Арна бўйи маҳалласида асаларичилик мактаби шаклланмоқда

Бугун қишлоқ хўжалигининг энг нозик ва шу билан бирга энг баракали йўналишларидан бири бўлган асаларичилик соҳаси юртимизда тобора ривожланиб бормоқда. Айниқса, бу соҳада тажриба, сабр-тоқат ва табиат билан уйғунлик муҳим ўрин тутади. Амударё тумани Арна бўйи маҳалласида шаклланиб бораётган “асаларичилик мактаби” ана шу мезонларнинг ёрқин намунасидир.

Ушбу мактабнинг асосчиси, Арна бўйи маҳалласида яшовчи тадбиркор — “Фарҳод Қўчқорович асали” деҳқон хўжалиги раҳбари, асаларичилик устаси Фарҳод ака Бекимбетов учун бу соҳа шунчаки касб эмас, балки ота-боболардан мерос бўлиб келаётган ҳаёт йўлидир. Фарҳод ака Бекимбетов қарийб 20 йилдан буён асаларичилик билан мустақил шуғулланиб келмоқда. 2016 йилдан эса ўз фаолиятини деҳқон хўжалиги шаклида йўлга қўйиб, соҳага замонавий ёндашувни олиб кирди.

Бугунги кунда Фарҳод ака оила аъзолари ва шогирдлари билан биргаликда 550 та қути асалари оиласини парваришламоқда. Бу рақамлар ортида нафақат меҳнат, балки катта масъулият, узлуксиз кузатув ва табиат қонунларини чуқур ҳис этиш ётади. Деҳқон хўжалигида асалари парваришидан ташқари, асалари уялари ишлаб чиқариш ҳам йўлга қўйилган бўлиб, бу маҳаллий асаларичилар учун қулайлик яратмоқда.

Шунингдек, “Фарҳод Қўчқорович асали” деҳқон хўжалигида асаларичиликда кенг қўлланиладиган дори-дармон ва парвариш воситалари савдоси ҳам ташкил этилган. Бу нафақат хўжалик фаолиятини кенгайтиради, балки бошқа асаларичилар учун ҳам қулай шароит яратади.

Фарҳод ака асалариларни парваришлашда ҳудуд танлашга алоҳида эътибор беради. У асалари оилаларининг асосий қисмини Қораўзак, Тахтакўпир ва Хўжайли туманларида жойлаштиришни маъқул кўради. Мазкур ҳудудларда кунжут, беда, янтоқ, юлғун ҳамда халқ тилида “бўян” деб аталувчи қизилмия каби нектарга бой ўсимликлар кенг тарқалган. Ана шундай табиий муҳитда етиштирилган асал мўл ҳосилдорлиги, юқори сифати ва шифобахш хусусиятлари билан ажралиб туради.

Ҳар йили Фарҳод Бекимбетов икки маротаба асал ҳосилини йиғиб олади. Ҳар бир қутидан ўртача 10-15 килограммгача сифатли маҳсулот олинаётгани хўжалик фаолиятининг самарадорлигини яққол намоён қилади.

Асаларичилик — бу фақат асал етиштириш билангина чекланиб қоладиган соҳа эмас. У мум, прополис, гулчанг, асалари сути каби юқори қийматли, шифобахш ва экспортбоп маҳсулотларни ўз ичига олган улкан иқтисодий салоҳиятга эга йўналишдир. Шу жиҳатдан қараганда, Арна бўйи маҳалласини асаларичилик бўйича бой тажриба ва анъаналарга эга маскан, деб аташ мумкин.

Маҳаллада шаклланиб бораётган “асаларичилик мактаби” эса нафақат аҳолининг барқарор даромад манбаи, балки ёшлар учун амалий билим ва кўникмаларни эгаллаш, меҳнатга муҳаббат ва табиатга ҳурмат руҳида тарбияланиш мактабига айланмоқда. Бу эса қишлоқ тараққиёти, бандликни таъминлаш ва миллий маҳсулотларимиз салоҳиятини ошириш йўлидаги яна бир муҳим қадамдир. 

Чарос Арслонова, туман ҳокимлигининг Ахборот хизмати раҳбари.