РЕПЕТИТОРГА ЭҲТИЁЖ КАМАЯДИ(МИ?..)
Ўзбекистон Республикаси Халқ таълими Вазирлигининг 2019 йил 28 декабрдаги 405-сонли буйруғига асосан 2019-2020 ўқув йилининг 3-чорагидан бошлаб умумтаълим мактабларининг 10-11-синфларида фанлар ихтиёрий танлов асосида ўқитилмоқда.
Мазкур лойиҳа 2019-2020 ўқиш йили якунига қадар тажриба-синов тариқасида ўтказилиб, агар ижобий натижа берса, келгусида тўлиқ амалиётга жорий этилади. Янги тизим ўқувчиларга мактабнинг ўзида олий ўқув юртига кириш имтиҳонларига тайёрланиши учун имконият яратиб, репетиторга эҳтиёжни камайтиради.
Сир эмаски, ҳозирги кунда туманимизда турли фанлардан репетиторлик курслари ташкил қилинган бўлиб, уларда бир фандан тайёргарлик кўриш учун нархи ойига ҳар ўқувчига ўртача 100-120 минг сўмдан тўғри келмоқда.
Юқоридаги лойиҳа асосида ўқувчилар фанларни ихтиёрий танлов асосида ўқиб-ўргансалар, ўқувчиларнинг ҳам вақти тежалиб, ота-оналар репетиторга сарфлаётган маблағларини бошқа фойдали йўналишларга сарфлаши учун имкон яратилади.
Таъкидлаш жоизки, янгиликнинг жорий қилиниши ихтиёрий бўлиб, мактабда танлов синфини ташкил этишда шу фанлардан юқори малакали, тажрибали ўқитувчиларнинг мавжудлиги инобатга олинади. Танлов-синфи йўналиши 10-11-синфлар кесимида, ўқувчилар ўртасида сўровнома ўтказиш орқали аниқланади. Бунда 1 нафар ўқувчи фақат битта йўналишни танлаши ёки танлов синфлари қуйидаги 5 та йўналишда ташкил этилиши мумкин: хорижий тил, иқтисод, технология, табиий фанлар ва ижтимоий-гуманитар фанлар йўналишлари бўйича ташкил этилади.
Бизнинг 64-сонли умумтаълим мактабимиз ўқувчиларидан олинган сўровнома натижаларига кўра, ижтимоий-гуманитар йўналишида 10-синфдан ҳар бири 25 ўқувчидан иборат битта, 11-синфдан битта, жами 2 та танлов синфи ташкил этилиб, дарс машғулотлари ўтказилмоқда. Дарс машғулотларида нафақат тавсия қилинган дарсликлардан, балки қўшимча манбалардан ҳам фойдаланилмоқда. Мактабдаги компьютер синфи бепул интернет тармоғига уланган бўлиб, танлов синфи ўқувчилари дарсдан кейин Давлат тест марказининг “Онлайн тест” тизими орқали она тили, математика, Ўзбекистон тарихи каби олий ўқув юртига кириш имтиҳонлари учун мажбурий бўлган фанлардан тест саволлари ечиб, тайёргарлик кўришмоқда.
Мазкур янгилик кўпчилик учун айни муддао бўлди. Аммо унинг мактабларда қандай ташкил этилиши ва сифати қай даражада бўлишини олий ҳакам, вақт кўрсатади.
Ойбек ҚУРБОНОВ,
64-сонли мактаб ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
