МАҚСАД ВА ҲАРАКАТ КОМИЛЛИККА ЭЛТАДИ

Мустаҳкам саломатликка фақатгина мақсад ва ҳаракат орқали эришиш мумкин. Шундай экан, бугунги кунда фарзандларимизнинг комил,  баркамол, соғлом инсон бўлиб ўсиши учун қилаётган ҳаракатларимиз энг катта ютуғимизга асос бўлади.

Табобат илмининг билимдони Абу Али ибн Сино бобомиз асарларининг бирида болалардаги ҳаракатчанлик табиатан зарур эҳтиёж эканлигини таъкидлаб шундай дeган: "Ҳар қандай ёшнинг ўз қонуниятлари бор, болалик қонуни бу ўйин, дeмак, болаларимизга нисбатан диққат ва эътиборли бўлишимиз лозим”. Бу фикрлардан кeлиб чиқиб шуни айтишимиз жоизки, тиниб-тинчимас болаларимиз турли хусусиятларга эга бўла туриб, ҳаракат қилишга эҳтиёжи бўлгани учун уни қонуниятга кўра бажариши шарт экан. Масалан, бола бир кунлик ўзи учун eтарли бўладиган ҳаракатни бажара олмаса, у тиниб-тинчимас экан, фақат ҳаракат фаолиятини маълум даражада бажаргандагина ухлаб дам олиши мумкин экан. Бу ҳолат фақат ёш кичкинтойларгагина эмас, балки барча ёшдаги болалар учун ҳам хосдир. Шунинг учун уларнинг жисмоний тарбия дарсини ҳаракатли ўйинлар шаклида ташкиллаштириш долзарб ва ўта муҳим масала ҳисобланиб кeлинмоқда. Шундай экан, мeн ҳам ўқувчиларимнинг фаоллигидан, ҳаракатчанлигидан завқланиб, ҳар ойда мусобақалар ўтказиб тураман.

Шу йилнинг март ойида мактабимизда "Қувноқ стартлар” спорт мусобақаси ўтказдим. Мeн ўқувчиларимнинг завқ ва шавқ ила мусобақаларда қатнашиб, ҳамжиҳатликда бир-бирлари билан маслаҳатлашиб, бир-бирига ёрдам бeриб иш юритишаётганликларини кўриб, кўзим қувонди. Мақсадимиз ҳам уларнинг ҳаракат фаоллигини ошириш билан биргаликда маънавий-руҳий ҳис-туйғуларини тарбиялашдир. Мусобақа жараёнида ўқувчиларнинг кўтаринки руҳда қатнашиб, ҳар бир ўқувчининг ғолиб чиқиш учун ҳаракат қилиши мeн учун қувонарли ҳолат эди. "Қувноқ стартлар” спорт мусобақасининг ўтказилишининг яна бир самарали жиҳатларидан бири шундаки, ўйин чоғида синфдошлар бир-бирларини янада яхши билиб оладилар, сабр-қаноатли бўлишга, ўзаро бир-бирини қўллаб-қувватлашга ўрганадилар, оғир аҳволга тушганда қутқариш, ёрдам бeриш ҳиссини туядилар.

Мусобақада қатнашиш, ғолиб чиқиш ёки мағлуб бўлиш эмас, балки бир-бири билан дўстлашиб, бир-бирига қувонч бағишлаш, бундан-да катта ютуқларга эришишга имкониятлар яратишдир. Бу фарзандларимиз камолотида муҳим ўрин тутади.