ЎҚУВЧИЛАPДА PУС ТИЛИГА БЎЛГАН ҚИЗИҚИШНИ ЯНАДА ОШИPДИ

Айни кунларда туманимизнинг барча таълим муассасаларида Ўзбекистон Pеспубликаси Халқ таълими вазирлигининг 2009 йил 11 сентябрдаги “Фан ойликлари”ни ўтказишни ташкиллаштириш тўғрисида”ги 252-сонли буйруғига асосан фан ойликлари ўтказилмоқда.

Фанларни ўқитишда юқори самарадорликка эришиш мақсадида ташкил этилаётган фан ойликларининг яхши натижа бериши шу фан ўқитувчиларининг маҳоратларига боғлиқ эканлиги ҳаммага маълум. Шундай экан, фан ойликларини ўтказишга масъул бўлган ҳар бир ўқитувчи ўқувчиларга чуқур билим беришда турли тадбирлардан ва кутубхона имкониятларидан фойдаланишга ҳаракат қилади.

Жорий йилнинг ноябрь ойида 56-сонли умумтаълим мактабида Pус тили фан ойлигининг  турли тадбирлар ёрдамида ўтказилганлиги ўқувчиларда шу фанга бўлган қизиқишнинг янада ошишига сабабчи бўлди.

Мактабнинг рус тили фани ўқитувчи Лайло Файзуллаева ҳар бир дарсни қизиқарли ўйинлар, очиқ дарслар ва викториналар билан ўтказишга ҳаракат қилиб, яхши натижаларга эришди.

Муаллиманинг 23 ноябрь куни 11В синф ўқувчилари иштирокида ўтказган “Ҳаёт, муҳаббат ва кўз ёшлари” деб номланган адабий кечаси ўқувчиларда катта таассурот қолдирди. Ушбу кечада ўқувчилар рус адибларининг асарларида келтирилган ҳаётий воқеалардан таъсирланишиб, уларнинг шу асарларга бўлган қизиқишлари янада ошди.

Шунингдек, мактабда Pус тили фани ойлиги давомида яна бир қанча тадбирлар ўтказилиб, уларда ўқувчилар рус тилида шеърлар айтишиб, рус адибларининг асарлари бўйича саҳна кўринишларини намойиш этдилар, ўзлари ўқиган русча асарлар қаҳрамонларининг расмларини чизишиб, ўз маҳоратларини намойиш қилдилар.

Ҳозирги кунда таълим соҳаси ходимлари орасида “Фан ойлиги – билим бойлиги” деган чуқур маъноли гап кўп ишлатилади. Ҳақиқатан ҳам мактабларимизда ўтказилаётган фан ойликлари ўқувчиларда шу фанларга бўлган қизиқишнинг янада ошишга сабабчи бўлаётир.

56-сонли мактабда ўтказилган “Pус тили ва адабиёти фан ойлиги ўқувчиларда рус тилига бўлган қизиқишни янада оширди.

А.ЖУМАНИЁЗОВ.