“ЎЗБЕГИМ ЎҒЛОНЛАРИ ВА ҚИЗЛАРИ” БЕЛЛАШУВИ ЎТКАЗИЛДИ

Апрель ойи мамлакатимиз умумтаълим мактабларида эстетика фанлар ойлиги деб белгилангани муносабати билан ўқувчиларнинг эстетик дидини юксалтиришга, уларда юксак одоб-ахлоқ қоидалари шаклланишига, иқтидорларини ривожлантиришга ва комил инсон сифатида улкан ҳаётга қадам қўйишига кўмаклашувчи турли тадбирлар, беллашувлар, давра суҳбатлари ўтказилмоқда.

Жорий йилнинг 17 апрелида 11-сонли умумтаълим мактабида бўлиб ўтган “Ўзбегим ўғлонлари ва қизлари” танлови ҳам ўқувчи ёшларнинг мустақил ҳаётга қай даражада тайёрлигини синовдан ўтказди.

Беллашувга мактабнинг 3 та 9-синфлари, 2 та 10-синфлари ва 1 та 11-синфидан саралаб олинган энг иқтидорли ва чаққон 3 нафар йигит, 3 нафар қизлар гуруҳлари пазандалик борасида ўзаро баҳслашдилар. Йигитларга бир хил шароит яратилиб, бир хил ўлчамдаги масаллиқлардан палов пишириш, қизларга эса ўзимизнинг ҳудудимизда етиштириладиган сабзавотлардан палов билан бирга истеъмол қилиниши мумкин бўлган турли салатлар тайёрлаш топширилди.

Айтиш мумкинки, қўлларига қўлқоп кийиб, белига фартук тақиб, палов пиширишга, сабзавотлардан турли салатлар тайёрлашга сидқидилдан интилаётган йигит-қизларнинг кўнглидаги иштиёқни кўришнинг ўзи жуда завқли.

Ниҳоят беллашув аъзолари топшириқни адо этишиб, ўз меҳнатлари маҳсули палов ва салатларни саф тортиб, намойиш қилиб турдилар. Ҳакамлар ҳайъати аъзолари уларнинг маҳорат ва дидини, чаққонлигини одилона баҳоладилар.

Беллашувни ташкил этиш ва ўтказишда мактаб директори З.Юсупова, ўринбосари М.Жўлдасова, Хван Наталья, ёшлар етакчиси Қ.Холмуротова, фаол ўқитувчилар Ж.Мадаминов, Н.Камоловалар фидойилик кўрсатдилар.

О.Ражабова.