НАМУНАЛИ ОИЛА – МАҲАЛЛА КЎРКИ

Оила тинч, мустаҳкам бўлса, бундай оиладан файз-у, барака аримайди. Бундай оилалар кўп экан, Ватанимиз кундан-кун гуллаб яшнайверади. Мана шундай намунали оилалар бизнинг "Қизилчоли” маҳалламизда жуда кўп. Шулардан бири, Қўчқоров Қувватбой ака ва Йўлдошева Гулпошша опалар хонадони. Уларнинг гўзал ҳаёти кекса онаси – 83  ёшли Қўчқорова Пардагул момонинг ҳаёт йўлида бераётган ўгит-у маслаҳатлари, оқ фотиҳасининг, фарзандига берган яхши тарбиясининг бугунги кундаги меваси, десак ҳеч муболаға эмас. Қувватбой ака ва Гулпошша опа тинч-тотув, аҳил-иноқликда, бахтли яшаб 5 фарзанд – 4 қиз, бир ўғилни вояга етказмоқда. Фарзандлари одобли, зеҳнли, чаққон, қизлари тикувчилик билан ҳам шуғулланади. Кенжа қизи бу йил мактабни тугатиб шифокорлик касбини танламоқчи, ўғли эса 9-сонли мактабнинг 7-синфида аъло баҳоларга ўқийди. Бўш пайтларида оилавий ўз томорқаларида меҳнат қиладилар, мева-ю сабзавотларни ўзлари етиштирадилар,  фарзандлари ҳар ишда ота-оналарига кўмакчи. Адабий муҳитда тарбия олган қизлар адабиёт, шеърият шайдоси, ҳатто шеърлар ҳам машқ  қилиб турар экан.

Хонадонларига кирсанг, нур ёғилиб тургандай, озода, саранжом-у саришта, ободон. Бу хонадон маҳалламиз томонидан 2013 йилда энг намунали оила, деб эътироф этилди.

Қувватбой ака "Қизилчоли” маҳалласида янгидан қурилган ҚВПда қоровул бўлиб ишлайди, Гулпошша опа эса шу ердаги 9-сонли мактабда она тили ва адабиёт фанидан дарс бериб, илм-у маърифат нурларини таратади. Мана шундай фидокорона, ҳалол меҳнатлари орқасидан овул-элда мартабаси улуғ, обрўси баланд. Ҳа, бундай ҳавас қилса арзийдиган оилалар борасида сўз кетганда, сўзларим адо бўлмай кетади. Бу каби фариштали хонадонлар бизнинг "Қизилчоли” маҳалламизда жуда кўп. Маҳалламиз обод, юртимиз тинч, кўнгиллар хотиржам, ҳар биримиз шундай оилалардан намуна олиб, тинчликнинг, тўкинликнинг қадрига етайлик.

Юлдуз Юсупова.

(Фото - http://old.qashqadaryogz.uz)