адлия органлари ходимлари билан жойларда ўтказиладиган учрашувлар алоҳида аҳамият касб этади.

“Адлия сайли” тадбирида фуқароларга нотариуслар ва адвокатлар, давлат хизматлари агентлиги, судлар, тижорат банклари, ҳуқуқ-тартибот идоралари ва бошқа бир қатор ташкилотлар ходимлари томонидан ҳуқуқий ва ахборот хизматлари кўрсатилди.

Тадбир давомида аҳолига янги қонунлар, давлат томонидан тақдим этилаётган имтиёз ва имкониятлар ҳақида кенг тушунтириш ишлари олиб борилди. Бу эса фуқароларнинг ўз ҳуқуқларини англаш ва имкониятлардан самарали фойдаланиш кўникмаларини янада оширишга ёрдам беради.

Тадбир маърифий тарзда ўтказилиб, аҳолига турли масалаларда ҳуқуқий тушунтиришлар, маслаҳатлар берилди. Иштирокчиларга қонунчиликни тушунтириш бўйича адабиётлар ва бошқа ҳуқуқий қўлланмалар, флаер ва буклетлар тарқатилиб, стендлар, ҳуқуқий бурчаклар орқали маълумотлар берилди.

Бундай тадбирларнинг яна бир аҳамиятли томони шундаки, жамиятда қонунга ҳурмат ва қонунийликка амал қилиш маданияти янада ошади. Ҳуқуқий онгли жамият эса барқарор тараққиёт сари дадил қадам ташлайди.

Тадбирда аҳолининг ҳуқуқий саводхонлик даражасини ошириш учун замонавий воситалар имкониятлари ҳам кенг тарғиб қилинди. Жумладан, электрон ҳукумат портали, ягона интерактив давлат хизматлари портали ва бошқа электрон платформалар, ҳуқуқий тарғибот олиб бориладиган ижтимоий тармоқ манзиллари ва сайтлар фуқароларга ҳуқуқий маълумотларни осон ва тез етказишда муҳим восита эканига алоҳида урғу қаратилди.

Бундан ташқари, тадбир давомида викториналар ўтказилиб, иштирокчиларнинг ҳуқуқий билимлари синовдан ўтказилди ва намунали иштирокчиларга эсдалик совғалари топширилди.

Тадбир давомида фуқароларга жами 18та давлат хизматлари кўрсатилди. 5та процессуал ҳужжат намуналари тайёрлаб берилиб, 30 нафарга яқин фуқароларга ҳуқуқий тушунчалар берилди. Тадбир иштирокчиларига 100дан ортиқ тарғибот материаллари тарқатилди.

“Адлия сайли” тадбири орқали фуқаролар билан давлат идоралари ўртасидаги алоқалар янада мустаҳкамланиб, уларнинг давлат идораларига бўлган ишончлари янада ортди.