Чордара маҳалласи: фаровон ҳаёт сари дадил қадамлар

Амударё тумани Чордара маҳалласида бугун ҳар бир хонадон, ҳар бир оила ўз меҳнати, тиришқоқлиги ва ҳаётга бўлган интилиши натижасида фаровон яшамоқда. Бу ерда “Маҳалла еттилиги” масъулларининг аҳоли фаровонлигини ошириш, бандликни таъминлаш, хотин-қизлар ва ёшлар билан тизимли ишлаш ҳамда ижтимоий ҳимояга муҳтож оилаларни қўллаб-қувватлаш борасидаги амалий саъй-ҳаракатлари самарали натижа бермоқда.

Туман ҳокимлигининг Ахборот хизмати ҳамда “Амударё ТВ” телеканали жамоаси маҳаллада амалга оширилаётган ишлар билан яқиндан танишиб, аҳолининг бугунги турмуш тарзини ўрганди.

3650 нафардан ортиқ аҳоли истиқомат қиладиган мазкур ҳудудда 666 та хонадон таркибида 1013 та оила мавжуд. Маҳалланинг иқтисодий ҳаракатлантирувчи кучи – хизмат кўрсатиш соҳаси, томорқа, паррандачилик ва чорвачиликдир. Кўплаб оилалар айнан шу йўналишларда меҳнат қилиб, барқарор даромад манбаига эга бўлишган.

Хусусан, Рустам Ўразимбетов йиллар давомида паррандачилик ва чорвачилик билан шуғулланишни касбга айлантирган. Бу йил у инкубатор ёрдамида 80 дона жўжани парваришлаб, уларни бозорга чиқариб, мўмай даромад олди. Айни дамда хорижий зотдор қорамолларни парваришлаш ва кўпайтириш ишларини кенгайтириб, оиласи даромадини мустаҳкамламоқда.

Шунингдек, II гуруҳ ногирони Бахтиёр Юсупов ҳам меҳнати билан маҳалла фахрига айланган. Илғор томорқачи 4 сотих томорқасида картошка, сабзи, қовоқ ва бошқа маҳсулотлар етиштириб, эҳтиёждан ортганини ички бозорда сотмоқда. У паррандачилик ва балиқчиликни ҳам йўлга қўйиб, нафақат ўзини, балки оила аъзоларини ҳам банд қилган. “Нафақага қараб эмас, меҳнатга таяниб яшаш керак”, — дейди ҳамюртимиз.

Чордара маҳалласининг энг таъсирли ҳаётий ҳикояларидан бири Нилуфар Хўжаниязовага тегишли десак, асло муболаға бўлмайди. У II гуруҳ ногирони. Аммо унинг матонати, сабр-тоқати ва ҳаётга бўлган ишончи ҳар қандай инсонни қойил қолдиради.

2018 йилда оғир хасталик натижасида у бир қўли ва бир оёғидан айрилди. Кунлари тўшакда ўтар, таянадиган ҳассаси бўлмаса бир қадам ташлаш қийин эди. Аммо Нилуфар опа таслим бўлмади. Тўқувчилик — болаликдаги қизиқиши унга руҳ, куч ва маънан мадад бўлди. Дастлаб кичик машғулот сифатида бошланган бу ҳунар бугун унинг ҳаёт тарзига, даромад манбаига айланиб улгурди.

Бугун Нилуфар Хўжаниязова тайёрлаётган оёқ кийимлар, бош кийимлар, шарфлар, юмшоқ ўйинчоқлар кўплаб харидорлар эътиборига тушган. Энг қувонарлиси — меҳнат унга нафақат даромад, балки соғлик, мустақил ҳаракат, ҳаётга қайтиш имконини берди. У ҳозирда қўлтиқтаёқсиз юради, мустақил ҳаракатланади. Нилуфар опанинг ҳаёти — инсон учун энг катта куч манбаи унинг ўзи эканига ёрқин исбот. “Меҳнат ва ҳунар мени қайта оёққа турғазди, ҳаётга қайтарди”, — дейди у фахр билан.

Маҳалланинг яна бир меҳнаткаш оиласи — Бозорбой Раимовлар хонадони. Улар хорижий зотдор қорамолчилик билан шуғулланиб, сифатли сут маҳсулотлари етиштиришмоқда. Бугун ушбу оиланинг уч авлоди — ўзи, фарзандлари ва неваралари — оилавий чорвачиликдан мустаҳкам даромад топмоқда.

Бозорбой Раимов паррандачиликда ҳам ўзига хос услуб ишлаб чиққан. Яқинда 150 дан ортиқ паррандани ички бозорда сотиб, ҳозир 60 дан ортиқ паррандани парваришламоқда. “Гўшт, сут, тухум маҳсулотларига харидор ҳеч қачон камаймайди”, — дейди у ишонч билан.

Чордара маҳалласида бугун ҳар бир оила ўз меҳнатига яраша ризқ топмоқда. Аҳолининг фаол, ўзига ишонган, меҳнатсевар бўлиши — маҳалла тараққиётининг энг асосий омили. Паррандачилик, чорвачилик, томорқадан унумли фойдаланиш, ҳунармандчиликни ривожлантириш орқали кўплаб оилалар барқарор даромад манбаига эга бўлмоқда. “Маҳалла еттилиги” аъзолари эса кам таъминланган, ижтимоий ҳимояга муҳтож қатламни қўллаб-қувватлаш, ёшлар ва хотин-қизлар бандлигини таъминлаш борасида тизимли ишларни амалга оширмоқдалар. Натижада чордараликлар бугун фаровон ҳаёт сари мустаҳкам ва ишончли қадамлар билан одимламоқда.

Чарос Арслонова, туман ҳокимлигининг Ахборот хизмати раҳбари.