Электрон ҳукумат – халқ билан энг яқин мулоқот йўли
Мамлакатимизда ахборотлаштириш тизимини шакллантириш, ахборот технологияларидан самарали фойдаланиш, ҳукумат билан аҳолининг ўзаро муносабатларини янада мустаҳкамлаш мақсадида муҳтарам Биринчи Президентимиз томонидан 2013 йил 27 июнда «Ўзбекистон Республикасининг Миллий ахборот-коммуникация тизимини янада ривожлантириш чора-тадбирлари тўғрисида»ги ПҚ-1989-сонли қарор қабул қилинган эди.
Шунингдек, 2015 йил 9 декабрь куни «Электрон ҳукумат тўғрисида»ги Ўзбекистон Республикаси Қонунининг қабул қилиниши ахборотлаштириш соҳасида катта ўзгаришларнинг янги босқичини бошлаб берди.
Қонунда ариза берувчиларнинг интерактив хизматлардан тенг равишда фойдаланиши, аҳоли ва тадбиркорларга «бир дарча» принципи бўйича онлайн хизматлар кўрсатиш, давлат органларининг ҳужжатларини бирхиллаштириш, электрон ҳукуматнинг ягона идентификаторларидан фойдаланиш, электрон давлат хизматлари кўрсатиш тартибини мунтазам такомиллаштириб бориш, ахборот хавфсизлигини таъминлаш «электрон ҳукумат» тизимининг асосий принциплари сифатида мустаҳкамланган.
Эндиликда фуқаро давлат идорасида бирор ишни битириш мақсадида бошқа бир идоранинг ҳужжатини олиш учун у ерга бормайди. Қарабсизки, ҳам маблағ, ҳам вақт тежалади.
Шунингдек, электрон хизматлар давлат органларининг расмий веб-сайтлари орқали ҳам кўрсатилиши мумкин. Давлат органлари электрон давлат хизматлари кўрсатиш тартиби тўғрисидаги ахборотни ўз расмий веб-сайтларига жойлаштиришлари зарур.
2015 йилнинг 28 сентябрида Ўзбекистон Республикаси Президентининг «Тадбиркорлик субъектларига «ягона дарча» тамойили бўйича давлат хизматлари кўрсатиш тартибини янада такомиллаштириш чора-тадбирлари тўғрисида»ги Қарорининг қабул қилиниши қайд этилган қатор масалаларни ҳал этишда муҳим аҳамият касб этди.
Ушбу қарор билан республикамизнинг барча ҳудудларида 2016 йил 1 январдан бошлаб, тадбиркорлик субъектларига «Ягона дарча» тамойили бўйича давлат хизматларини кўрсатиш марказлари ишлай бошлади.
«Ягона дарча» механизмининг жорий этилиши билан ахборот ва ҳужжатларни ягона ўтказиш каналларидан фойдаланган ҳолда фақат бир марта тақдим этиш имкониятлари пайдо бўлди.
Бу эса ўз навбатида, барча томонлар учун сезиларли ютуқ бўлган ахборотни олиш ва унга ишлов беришни яхшилайди, давлат органлари ва тадбиркорлар орасида бўладиган ахборот оқимларини тезлаштиради ва соддалаштиради. Бундай механизмларни қўллаш давлат органлари билан бир қаторда тадбиркорларни назорат қилиш самарадорлиги ошишига, сарф-харажатларнинг қисқаришига ва оқибатда ресурслардан тўла-тўкис фойдаланишга олиб келади.
Бир сўз билан айтганда, ушбу имкониятлар аҳоли, хусусан тадбиркорлар учун катта қулайликлар яратиши билан янада аҳамиятлидир.
Ж.ДАУЛЕТОВА,
Алоқа,
ахборотлаштириш ва телекоммуникация технологиялари соҳасида назорат бўйича
давлат инспекцияси Қорақалпоғистон Республикаси ҳудудий бўлинмаси инспектори.
(Фото - http://upp.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
