ЭЛУ ЮРТГА МАСЛАҲАТГЎЙ НУРОНИЙ
Катталарни ҳурмат қилиш халқимизнинг қон-қонига сингиб кетган қадриятларидандир.
Ҳақиқатан ҳам, қайси оила ҳаётига назар солсангиз, катталар дастурхон тўрида ўтиришади. Егуликлар ҳам дастурхонга уларнинг раъйига қараб қўйилади. Ёки бирор ишга албатта катталар муҳокамасидан ўтиб, йўл-йўриқ олингач, қўл урилади. Тўй-маъракаларга борсангиз ёки бирон оилада қариндошлар йиғилса-да, энг аввало кекса одамларга ҳурмат-эҳтиром кўрсатилади. Ёши улуғларнинг сўзини ҳеч ким бўлмайди, насиҳатларига қулоқ солади. Ёши улуғ кишилар нафақат ўз фарзандларига, балки, элдошларига ҳам йўл-йўриқ беради.
Менинг бобом, халқ таълими фахрийси Иброҳим Исмоилов ана шундай инсонларнинг бири.
У 1959 йили Бердақ номидаги Қорақалпоқ Давлат Университетининг чет тиллар факультетини тугатган. Ўқитувчи, туман ёшлари ташкилоти раҳбари, халқ таълими ходимлари касаба уюшмаси ташкилоти етакчиси бўлган. Шунингдек, халқ таълими бўлими мудири ўринбосари ва мудири лавозимларида фаолият юритган.
Бобом туманимизда халқ таълими равнақига муносиб ҳисса қўшган инсон, десам асло адашмайман. Шу боисдан-да кўча-кўйга бирга чиққанимизда кўпчилик одамлар "устоз” деб саломлашиб, ҳол-аҳвол сўрашади.
Мен бобомникига меҳмонга боришни орзиқиб кутаман. Чунки бобом, момом билан суҳбатлашиш жуда мароқли. Қолаверса, уларникида жуда кўп ўзбек мумтоз адабиёти, жаҳон адабиёти ва ҳозирги давр адабиётининг нодир намуналари бор. Мен уларни ўқиб, яна авайлаб жойига қўяман. Бу - бобом ўргатган одат.
Бобомнинг китобларини мендан бошқа танишлари, қўшнилари ҳам олиб ўқишади, раҳмат айтиб қайтариб олиб келишади. Бобом эса бундай пайтларда китоб юзасидан суҳбатлашишдан ҳеч зерикмайди.
Мен шундай вақтларда шу ажойиб инсоннинг невараси эканимдан фахрланиб кетаман.
Юртимизда ёшларни яхши йўлга чорлаб турувчи маърифатли ва зукко кексаларимиз ҳамиша омон бўлсин!
Севара АНВАРОВА, Амударё академик лицейи ўқувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
