ЕРГА ЭГАЛИК ҲИССИ ЮТУҚЛАРИМИЗГА ЗАМИН БЎЛМОҚДА
Мустақиллик йилларида мамлакатимиз қишлоқ хўжалигига жорий этилган ислоҳотлар туфайли деҳқон ернинг ҳақиқий хўжайинига айланди. Бугун у ўзи етиштирган ҳосилнинг даромадидан манфаатдор. Ерга эгалик ҳисси қишлоқ хўжалик экинларининг барчасидан ҳам юқори ҳосил олиб, хўжалиги, оиласи иқтисодини мустаҳкамлашга асос бўлмоқда.
Мен ёшлигимдан пахтачилик ташвишларига гувоҳ бўлиб улғайдим. Кейинчалик бригада бошлиғи бўлиб ишладим. У пайтларда бригадирлар фа-қатгина дала меҳнаткашларига буюрилган топшириқларни бажартирувчи эди, холос. Бугун-чи, бугун? Бугун ўз еримиз ўз ихтиёримизда, фермер нафақат ер учун, балки, ҳудудида истиқомат қилувчи аҳолининг турмуш сифатини яхшилашга, фаровон яшашига ҳам масъул. Янги-янги иш ўринлари яратиб, аҳолининг иш билан таъминланишига ҳам ҳисса қўшмоғи даркор.
Мен 2002 йилда "Искандаров Фарҳод” фермер хўжалигини тузган вақтимдан бери 13 йил ўтган бўлса, ҳозирги кунгача хўжалигимиз туманимиздаги энг иқтисодий бақувват ва мўл ҳосилли хўжаликка айланди. Биргина ўтган йилнинг ўзида 105 гектар пахта майдонларидан 216 тонна ҳосил етиштириш бўйича шартнома тузган бўлсак, амалда 378 тонна пахтани давлатимиз хирмонига тўкдик. Натижада 89 нафар ижарачиларимизнинг ҳам даромади мўл бўлди, хўжалигимизга янги техникалар харид қилиш имкониятига эга бўлдик.
Жорий йилда ҳам хўжалигимизда пилла, буғдой етиштириш режалари ортиғи билан бажарилди. Ҳозир асосий экинимиз – пахта йиғим-теримига киришдик. Қийғос очилиб турган пахталар бу йилги хирмонимиз ҳам мўл бўлишидан дарак бериб турибди. Асосий далаларимизга "Бухоро-8”навини экканмиз. Бу ҳосилдор нав бўлиши билан бирга туманимизда экилаётган бошқа навларга нисбатан ҳафта – ўн кун кечроқ етилади. Бироқ биз август ойида ҳам ғўза тарбиясини давом эттириб, ҳосилга-ҳосил қўшишга эришдик.
Қишлоқ хўжалиги ходимлари учун жуда масъулиятли ва ҳаяжонли дамлар – йиғим-терим мавсуми бошланиб кетди. Йил бошидан бери қишнинг аёзи-ю ёзнинг иссиқ тафтини писанд этмай, далада қилган меҳнатлари маҳсули тарозига қўйиладиган дамларга оз фурсат қолаяпти. Пешона тери, қалб қўри билан асосий бойлигимиз – пахтадан юқори ҳосил етиштиришдек улуғ мақсадлар йўлида меҳнат қилган барча пахтакорларнинг меҳнатлари самарали, юзлари ёруғ бўлишини тилайман. Бизга ана шундай имкониятларни берган мустақиллигимизнинг 24 йиллиги қутлуғ бўлсин, дейман.
Фарҳод ИСКАНДАРОВ, фермер.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
