Халқ депутатлари Амударё туман Кенгашининг 4-сессияси тўғрисида ахборот

2024 йил 27 декабрь куни Амударё тумани ҳокимлигининг мажлислар залида Халқ депутатлари туман Кенгашининг навбатдаги – тўртинчи сессияси бўлиб ўтди.

Сессияда депутатлар, туман ҳокими ўринбосарлари, ҳокимлик масъул ходимлари, бўлимлар, ташкилотлар раҳбарлари ҳамда оммавий ахборот воситалари вакиллари иштирок этди.

Сессияни Кенгаш раисининг ўринбосари Мадамин Казаков очди ҳамда олиб борди. Сессия котиблигига 4-Беруний сайлов округидан депутат Сайёра Жумамуратова сайланди.

Сессия кун тартибидаги дастлабки масала – Ўзбекистон Республикаси Президентининг 2024 йил 23 сентябрдаги “Камбағалликдан – фаровонлик сари” дастурини амалга ошириш бўйича биринчи навбатдаги чора-тадбирлар тўғрисида”ги қарорига асосан Амударё туманида энг оғир маҳалларни танлаб олиш ва уларда амалга ошириладиган ишлар” юзасидан туман ҳокимининг биринчи ўринбосари Фахриддин Юсупов ҳисобот берди.

Ҳисоботда Президент қарори ижросини таъминлаш мақсадида туманда энг оғир аҳволдаги 7 та – Заҳириддин Муҳаммад Бобур, Амир Темур, Қангли, Бўзёп, Куюк кўпир, Оқ олтин овул фуқаролар йиғинлари ҳамда Уйшин маҳалла фуқаролар йиғинлари танлаб олингани қайд этилди. Ушбу маҳаллаларда томорқа ерларини суғоришни яхшилаш ёки уларга электр энергияси барқарор етказиб берилишини таъминлаш, интернет сифатини ошириш, ички йўлларни таъмирлаш ва бошқа инфратузилмани яхшилаш мақсадларини амалга ошириш учун жами 20 млрд 650 млн. сўм маблағ ажратилиши режалаштирилгани хусусида сўз юритилди.

Сессия кун тартибидаги навбатдаги масала юзасидан туман ҳокимлиги бош мутахассиси Жахонгир Ҳайдаров ҳисобот бериб, Ўзбекистон Республикаси Президентининг “Пиллачилик сохасида касаначиликни қўллаб-қувватлаш ҳамда пилла етиштириш учун озуқа базасини янада кенгайтиришнинг қўшимча чора-тадбирлари тўғрисида”ги Фармони ижросини таъминлаш мақсадида туманда амалга оширилаётган ишлар юзасидан ҳисобот берди. Ҳисоботда тумандаги захира ер майдонлари ҳисобидан 12,2 гектар контурларни очиқ электрон танловга қўйиш таклифи киритилиб, бу бўйича Кенгашнинг тегишли қарори қабул қилинди.

Кун тартибидаги навбатдаги – “Хотин-қизлар муаммоларини тизимли равишда аниқлаш ҳамда “Аёллар дафтари”ни юритиш орқали бартараф этиш тўғрисида”ги масала юзасидан туман ҳокими ўринбосари, Оила ва хотин-қизлар бўлими бошлиғи Гўзал Сабурова ҳисобот берди.

Гўзал Сабурова ўз ҳисоботида туманда хотин-қизларнинг ҳаёт ва турмуш шароитидаги муаммоларини аниқлаш, якка тартибда ишлаш орқали уларнинг ҳаёт тарзини яхшилаш ҳамда ижтимоий фаоллигини ошириш, шунингдек, аниқланган муаммоларни комплекс ва манзилли ҳал қилиш борасида амалга оширилган кенг кўламли ишлар хусусида сўз юритди.

Шунингдек, 2025 йил учун Амударё тумани маҳаллий бюджетининг асосий прогноз кўрсаткичлари тўғрисидаги масала ҳам мҳокама қилиниб, ушбу масала юзасидан туман Иқтисодиёт ва молия бўлими бошлиғи Жавлонбек Жумамуродов ҳамда туман Солиқ инспекцияси бошлиғи Жаҳонгир Раҳимовлар ҳисобот берди.

Ҳисоботларда 2025 йил учун Амударё тумани маҳаллий бюджетнинг харажатлари 133 млрд 942 млн 669 минг сўм миқдорида прогноз қилинаётгани, ушбу харажатларни қоплаш учун эса маҳаллий бюджет даромадлари ва юқори бюджетлардан ажратиладиган маблағлар йўналтирилиши қайд қилинди.

Сессия сўнгида Ўзбекистон Республикаси Бош Прокуротурасининг 2024 йил 25 ноябрдаги “Секторларга бириктирилган ҳудудлар тақсимотини қайта кўриб чиқиш” тўғрисидаги хатига асосан тумандаги секторлардаги ишлар самарадорлигини янада ошириш масаласи муҳокама қилинди ҳамда Амударё туманидаги шаҳарча, овул ва маҳаллалар 4та секторга қайта тақсимланди.

Сессия мажлисида кун тартибидаги барча масалалар юзасидан масъулларнинг ҳисоботлари тингланди, атрофлича муҳокама қилинди ва тегишли қарорлар қабул қилинди. Шунинг билан халқ депутатлари Амударё туман Кенгашининг 4-сессиясини ўз ишини якунлади.

Чарос Арслонова, туман ҳокимлигининг Ахборот хизмати раҳбари.