“ХАЛИФАЛИК” МИ Ё ХАРОБАЛИК?

Ота-боболаримизнинг муқаддас эътиқоди бўлган ислом дини кишиларни ҳамиша яхшиликка, эзгуликка, ўзаро тинч-тотув яшашга чақириб келган. Лекин мевали дарахтга тош отилади, дейилганидек, вақти-вақти билан дин душманлари тарафидан турли бўҳтонлар, иғволар тўқилиб, дин номидан қабиҳ ишлар қилина бошлаган. Натижада турли фитналар урчиб, катта-катта жангларга ҳам айланган. Тарих бунга гувоҳ. Ҳозирги кунда ҳам шундай фитначиларнинг давомчилари бўлган ғараз ниятли кимсалар дин номидан қандайдир "халифалик”ни барпо этишдек пуч ғоялар билан одамларни чалғитмоқда. Ҳатто шу мақсад йўлида тинч халқлар бошига кулфатлар ёғдириб, эл-у элатларни харобозорга айлантирмоқда. Ўзларича "Ислом давлати”, "Халифаликни тиклаймиз” деб жон-жаҳди билан жар солаётган бу фирқани биз "ислом душмани”, "жоҳилият давлати” десак ҳам уларга ўз баҳосини тўлиқ бермаган бўламиз. Чунки буларнинг қилаётган ишларини агар жоҳилият аҳли кўрганида: "улар биздан эмас”, дейишлари турган гап. Бу фирқани биз "шайтоний давлати” ёки" "шайтон аскарлари”, десак ҳақиқатга яқинроқ бўлади. Сабаби, шайтон алайҳи лаъна исломга қарши ҳар қандай ишни ҳам қилади. Буни шайтоннинг ўзи Қуръони Каримнинг Аъроф сурасида: "... албатта, мен уларни тўғри йўлингда тўсиб ўтираман. Сўнгра, уларнинг олдиларидан, орқаларидан, ўнг томонларидан ва чап томонларидан келаман. Ва уларнинг кўпларини шукр қилувчи ҳолда топмассан”, - деган (16-17 оятлар).

Ўша оқим аъзоларининг қилаётган ишлари ҳам шундай. Улар билан биз эътиқод қиладиган муқаддас динимиз ўртасида осмон билан ерча фарқ бор. Чунки муқаддас динимиз қандай амалга буюрган бўлса, улар унинг тескарисини қилади, муқаддас динимиз қандай амалдан қайтарган бўлса, улар шу амалларни қилади.

Бундай фирқаларни йўқ қилишнинг энг тўғри йўли бу – маърифат йўлидир. Чунки маърифатли киши ҳеч қачон нотўғри йўлга юрмайди.

Пайғамбар (с.а.в.) айтган ҳадисларнинг биридаги: "Кимки динни илмсиз ўрганса, ўзи ҳам адашади, бировларни ҳам адаштиради”, деган сўзларининг бугунги кунимиз учун ҳам аҳамияти беқиёсдир.

Ислом – бу маърифатпарварлик, инсонпарварлик динидир. У олий ахлоқ, амали солиҳ ва илм-у ҳикматни эгаллашга буюради.

Бинобарин, қалбида имони бор ҳар бир жамиятимиз фуқароси бундай бузғунчи оқимлардан динимизни ҳимоя қилиши керак. Инсонларни ўзаро меҳр-оқибат ва тотувликка чорловчи асл динимиз таълимотларидан ғаразли мақсадлари йўлида фойдаланишларига асло қараб турмаслик лозим. Уларнинг пуч ғояларига эргашишга ҳеч бир асос йўқ.

Исмоил АЛЛАЯРОВ,

Муҳаммад ибн Аҳмад ал-Беруний номидаги ўрта махсус ислом билим юрти талабаси.

(Фото - https://kun.uz)