ЭРТА ТУРМУШ - НОТЎҒРИ ТАНЛОВ
Юртимизда болаларнинг ҳар томонлама етук бўлиб камолга етишлари учун барча шароитлар муҳайё қилинган. Лекин айрим ҳолларда оила қуриш масалаларида кўнгилсизликлар келиб чиқмоқда. Бунинг сабаби турмуш қурувчиларнинг никоҳнинг асл моҳиятини англаб етмаслигидир.
Аллоҳ таоло, аввало, инсон ҳаёти иффат ва поклик асосида, муҳаббат ва севги, ўзаро ишонч-ҳурмат асосида бўлиши учун никоҳга амр этган.
Айрим ота-оналар ўз қизларини соғлиги ва эртасини ўйламай, уларга бирор бир касб-ҳунар ўргатмай, келажак ҳаётга тайёрламай туриб турмушга узатишга интилишмоқда. Натижада эрта турмуш қуришнинг ҳозирги кунда жуда муаммоли ҳолатлари юзага келмоқда. Хусусан, жисмоний ва ақлий камчиликлар, шу билан бирга маслаҳатсиз ишлар натижасида шошилиб қурилган оилаларда ажралишлар кўплаб учрамоқда.
Мутахассисларнинг хулосасига кўра, эрта турмуш қуриш, хусусан, эрта она бўлиш бир қатор муаммоларни келтириб чиқаради. Чунки 16-17 ёш ҳали ўсмирлик даври саналиб, бу вақтда қизлар руҳан ҳамда жисмонан тўлиқ ривожланмаганлиги туфайли организм ҳомиладорлик, туғруқ ва соғлом фарзандни дунёга келтиришга тўлалигича етилмаган бўлади. Натижада, эрта фарзанд кўриш ёш она ва ундан туғилажак бола саломатлигига ҳам маълум даражада хавф туғдиради. Шунинг учун қизларимизни 21-22 ёшдан кейин турмушга беришни, йигитларга 22-25 ёшларда уйланишни тавсия қилишмоқда.
Маълумки, оила бошлиғи бўладиган йигит илмли ёки ҳунарли бўлсагина, оила нафақасини эплай олсагина рўзғор кам-кўстини таъминлайди, хонадонида етишмовчиликлар бўлмай, ширин ҳаёт давом этади.
Аксар ҳолларда пул топиш қийинчиликларини англаб етмаган йигит турмуш ўртоғининг ҳам қадрига етмайди, оталик мажбуриятларини ҳис қила олмайди. Бундай оилаларда вояга етган болалардан жамият қандай наф кўради?!
Ҳали вояга етмаган ва оилага тайёр бўлмаган қизлардан ҳам келажакда шундай ҳолларни кузатмасликка ким кафолат бера олади?! Улар ҳаёт синовлари олдида ожиз бўлиб қолишади, рўзғор камчиликлари эса кун келиб, ўртага совуқчилик тушишига сабаб бўлади. Натижада ёшгина келин асабий, жиззаки бўлиб қолади. Асабнинг бузилиши кўплаб касалликларни келтириб чиқариши табиий.
Шундай экан, фарзандларимизни эрта турмуш қуришдан асрашимиз, уларни келажак ҳаётга тайёрлашимиз, оиладаги муносабатларни яхшилаб тушунтиришимиз лозим бўлади. Шунда фарзандларимизнинг никоҳи янада мустаҳкам ва узоқ давом этади.
Ўктам ҚУРБОНИЁЗОВ,
"Нўғой эшон" жомеъ масжиди имом-хатиби.
(Фото - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
