МАКТАБДА АНИҚ ФАНЛАР УСЛУБ БИРЛАШМАСИ АЪЗОЛАРИ ИШТИРОКИДА ОЧИҚ ДАРС ЎТКАЗИЛДИ
Мамлакатимизда умумтаълим мактабларида таълим-тарбия тизимини халқаро андозалар даражасига кўтариш, юқори синф ўқувчиларини қобилиятларига яраша касб-ҳунарга йўналтириш, мавжуд касблар бўйича ўқувчи-ёшларга кўникмалар бериш мақсадида ўзлари қизиққан касбларни ўзлаштиришлари учун зарур шароитлар яратиб берилаётгани таълим ва тарбияда муҳим аҳамият касб этади.
Маълумки, 11 йиллик мажбурий таълимга ўтилиши муносабати билан халқаро тажрибани ўрганган ҳолда 2017 йилда 10-11-синфлар учун янги ўқув режаси ишлаб чиқилиб, ўқув фанлари оптималлаштирилди ҳамда янги дарсликлар чоп этилди.
Ўқувчиларни касб-ҳунарга ўргатиш тизимининг янгича механизми жорий этилиб, ўқув-ишлаб чиқариш мажмуаларида АКТ соҳасида дастурловчилар, компьютер дизайнери, компьютер созлаш техниги каби касблар бўйича ўқитишни ташкил этиш чоралари кўрилаётгани ўқувчи-ёшларнинг ҳам аниқ фанлар бўйича билимини, ҳам касбий маҳоратини ошириш имконини бермоқда.
Бу каби масалалар туманимиздаги 70-сонли умумтаълим мактабида бўлиб ўтган аниқ фанлар метод бирлашмаси йиғилишида атрофлича кўриб чиқилди ва юқори синф ўқувчиларининг билими ҳамда касбий маҳоратини оширишга қаратилган вазифалар муҳокама этилди. Йиғилишда мактабнинг математика ва информатика фани ўқитувчиси Фарҳод Қодиров “Ўқувчилар билимини халқаро баҳолашнинг PISA тизими” хусусида маъруза қилди. Умумтаълим мактабларининг 10-11-синф ўқувчиларининг нафақат умумтаълим фанларини ўзлаштиришлари, балки ўз қизиқишлари доирасида меҳнат бозори талабларига мос касблар, айниқса, замонавий ахборот технологиялари бўйича дастурловчилар, компьютер усталари, созловчилари, дизайнерлари каби йўналишларни пухта ўзлаштиришлари учун ҳар бир математика ва информатика фани ўқитувчиси масъул эканлигини таъкидлади.
Шундан сўнг, математика фани ўқитувчиси Ислом Каримов ушбу фан ойлиги доирасида 5-синфда “Ўнли касрларни қўшиш ва айириш мавзусини мустаҳкамлаш” мавзусида очиқ дарс ташкил этди. Очиқ дарсда ўқувчиларга математик амалларни пухта ўзлаштириш келажакда ўзлари танлаган касбларда асқотиши атрофлича тушунтирилди. Хусусан, маҳобатли бино ва иншоотлар, темир йўллар, миноралар, дарёлар устига қуриладиган энг узун кўприклар, мўъжизавий осма йўллар, аттракционларнинг меъморий ечимлари, қўйингки, машинасозлик, самолётсозлик соҳаларидаги муҳандислик ишларининг барчасида аниқ ва пухта математик ҳисоб-китоблар борлиги мисоллар орқали кўрсатиб берилди. Ўтилган дарс-машғулоти юзасидан берилган қизиқарли саволлар ҳам математика фанининг кундалик ҳаётдаги ўрни хусусида бўлди. Ўқувчилар бу борада аниқ ва пухта жавоб бериб, дарсда фаоллик кўрсатишди.
Кўргазмали қуроллар воситасида ҳамда инновацион ғоялар асосида ташкиллаштирилган очиқ дарсни ўқувчилар қай даражада ўзлаштирганликлари ўқувчилар билимини баҳолашнинг PISA тизими талабларига мувофиқ синаб кўрилди. Дарс якунида мавзу юзасидан берилган саволларга ўқувчилар тез ва аниқ жавоб бердилар.
Математика фан ойлиги доирасида аниқ фанлар услуб бирлашмаси аъзолари иштирокида бўлиб ўтган мазкур очиқ дарс ўқитувчилар маҳоратини ошириб, ўқувчиларнинг мавзуни пухта ўзлаштиришларини таъминлагани билан муҳим аҳамият касб этди.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
