ҚИЗИЛЧОЛИДА БАЙРАМ
Мустақиллигимизнинг 25 йиллиги муносабати билан "Маҳалла” хайрия жамоат фонди туман бўлинмаси тасдиқлаган режага асосан яқинда "Қизилчоли” маҳалласида "Гўзал ва бетакроримсан, муқаддас Ватаним, жоним сенга фидо, Ўзбекистоним!” деган ғояни ўзида ифода этувчи байрам тадбири бўлиб ўтди. Тадбир мустақиллигимизнинг 25 йиллигига байрам табриклари билан бошланди. Маҳалла имоми Жумамурод ака Абдуллаев, Ҳожибой ака Ўтагеновлар барчани байрам билан қутлаб, ҳозирги ҳаётимизга шукроналар айтди.
9-сонли мактабнинг Каримбой Отажонов раҳбарлигидаги бадиий ҳаваскорлари ижро этган она Ватанимизни, мустақиллигимизни ва бахтиёр замонамизни мадҳ этувчи куй-қўшиқлар тадбир қатнашчиларини хушнуд этди.
Бизнинг халқимиз борини эл билан бирга баҳам кўрадиган сахий ва очиқкўнгил халқ. Бунинг исботини ҳаётимизнинг ҳар бир лаҳзасида кўришимиз мумкин.
Мазкур тадбирда ҳам маҳалламизнинг тадбиркорлари томонидан эҳтиёжманд оилаларга байрам совғалари улашилди.
2016 йилнинг "Соғлом она ва бола” йили дея номланиши муносабати билан барпо қилинаётган маҳалладаги спорт майдончасининг очилиш маросими спорт мусобақаларининг бошланишига асос бўлди. Болалар спорт майдончаси оломон билан гавжум. Бир томонда мини футбол мусобақаси ўтаётган бўлса, жажжи болакайлар беланчак учаётганига хурсанд ва шодон. Турникда тортиниш мусобақаси эса янаям ҳаяжонли бўлди.
Тадбир охирида мусобақалар ғолиблари "Қизилчоли” МФЙ томонидан совға-саломлар билан тақдирландилар. Тадбирда "Маҳалла” хайрия фонди туман бўлинмаси масъул ходими Отабек Ибрагимов қатнашиб, маҳалла аҳлини мустақиллигимизнинг 25 йиллиги билан табриклади. Тадбир то кун ботгунча давом этди. Фурсатдан фойдаланиб, маҳалламизнинг фидойи инсонларига, болалар спорт майдончаси қурилишида фаол иштирок этганлиги учун чуқур миннатдорчилик билдираман. Айниқса Ботир Насруллаев, Азим Отажонов, 9-сонли мактаб директори Хайрулла Ўтаганов, ўқитувчиларимиздан Махсуд ака Бозорбоев, Шариф ака Юсупов, Мурод Абдуллаев, Анвар Ибодуллаев каби инсонларнинг жонкуярлиги таҳсинга сазовор.
Собир ҚУЛИМБЕТОВ,
"Қизилчоли” МФЙ раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
