“Яшил макон” умуммиллий лойиҳаси доирасида кенг кўламли ободонлаштириш ва кўкаламзорлаштириш ишлари ташкил этилмоқда
Бугун атроф-муҳит мусаффолигини таъминлаш ва экологик вазиятни яхшилаш дунёнинг барча давлатларида энг долзарб масалага айлангани ҳеч биримизга сир эмас. Сабаби, ҳаво ва сувнинг ифлосланиши, чўлланиш, глобал исиш табиий мувозанатга ва одамлар соғлиғига зарар етказмоқда.
Юртимизда бу каби салбий ҳолатларнинг олдини олиш ҳамда оқибатларини юмшатиш борасида тизимли ишлар қилинмоқда. Давлатимиз раҳбари ташаббуси билан бундан 3 йил олдин бошланган “Яшил макон” умуммиллий лойиҳаси бугун чинакам халқ ҳаракатига айланди. Ҳар йили баҳор ва кузда дарахт кўчатлари экиш ишлари тизимли равишда ташкил қилинмоқда. Табиатни асраб-авайлаш ва ҳимоя қилиш, кўкаламзорлаштириш ишларини жадаллаштириш ва яшил майдонларни кенгайтириш борасида мазкур лойиҳа муҳим қадам бўлди, десак асло муболаға эмас.
Амударё туманида ҳам “Яшил макон” умуммиллий лойиҳаси доирасида самарали ишлар амалга оширилмоқда. Лойиҳа доирасида туман ҳокими Собир Хўжаметов ташаббуси билан туманнинг Бештом маҳалласи ҳудудида катта майдонда боғ барпо қилинмоқда. Боғ учун мўлжалланган майдон ободонлаштирилиб, ерни кўчат экишга тайёрлаш ишлари сифатли амалга оширилмоқда. Бу жараёнда ҳоким ўринбосарлари, корхона-ташкилотлар раҳбарлари, 49та овул ва маҳаллалар “еттилиги” аъзолари фаол қатнашиб, боғ барпо қилиш учун ажратилган майдонда ободонлаштириш ва кўкаламзорлаштириш ишларига муносиб ҳисса қўшмоқдалар. Жамоатчилик ёрдами билан боғ яратиш учун ажратилган экин майдони, ариқлар ичи бегона ўтлардан тозаланиб, экин ерларни ҳайдаш ишлари сифатли амалга оширилмоқда. Юрт ободлигига ҳисса қўшишдек хайрли ишда барча масъуллар фаоллик кўрсатиб, ташкилотчилик ва ўзаро ҳамжиҳатликда ишларни сифатли бажармоқдалар.
Маълумот тариқасида айтиш жоизки, 26 ноябрь ҳолатига туманда “Яшил макон” умуммиллий лойиҳаси доирасида жами 270 мингга яқин мевали ва манзарали дарахт кўчатлари экилган. Айни кунларда кўчат экиш ишлари тегишли корхона-ташкилотлар, муассасаларга ажратиб берилган ҳудудларда изчиллик билан давом эттирилмоқда. Масъуллар фақат дарахт экибгина қолмай, балки келгусида экилган дарахтларни парвариш қилишга ҳам алоҳида эътибор қаратишни зиммаларига олишган.
“Яшил макон” умуммиллий лойиҳаси доирасида мамлакатимиз шаҳарларини аҳолига қулай, экологик тоза ва яшаш учун барча имкониятлар мавжуд бўлган ҳудудга айлантириш, уларнинг кўкаламзорлаштириш даражасини янада ошириш, шаҳар ва туманларда “жамоат парклари”ни ташкил этиш борасида ҳам амалий ишлар олиб борилмоқда.
Яшаб турган жойимизни озода сақлаб, биздан кейинги авлод ҳам муносиб табиий муҳитда яшашлари учун шароит яратиш зиммамиздаги масъулиятли вазифамиздир. Бугун биз табиатга меҳр ва эътибор берсак, келажак авлод ҳам муносиб экологик шароитда яшайди. Шундай экан, ер ва сув ресурсларини, табиатни, экологик тизимни асраш ҳамда дарахт кўчатларини экиб, боғлар, яшил майдонлар яратишга ҳисса қўшиш ҳар биримизнинг инсоний бурчимизга айланмоғи керак.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
