ОИЛА ҚУРИШ БОШҚА, ОИЛА БЕКАСИ БЎЛИШ БОШҚА

Яқинда бозорда коллежда бирга ўқиган энг яқин дугонам Шаҳнозани кўриб қолдим. Шўх-шаддод Шаҳнозадан асар ҳам йўқ, сўлиб қолган, ғамгин, ҳали турмушга чиққанига бир-икки ой бўлмай, қайнонаси ҳайдаб юборибди. "Нимага?”, - деб сўрасам, дугонам:

- Қайнонам, қўлингдан ҳеч иш келмайди, турмушга чиқишдан олдин бирон-бир ҳунарни пухта эгаллаб, рўзғор тутишни, нон ёпишни ўргансанг бўлмайдими, бор, онангникига бориб, иш ўрганиб кел,  деди, – дейди йиғлаб.

- Ахир ўзинг коллежда тикувчилик йўналиши бўйича таҳсил олган бўлсанг, замонавий тикув машиналарида кийим тикишни, бичишни яхши ўргатишган эди-ку, устозларимиз. Биз билан бирга ўқиган қизлар, ҳозир  кўрсанг, ҳавасинг келади, - дедим унга.

- Қайнонам ҳам нуқул шундай гапларни гапиради, - деди дугонам ерга қараганча. – Аслида мен қўшнимизнинг чевар қизи Дилафрўзни келин қилмоқчи эдим. Ўғлим сендан бошқаси керак эмас, дегани учун кўнглига қараб, сени келин қилганман. Дилафрўзнинг ота-онаси қизимиз ҳали ёш, турмушга бермаймиз, ишлаб, ҳаётни ўргансин, деб туриб олишгач, сени олиб бердим, - дея юзимга ургандай қилиб гапиради. Номи чиққан чевар бўлса ҳам Дилафрўз олий ўқув юртида ўқимоқчи экан. Мен эса турмушга чиқсам, ҳамма нарсани ўрганиб оламан, деб жуда хато ўйлабман.

Менинг эса дугонамга ачинишдан бошқа ҳеч нарса қўлимдан келмади. Коллежда устозлар таълимига эътиборсиз ўқиган, тикувчилик сирларини пухта ўрганишни ўйламаган дугонам коллежни битириб-битирмай турмушга чиққани учун афсусда.

- Энди онамникида яшаб, ҳунар, рўзғор тутишни ўрганаяпман, - дейди у пушаймони ичига сиғмай.

Ана шунақа, азиз тенгдошлар. Коллежда номигагина ўқиб, турмушга ошиққан билан биз тажрибали ёки катта бўлиб қолмаймиз. Ҳаёт эса ўта зийраклик, эпчиллик ва билимдонликни, қизлардан эса чеварликни талаб этади. Оила қуриш бошқа, оиланинг уддабурон бекаси бўлиш бошқа. Биз қизлар ана шундай уддабурон бека бўлиш учун интилишимиз керак.

Чинорой ЎРИНБОЕВА.

(Фото - http://uza.uz)