ЯНГИ БАҲОЛАШ ТИЗИМИ ЎҚУВЧИ ЭГАЛЛАГАН БИЛИМ ВА КЎНИКМАЛАРНИ АНИҚЛАБ БЕРАДИ
Юртимизда жорий этилган карантин қоидалари туфайли таълим тизими ходимлари, педагоглар ўртасида тажриба алмашиш тариқасида ўтказиладиган шўъба йиғилиши бу гал ҳар йилгидан фарқли равишда ўтказилди.
Шўъба йиғилиши – бу янги ўқув йили бошланиши олдидан тизимда фаолият юритаётган педагог-ходимларнинг касбий маҳоратларини янада ошириш, илғор тажрибаларни тарғиб қилиш ҳамда уларга ўқув дастурлари, дарсликлардаги янгиликлар ва ўзгаришларни етказиш, янги ўқув йилида таълим-тарбия сифатини ошириш юзасидан муҳим ва устувор йўналишларни белгилаб олиш мақсадида ўтказилувчи ўқув-семинардир.
2020-2021 ўқув йилида бошланғич синф ўқитувчиларининг Республика Таълим маркази шўъба йиғилиши пандемия шароитида икки хил тарзда ўтказилди. Яъни, Республика ўқув-семинар ZOOM алоқа воситаси орқали онлайн видеоконференция шаклида 12 август куни бўлиб ўтди. Онлайн видеоконференцияда туманимизнинг бошланғич синф ўқитувчилари фаол қатнашишди.
13 август кунидан бошлаб эса “Eurosport” телеканали орқали телемастер класслар шаклида амалга оширилди.
Бу йилги шўъба йиғилиши Республика Таълим маркази маҳоратли методист ўқитувчилари томонидан “Бошланғич таълимда саводхонликни шакллантириш усуллари” мавзусида олиб борилди. Унга кўра, бошланғич синф ўқувчилари ҳафтанинг беш кунида ўқишади ва шанба кунлари ота-онаси билан бўлишади.
Жорий ўқув йилидан бошлаб, 1-2-синфларда янги баҳолаш тизими тажриба-синов тариқасида амалга оширилади. Ўқитувчилар юритиши лозим бўлган ҳужжатлар сони эса 3 тадан 1 тага камайтирилди. Яъни, ўқитувчилар фақат синф журналинигина юритади. Бу эса уларга кўпроқ ўз устида ишлашга, ўқувчилар саводхонлиги билан шуғулланишига имкон яратади. Эндиликда ўқувчилар ҳам қоғоз кундаликдан воз кечишади. Ўқувчиларнинг ҳар кунги кундалик баҳолари қайд этиб бориладиган электрон кундаликлар жорий этилмоқда. Бунда ўқувчиларнинг барча фанлардан олган баҳолари kundalik.com сайтига жойлаштирилади. Kundalik.comнинг афзалликлари шундаки, сайт орқали ота-оналар фарзандларининг ҳақиқий баҳолари билан танишиб борадилар. Уйида, оила даврасида бўлмаган ота-оналар ҳам фарзандларининг билимидан, ўқишидан хабардор бўлиб туришади. Жорий ўқув йилида туманимиздаги 4 та мактаб kundalik.comга, яъни электрон баҳолаш тизимига ўтказилиши режалаштирилмоқда.
Албатта, мазкур тизим амалдаги баҳолашдан мазмун ва ёндашув жиҳатидан тубдан фарқ қилади. Яъни, амалдаги баҳолаш тизими ўқувчининг янги мавзуни қай даражада ўзлаштиргани ва хотирасида сақлаб қолганини баҳоловчи мезонларга асосланса, янгича баҳолашдаги мезонлар ўқувчининг эгаллаган билими натижасида ҳосил бўлган кўникмаларини баҳолайди. Бунда ўқувчининг саводхонлиги, компетенция ва шахсий сифатларига алоҳида эътибор қаратилади. Шу жиҳатдан олиб қарайдиган бўлсак, янгича баҳолаш тизими ўқув жараёнининг энг баланд нуқтасини – ўқитувчининг билимдонлиги ва ўқувчининг ўзлаштириш қобилияти нечоғлик эканлигини белгилайди. Мазкур баҳолаш тизими, таълим соҳасини юқори поғонага кўтариши табиий.
Шерзод Муродов, туман ХТБ бошланғич таълим методисти.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
