ҚУШНИНГ ҲАМ УЯСИ БУЗИЛМАСИН!

Бугунги кунда мамлакатимизда оилаларда соғлом турмуш тарзини қарор топтиришга, мустаҳкамлигига эришишга, ёш оилаларни намунали оилалар тажрибалари асосида тарбиялашга ва шу туфайли уларда ҳам ўзаро меҳр-оқибат, бир-бирига ишонч, ўзаро бирдамлик, ҳамжиҳатликни қарор топтиришга улкан аҳамият берилаётир. Оилаларда асрлар давомида шаклланган ҳамжиҳатликни таъминлашга, фарзандлар тарбиясига доир билим ва тажрибаларни қунт билан ўрганиш, бу борадаги урф-одатлар, анъаналарнинг, қадриятларнинг аҳамиятини кенг тарғиб этиш ва турмушимиздаги жилосини тўлалигича сақлаб қолиш тобора муҳим аҳамият касб этмоқда. Негаки, кейинги йилларда жамиятимизнинг кичик бўғини бўлмиш оиланинг муқаддас гўша эканлиги, ундаги тинчлик, тотувлик, ҳамжиҳатлик фарзандларнинг баркамол бўлиб вояга етишига бевосита алоқадорлиги айрим ёш оилалар назаридан четда қолмаяпти.

Фарзандларимиз дунёга келиб улғаядиган, барча орзу-умидларимиз бешиги бўлган, барчамиз бағрига талпиниб яшайдиган қутлуғ масканимиз – оилаларимизнинг тинчлиги, ободлиги бутун жамиятимизнинг тинчлиги, ободлигидир.

Бугунги кунда оилалар мустаҳкамлигига эришиш вазифаси шу боисдан ҳам долзарб ва айни пайтда барчамизга дахлдордир.

Ўтган йилда туманимиз бўйича 1787 та никоҳ қайд этилиб, 78 та ажрим, жорий йилнинг ўтган даврида эса 710 та никоҳ, 31 та ажрим қайд этилгани ва ажралишга қарор қилганларнинг кўпчилиги 30 ёшгача бўлган эр-хотинлар эканлиги - ёшларнинг ҳали мустақил ҳаётга тайёр бўлмай туриб оила қураётганларини, шунчаки ҳою-ҳавас учун, дабдабали маросим, сарполар, ўз тенгқурларидан олдинда бўлиш, бошқаларнинг ҳавасини келтириш учун тўй қилаётганликларини кўрсатиб турибди. Улар бу қадамни қўйиш учун ўзларига нечоғлик билим, масъулият ва ҳаётий тажрибалар керак бўлишини ўйлаб ҳам кўрмайдилар ва тақдирнинг илк зарбаларига чора тополмай, ажрашиб кетадилар.

Ёш оилаларнинг мустаҳкамлилигига эришишда ота-оналарнинг сабр-тоқати, бағрикенглиги ва оила қонуниятларини эринмай тушунтиришлари ҳам жуда муҳим. Афсуски, бу борада катталардан ҳам баъзан хатоликлар ўтиб туради.

Бобур номли овулда икки келинлик оиланинг кичиги ўқитувчи, каттаси уй бекаси эди. Қайнона муаллима келинни бозорга эргаштириб бориб, янги кўйлак олиб берган. Катта ке-линнинг менга-чи, - деган саволига қайнона: "Сен уйдасан, у ишлаб, ойлик олаяпти”, - деб жавоб берган. Бундан катта келиннинг қайнонасидан кўнгли қолиб, оила тинчлиги бузилган. Агар шу ўринда қайнона унга овсининг ишга боради, шунинг учун унга кийим зарурроқ эди, сенга ҳам имконият туғилган вақт олармиз, - деб ётиғи билан тушунтирганида, юқоридаги кўнгилсизлик юз бермаган, катта келин икки ой ота уйида яшаб, ўртада норасида гўдаклари дилгир бўлишмасди. Чунки қайнона невараларини жонидан ортиқ суюб, ардоқлаб парвариш қиларканки, улар онасига эргашмай, энаси билан қолган экан. Энди бағридаги боласини қайн уйида ташлаб, икки ой ота уйида яшаган келиннинг аҳволини тасаввур қилиб кўриш қийин эмас.

Оддийгина кўринган шугина бир муаммо ҳам икки оиланинг маълум муддат тинчлигини бузди.

- Ўйлаб кўриб, турмуш ўртоғим, фарзандларим билан кулиб-ўйнаб яшаган ҳар бир куним мингта кўйлакдан афзал эканини тушуниб етдим. Бироқ, сен ишламайсан, деб энамнинг камситганидан дилим қаттиқ оғриди, - дейди катта келин кулимсираб.

Бу низонинг охири бахайр бўлганини, келиннинг иқрорини эшитиб, биз ҳам қувондик. "Беайб парвардигор, қайнона ҳам баъзан номақбул сўз айтиб қўйиши мумкин, кечиримли бўлиб, иккингиз ҳам яхши қилибсизлар”, - дея алқадик қайнона-келинни. Ахир қушнинг ҳам уяси бузилмасин, - деган гап халқимизнинг йиллар синовидан ўтган ибораси эмасми?

Адашганнинг айби йўқ, қайтиб йўлини топса. Қанийди, ҳамма оилаларда ҳам хатоликларнинг охири бахайр бўлаверса, ажрим деган ҳукмга ўрин қолмаса, бегуноҳ норасидалар тирик этим бўлиб қолишмаса...

Ойгул РАЖАБОВА.