ҲАМКОРЛИК – ЯХШИ НАТИЖАЛАР МЕЗОНИ

Туманимиздаги 55-сонли умумтаълим мактабида оила – маҳалла – мактаб ҳамкорлигида давра суҳбати бўлиб ўтди.

Йиғилишга Ойбек номли маҳалла фуқаролар йиғини раиси Ўразимбат ака Саъдуллаев, диний маърифат ва маънавий-ахлоқий тарбия масалалари бўйича маслаҳатчи Моможон опа Раҳимова, мактабнинг маънавият ва маърифат ишлари бўйича директор ўринбосари Нурбек Ўрозбоев, мактаб руҳшуноси Гулхан Ўразметова, бошланғич хотин-қизлар ташкилоти раиси Омонгул Адилбоева ҳамда ота-оналар қатнашдилар.

Йиғилишда ёшлар, айниқса ўсмирлар ўртасида содир этилаётган жиноятчиликнинг олдини олиш  ҳамда ўқувчиларни турли ёт ғоялар таъсиридан асраш, интернет тармоғи ва қўл телефонидан фойдаланиш маданияти хусусида Ойбек номли маҳалла фуқаролар йиғини раиси Ўрозимбат ака Саъдуллаев маъруза қилди ва ота-оналарни ҳушёрликка, огоҳликка, фарзанд тарбиясига масъулият билан қарашга даъват этди.

Моможон Раҳимова эса 2015 йилда туманимизда ўсмирлар ўртасида содир этилаётган жиноятлар ва ҳуқуқбузарликлар ҳақида гапириб, ота-оналарни фарзандлари тарбиясига эътиборли бўлишга чақирди.

Мактаб руҳшуноси Гулхан Ўразметова ўқувчиларни 12 йиллик таълимга жалб этиш, туманимиздаги академик лицей ва коллежлардаги имкониятлар ҳамда 12 йиллик мажбурий таълимнинг  ҳуқуқий асослари тўғрисида кенг тушунчалар берди.

Бошланғич хотин-қизлар ташкилоти раиси О.Адилбоева мактаб ички тартиб-қоидалари, ўқувчи интизоми, давомати ва тозалик ҳақида гапириб, огоҳлик – давр талаби эканлигини, мактаб – оила – маҳалла ҳамкорлигида қилинадиган ишларга масъулият билан ёндашиш зарурлигини таъкидлади.

Ўқувчиларни тўгаракларга жалб этиш ва уларнинг натижалари ҳақида Нурбек Ўрозбоев ота-оналарга маълумот берди. Йиғилишда иштирок этган ота-оналар ўз фарзандлари тақдирига, келажагига янада масъулият билан ёндашиш зарурлигини яна бир бор англашди.

Зуҳра АҲМЕДОВА.

(Фото - http://huquqburch.uz)