Халқ депутатлари Амударё туман Кенгаши депутатлари билимларини оширишга бағишланган ўқув-семинари ўтказилди
Янги Ўзбекистонда олиб борилаётган ислоҳотлар бугун ўзининг ижобий натижаларини бермоқда. Буни деярли барча соҳалар мисолида кўриш мумкин. Биламизки, халқ билан мулоқот қилиш, халқнинг ичига кириб борган ҳолда инсонларни қийнаб келаётган муаммоларга ечим топиш, аҳолини рози қилиш кечиктириб бўлмас, муҳим масаладир. Бунда давлат ва халқ ўртасида ишончли кўприк бўлиб келаётган депутатларнинг ўрни алоҳида.
Хабарингиз бор, мамлакатимизда 2024 йил 27 октябрь куни Олий Мажлис Қонунчилик палатаси, Қорақалпоғистон Республикаси Жўқорғи Кенгеси, халқ депутатлари вилоят, шаҳар ва туман кенгашларига депутатлар сайлови бўлиб ўтди. Сайловда ҳар бир фуқаро ўзининг ёрқин келажаги йўлида, орзу-умидлари рўёби учун овоз берди. Албатта, янги сайланган халқ вакилида депутатлик фаолияти, унинг ҳуқуқ ва мажбуриятлари, вазифалар нималардан иборат эканлиги бўйича бир қанча саволлар туғилиши ёки таклифлар бўлиши мумкин. Бунда депутатларнинг билимини оширишга қаратилган ўқув семинарлари муҳим аҳамият касб этади.
Қорақалпоғистон Республикаси Жўқорғи Кенгесининг 2025 йил 13 январь кунги хатига асосан, Амударё тумани ҳокимлиги биносининг мажлислар залида халқ депутатлари туман Кенгаши депутатлари билимларини оширишга бағишланган ўқув семинари бўлиб ўтди.
Семинарда Қорақалпоғистон Республикаси Жўқорғи Кенгеси қўмитаси раиси, депутат Шарапат Отемисов, мамлакатимизда фаолият юритаётган 5та сиёсий партияларнинг Қорақалпоғистон Республикаси Кенгашлари масъуллари, шунингдек, халқ депутатлари Амударё туман Кенгаши депутатлари, туман сиёсий партиялари раҳбарлари ва оммавий ахборот воситалари вакиллари иштирок этди.
Семинарни Халқ депутатлари Амударё туман Кенгаши котибияти мудири Мансур Ўразбоев очди ва олиб борди.
Ўқув-семинари давомида депутатларга одоб-ахлоқ қоидалари, уларнинг ҳуқуқ ва мажбуриятлари, ҳуқуқни қўллаш амалиёти, шунингдек, депутат сўрови, сенаторлар ва депутатларнинг “маҳалла еттилиги” вакиллари билан ҳамкорлиги, халқ мурожаатларини инобатга олиш, аҳоли муаммоларига ечим топиш каби кўплаб масалалар юзасидан тушунчалар берилди.
Шунингдек, депутатлар ўзларининг иш режаларини, медиа режаларини тузиши, оммавий ахборот воситалари билан ҳамкорликда фаолият олиб бориши, қабул қилинаётган Давлат дастурларининг ўз округидаги ижросини назорат қилиши ҳамда 2026 йилги Республика ва маҳаллий бюджетларга таклифлар киритиши бўйича бир қатор топшириқлар берилди. Депутатлар семинар давомида масъулларга ўзларини қизиқтирган масалалар бўйича саволлар билан мурожаат қилиб, тегишлича жавоблар олдилар.
Албатта, ўтказилаётган бу каби ўқув семинарлари депутатларнинг ўз фаолиятларида қўл келиб, уларнинг билими ва салоҳиятини янада ошириши билан аҳамиятлидир.
Азиза Мадраҳимова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
