ИСТИҚЛОЛ БЕРГАН ФАРОВОН ТУРМУШ

Истиқлол байрамига ҳам саноқли кунлар қолди. Биз мустақиллигимизнинг қадрига етиш учун босиб ўтган тарихан қисқа даврда нималарни бошдан кечирдик, муҳтарам Президентимиз айтганидек, "Биз кеча ким эдигу бугун ким бўлдик” деган саволни ҳар биримиз ўзимизга бериб кўришимиз керак.

Юртимиз истиқлолга эришганидан буён туманимиз ҳудудида жуда кўп ишлар амалга оширилди. Катта хажмда бунёдкорлик ишлари  амалга оширилиб, янги боғчалар, мактаблар, касб-ҳунар коллежлари ва академик лицей, янги бозорлар, дўконлар, тўйхоналар, истироҳат боғлари бунёд этилди. Буларнинг ҳеч бири мустақилликдан олдинги даврда бўлган эмас. Ҳозирги кунда туманимиз ёшлари чет элларда таҳсил олишмоқда. Тадбиркорларимиз эса чет давлатлар билан савдо алоқаларини ўрнатиб, туманимизда етиштирилган маҳсулотларни чет элларга олиб чиқишмоқда.

Юртбошимиз раҳнамолигида мамлакатимизда амалга ошири-лаётган кучли ижтимоий сиёсат натижалари нуронийларга кўрсатилаётган эътибор ва ғамхўрликда ўз ифодасини топмоқда. 2015 йил "Кексаларни эъзозлаш йили” деб эълон қилинди. Шу муносабат билан "Кексаларни эъзозлаш йили”  Давлат Дастурида белгиланган вазифаларга мувофиқ бизнинг фондимиз томонидан ҳам бир қанча ишлар амалга оширилди.

Фахрийларни, хусусан, Иккинчи жаҳон уруши қатнашчилари ва фронт ортида меҳнат қилган юртдошларимизни ижтимоий муҳофазалаш, уларга моддий-маънавий кўмак бериш устувор вазифаларимиздан биридир. Туманимизда 16 нафар уруш қатнашчиси, 319 нафар фронт-орти фахрийлари, якка-ёлғиз фуқароларни ҳар томонлама қўллаб-қувватлаш бўйича тегишли ишлар амалга оширилди. 16 нафар уруш қатнашчисининг барчасига аналогли ва рақамли телевидения сигналларини қабул қиладиган телевизорлар берилди. Шунингдек, 1941-1945 йиллардаги уруш ва меҳнат фронти фахрийлари, шунингдек ёлғиз ва ижтимоий мададга муҳтож кекса кишиларнинг 2015-2017 йилларда уй-жой шароитларини яхшилашнинг ҳудудий дастурларини ишлаб чиқди  ва ижтимоий қўллаб-қувватлашга муҳтож кексаларнинг уйларини ҳашар йўли билан жорий таъмирлаш, зарур ҳолларда эса мукаммал таъмирлашни, шунингдек ҳовлиларини ободонлаштиришни назарда тутган ҳолда уларнинг турар-жой шароитларини яхшилаш бўйича амалий ишлар қилиниши режалаштирилмоқда.

Бундан ташқари, фуқаролар йиғинларида 15 апрелдан 15 май оралиғида "Кексалар дуосини олайлик” шиори остида акция ўтказилди. Акция давомида худуддаги 2000 нафардан зиёд қария отахонлар ва онахонлар савобли ишга қамраб олинди. Худуддаги барча умумтаълим мактаблари ва касб-ҳунар коллежларида кексалар билан 111 та учрашувлар, бадиий кечалар ва концерт дастурлари ташкил этилди. Бунга 1024 нафар кексаларимиз қатнашдилар, хомийлар томонидан 3 млн. сўмлик совғалар берилди.

Ҳозирги кунга келиб туманимиздаги 47 та овул ҳамда маҳалла фуқаролар йиғинларида Мустақиллигимзнинг 24 йиллигига тайёргарлик кўриш ва уни юқори савияда ўтказиш бўйича қизғин иш олиб борилаяпти.  Барча маҳаллаларда байрамга тайёргарлик кўриш ва ҳудудларни ободонлаштириш бўйича гуруҳлар тузилди. Мустақиллик байрами арафасида шаҳримизнинг кўркига кўрк қўшадиган бир қатор бинолар, хусусан "Камолот уйи”, 70 та намунали уйлар, "Гулзор” маҳалла фуқаролар йиғинининг янги биноси ва маҳалла гузари, чекка қишлоқларимизда гўзаллик салонлари, савдо ва маиший ҳизмат кўрсатиш шохобчаларини фойдаланишга топшириш кўзда тутилган.

Шунингдек, ҳозирги кунда  туманимиз ҳудудида 6 та сунъий қопламали чим ётқизилган мини футбол майдончалари мавжуд бўлиб, байрам арафасида яна 2 та шундай майдоннинг фойдаланишга топширилиши кутилмоқда.

Туманимиздаги ҳар бир фуқаро истиқлол байрамини юрагида ўзгача фаҳр ва ифтиҳор билан кутмоқда, десам муболаға қилмаган бўламан. Истиқлолимизнинг 24 йиллик шукуҳи ҳар бир маҳалла, ҳар бир хонадонга кириб бориб, ҳаммага байрам кайфиятини улашмоқда. Мен барча юртдошларимизни истиқлолимизнинг 24 йиллиги билан муборакбод этаман.

Рустам РЎЗМЕТОВ, "Маҳалла” хайрия жамоат фонди туман бўлинмаси раиси, халқ депутатлари туман Кенгаши депутати.

(Фото - http://uza.uz)