«ДУНЁДА ИЛМДАН БОШҚА НАЖОТ ЙЎҚ ВА БЎЛМАГАЙ»

Шарқ донишмандлари айтганидек, “Энг катта бойлик – бу ақл-заковат ва илм, энг катта мерос – бу яхши тарбия, энг катта қашшоқлик – бу билимсизликдир”. Шу сабабли инсон учун замонавий билимларни ўзлаштириш, чинакам маърифат ва юксак маданият эгаси бўлиш, узлуксиз ҳаётий эҳтиёжга айланган. Илм-маърифат энг аввало оилада, кейинчалик мактабда берилади. Шунинг учун ҳам ҳар бир шахс камолотида мактаб алоҳида ўринга эга.

Амударё тумани Халқ таълими бўлимига қарашли 87 та умумтаълим мактабларида янги ўқув йилига тайёргарлик ишлари ўз вақтида қизғин олиб борилди.

Маълумки, туманимизда пандемия шароитини ҳисобга олиб, мактабларда янги ўқув йили гибрид тарзда ташкил этилиши ҳамда мактабларнинг тайёргарлик даражасидан келиб чиқиб, босқичма-босқич очилиши белгиланди. 2020-2021 ўқув йилининг биринчи куни 14 сентябрь этиб белгиланган бўлса-да, мактаблар санитария-гигиена талабларига жавоб беришига қараб, санитария эпидемиология ва осойишталик маркази хулосаларига кўра халқ депутатлари маҳаллий Кенгашларнинг қарори асосида очилиб, анъанавий ўқиш жараёнларини бошламоқда.

Дастлаб, вазиятдан келиб чиқиб, тумандаги хавфсиз, яшил ҳудудлардаги, яъни А.Темур овулида жойлашган 4-сонли мактаб, Қипчоқ ШФЙда жойлашган 11-сонли мактаб, Тор ёп маҳалласида жойлашган 21-сонли мактаб ва Намуна маҳалласида жойлашган 52-сонли мактабда 7 сентябрь кунидан тажриба-синов тариқасида ўқиш жараёни анъанавий тарзда бошланди. Қолган мактабларнинг барчасида 14 сентябрдан 30 сентябргача режа асосида босқичма-босқич ўз фаолиятини анъанавий тарзда бошлаш режалаштирилди.

Шунингдек, Халқ таълими вазирлиги томонидан 2020-2021 ўқув йилининг I чораги учун умумтаълим мактабларининг пандемия шароитларига мослаштирилган намунавий дарс жадвали ишлаб чиқилди. Мазкур дарс жадвали асосида умумтаълим мактабларининг навбатлилиги (сменаси), ўқувчи ўрни, синфлар ва ўқитувчилар сонидан келиб чиқиб, ушбу намунавий жадвалга мослаштирилган ҳолда дарс жадвалини тузиш тавсия этилди. Ўқувчиларнинг соғлигини ҳимоялаш, ижтимоий масофани сақлаган ҳолда ортиқча мулоқот қилишларининг олдини олиш мақсадида жисмоний тарбия, чақириққа қадар бошланғич ҳарбий тайёргарлик,  мусиқа маданияти, тасвирий санъат ва чизмачилик, технология ҳамда тарбия фанлари ўқув йили бошида вақтинчалик ўтилиши тавсия этилмади, ушбу фанлар масофавий таълим шаклидаги телевизион дарслар орқали ўзлаштириб бориладиган бўлди.

Ҳозирги вақтда туманда Халқ таълими соҳасида 4206 нафар олий маълумотли ўқитувчи фаолият олиб бормоқда. Кадрлар билан таъминланганлик 99,9 фоизни ташкил этади. Бугунги кунда ўрта махсус билимга эга кадрларнинг ўрнини олий маълумотли мутахассислар билан тўлдириш ишлари олиб борилмоқда.

Албатта, юртимизда карантин тадбирлари давом этаётганига қарамасдан давлатимиз раҳбари томонидан таълим соҳаси ривожига ҳам алоҳида эътибор қаратилмоқда. Бу эътибор ва ғамхўрлик келажагимиз бўлган ўқувчи-ёшларимизни билимли, ҳар томонлама етук, комил инсон қилиб тарбиялашга хизмат қилади. Шу нуқтаи назардан, қандай шароит бўлса ҳам соҳа ходимлари янги ўқув йилида фидойилик намунасини кўрсатади.

Халқ таълими тизимида мураккаб ва ўзгарувчан шароитда барча ўқитувчи ва мураббийларнинг ёш авлодга билим беришдек масъулиятли ишида куч-ғайрат тилайман. Келажак яратувчилари бўлган болаларимизга таълим-тарбия беришдек шарафли ишларингизда муваффақиятлар ҳамиша ёр бўлсин!

Р.МатқурбОнов, туман Халқ таълими бўлими мудири.