"Уч авлод учрашуви" маънавий-маърифий тадбири ўтказилди

Инсоният тарихи шундан даолат берадики, ҳар бир халқнинг маънавий бойлиги авлодлар ўртасидаги узвий алоқаларда намоён бўлади. Кексаларнинг ҳаётий тажрибаси, ўрта авлоднинг меҳнаткашлиги ва ёшларнинг ташаббускорлиги бирлашганда жамият ривожининг мустаҳкам пойдевори яратилади. Нуронийларнинг донишмандлиги билан ёшлар куч-ғайратининг уйғунлиги миллий қадриятларни асраш ва ривожлантиришнинг гаровидир. Айнан шу ижтимоий ҳамкорлик туфайли анъаналар авлоддан-авлодга ўтиб, бугунги кунгача етиб келган.

Шу сабабли ҳам мамлакатимизда авлодлар ўртасидаги мазкур узвийликни таъминлаш ва янада мустаҳкамлаш мақсадида "Уч авлод учрашуви" каби маънавий-маърифий тадбирлар мунтазам равишда ташкил этилмоқда. Бу учрашувлар нафақат турли авлод вакилларини бир майдонга тўплайди, балки уларнинг ўзаро мулоқотини йўлга қўйиш, тажриба алмашиш ва миллий қадриятларни янада бойитиш учун хизмат қилади. Ана шундай тадбирлардан яна бири 26 сентябрь куни Амударё туманида кенг кўламда ўтказилди.

Республика миқёсида ташкил қилинган бу катта тадбирда турли соҳа раҳбарлари, фидойи меҳнат фахрийлари, туманнинг иқтисодий-ижтимоий тараққиётига салмоқли ҳисса қўшган тажрибали инсонлар, шунингдек, келажагимиз эгалари бўлмиш истеъдодли ёшлар жам бўлишди. Меҳмонлар туман марказидаги "Олтин сарой" тўй-тантаналар мажмуаси олдида тантанали тарзда, карнай-сурнай садолари остида кутиб олинди.

Тадбир доирасида ташкил этилган кўргазмада ҳунармандларимизнинг нафис қўл меҳнати маҳсулотлари, маҳаллий тадбиркорларнинг ишлаб чиқарган турфа хил маҳсулотлари намойиш этилиб, ташриф буюрганларнинг катта қизиқишига сабаб бўлди.

Айтиш жоизки, бугунги глобаллашув даврида миллий урф-одат ва анъаналарни асраб-авайлаш масаласи алоҳида долзарблик касб этмоқда. Технологиялар ривожи, ахборот оқимининг тезлиги, турли маданиятларнинг ўзаро таъсири шароитида ўз миллий қиёфасини йўқотмаслик, аждодлар меросини сақлаб қолиш муҳим вазифага айланган. Айнан шу нуқтаи назардан "Уч авлод учрашуви" каби тадбирлар миллий ўзлигимизни мустаҳкамлашда беқиёс аҳамият касб этади.

Тадбирни Қорақалпоғистон Республикаси Жўқорғи Кенгеси Раиси ўринбосари Ражаббой Нуразизов кириш нутқи билан очиб, уч авлод учрашувининг ижтимоий-маънавий ҳаётимиздаги ўрни, хусусан, ёшларни ватанпарварлик руҳида тарбиялашдаги аҳамияти хусусида алоҳида тўхталиб ўтди. У авлодлар ўртасидаги кўприкни мустаҳкамлаш нафақат ўзлигимизни асраш ва бой ўтмишимизни унутмаслик, балки порлоқ келажагимизни бунёд этиш учун ҳам ниҳоятда зарурлигини таъкидлади.

"Нуроний" жамғармаси Қорақалпоғистон Республикаси бўлими раиси Турсунбой Абдижаббаров, жамғарманинг туман бўлими раиси Бекмон Аллабеганов, фахрий нуроний Баҳром Жуманиёзов, Амударё тумани ҳокими Собир Хўжаметовлар ўз нутқларида ушбу тадбир аждодларнинг жасоратли меҳнати, бугунги авлоднинг бунёдкорлик интилишлари ва келажак ёшлар зиммасидаги масъулият вазифаларни яна бир бора эсга олиш ва таҳлил қилиш имконини беришини таъкидладилар. Бундай учрашувлар тарбиявий ва тарихий жиҳатдан беқиёс аҳамият касб этишини, улар орқали миллий қадриятларимиз янада бойиб, такомиллашиб боришини алоҳида қайд этдилар.

Дарҳақиқат, кексаларнинг ҳаёт мактабидан ўтган бой тажрибалари ёшлар учун ҳақиқий дарслик вазифасини ўтайди. Нуронийларнинг ҳар бир насиҳати, ҳар бир маслаҳати йилларнинг синовидан ўтган ҳикматлардир. Улар ёшларга нафақат касб-ҳунар сирларини ўргатади, балки инсоний фазилатлар — меҳр-оқибат, ҳалоллик, меҳнатсеварлик, ватанпарварлик каби юксак хислатларни сингдиради. Бу эса жамиятимизнинг маънавий салоҳиятини оширишда муҳим омил ҳисобланади.

Тадбир давомида турли соҳаларда фидокорона меҳнат қилаётган ўрта авлод вакиллари, юртимиз равнақига катта ҳисса қўшиб келаётган фахрий нуронийлар ҳамда замонавий билимли, ташаббускор ва фаол ёшларнинг Ватан, эл олдилаги хизматлари эътироф этилди. Масъуллар уларга эсдалик нишонлари ва совғалар топшириб, келгусидаги фаолиятларида омад тиладилар.

Ўзбекистонда сўнгги йилларда ижтимоий-маънавий муҳитни яхшилаш, миллий ўзликни асраб-авайлаш борасида кенг қамровли ислоҳотлар амалга оширилмоқда. Маҳалла институтининг ҳар томонлама қўллаб-қувватланаётгани, "Нуроний" жамғармасининг фаолияти йўлга қўйилгани, ёшлар ташкилотлари самарали фаолияти — буларнинг барчаси аждодларимиздан бизгача етиб келган бой маънавий меросни авлодларга етказишдек улуғвор мақсадларга хизмат қилмоқда. Таълим тизимида миллий қадриятларга эътибор кучайтирилиб, мактаб ва олий ўқув юртларида маънавият дарслари жорий этилди. Оилавий қадриятларни мустаҳкамлаш, никоҳ ва оила муқаддаслигини таъминлаш борасида қонунчилик такомиллаштирилди. Бу каби чора-тадбирлар халқимиз маънавиятини янада юксалтириш, жамиятда мустаҳкам ижтимоий-маънавий муҳитни қарор топтиришда муҳим аҳамият касб этмоқда.

Тадбирнинг бадиий қисми республика ва туман миқёсидаги маданият ва санъат вакилларининг иштирокида қизиқарли ва ҳаяжонли тарзда ўтди. Саҳна майдонида жаранглаган куй-қўшиқлар нафақат бадиий завқ улашди, балки барча иштирокчиларга юртимиздаги тинч ва осойишта ҳаётнинг қадрига етиш, бирлик ва дўстликни улуғлаш ғояларини сингдирди. Санъаткорларнинг Ватан мадҳи, меҳр-оқибат ва ҳамжиҳатлик ҳақида куйлаган қўшиқлари тадбир иштирокчиларида чуқур таассурот қолдирди.

Миллий руҳиятимизни акс эттирган куйлар, дилтортар қўшиқлар ва дилрабо рақслар қалбларга илиқлик бағишлади. Халқ қўшиқлари ва замонавий мусиқа уйғунлиги авлодлар ўртасидаги маънавий кўприкнинг мустаҳкамлигига яна бир асос бўлди. Раққосалар ижросидаги шўх-шодон рақслар томошабинларнинг кўнглини кўтариб, байрам кайфиятини янада юксалтирди. Саҳнадан таралган наволар ва рақсларнинг бетакрор жозибаси йиғилганларга чинакам байрамона руҳ улашди.

Чиндан ҳам, инсон ҳаёти – узвийлик ва давомийлик занжирига қиёсланади. Бу занжирнинг ҳар бир ҳалқаси авлодлар ўртасидаги нозик ришталар билан боғланган. Жамиятнинг пойдеворини ташкил этувчи бу боғлиқлик худди дарёнинг тоғдан бошлаб то қуйи қисмигача давом этадиган бепоён оқимига ўхшайди. Нуронийлар – бу дарёнинг тиниқ булоқлари, ҳаётнинг чексиз ҳикматларини ўзида жамлаган манбадир. Ўрта авлод вакиллари – бу булоқларни кенг дарёга айлантириб, жамият равнақи йўлида фидокорона меҳнат қилаётган шижоатли инсонлар, ёшлар эса ана шу дарёнинг шодон оқими, келажакка талпиниб, янги уфқларни забт этишга интилаётган кучли тўлқиндир. Уч авлоднинг уйғун ҳамкорлиги натижасида эса ирмоқлар, булоқлар дарёларга айланади. Ана шу ҳамкорлик туфайли минг йиллар давомида оққан дарёлар яна ва яна оқаверади.

Замонавий глобаллашув даврида, ахборот оқими ҳаддан ташқари кўп бўлган шароитда, бундай узвий алоқалар миллий ўзликни йўқотмаслик учун энг асосий механизм ҳисобланади. Агар кекса авлоднинг донишмандлиги ва ҳаёт тажрибаси ёшларга ўтмаса, миллий қадриятлар бугунги куннинг ахборот "шовқини"да йўқолиб кетиш хавфи остида қолади. Шу сабабли, бундай алоқалар шунчаки ижтимоий меъёр эмас, балки миллий хавфсизликнинг ажралмас бир қисмидир.

"Уч авлод учрашуви" шунчаки байрам тадбири эмас, балки миллий бирлигимизнинг, маънавий бойлигимизнинг амалдаги ифодаси бўлди. Бу учрашув иштирокчиларни нафақат ўтмишимиздан сабоқ олиш, балки бугунимизни қадрлаш ва эртанги кунимизга ишонч билан қарашга даъват этди. Зеро, авлодлар ўртасидаги узвий алоқа — жамиятимиз барқарорлигининг, миллатимиз бардавомлигининг кафолатидир. Шу боис ҳам бундай тадбирларнинг аҳамияти беқиёс бўлиб, улар келажак авлодлар учун маънавий маёқ вазифасини ўтайди.