ТАРИХ ФАНИ ОЙЛИГИ ЯКУНИГА БАҒИШЛАБ “ЎЛКАМ ТАРИХИ” МАВЗУСИДА ТАДБИР ЎТКАЗИЛДИ
Умумтаълим мактабларида декабрь – тарих, тарбия ва ҳуқуқ фанлари ойлиги доирасида маънавий-маърифий тадбирлар ўтказилди. Фан ойлиги доирасида барча мактабларда бири-биридан қизиқарли тадбирлар, инновацион дарс-машғулотлари ташкил этилиб, ўқувчиларнинг билимлари оширилди.
Амударё туманидаги 75-сонли мактабда ҳам фан ойлиги доирасида турли тадбирлар ўтказилди. Айниқса, тарих фани бўйича ойлик давомида синфлараро, гуруҳлараро беллашувлар, туманимиз, Қорақалпоғистон ва Ўзбекистон ҳамда қадимги дунё тарихи, шунингдек, Ўзбекистоннинг янги тарихига оид рефератлар, суратли альбомлар тайёрланди. Ўқувчилар томонидан “Ўлкам тарихи” мавзусида кўргазма ташкил этилди. Кўргазмадан жой олган буюк Амир Темур давлатчилиги тарихига оид реферат ва иншолар, тарихий сурат-лавҳалар ўқувчиларнинг Темурийлар салтанати ҳақидаги билимларини янада мустаҳкамлади.
Бир ой давом этган тарих фани ойлиги доирасида ўтказилган очиқ дарслар, семинар-тренингларда мактабнинг тарих фани ўқитувчилари “ўрган-ўргат” тамойили асосида ўзаро тажриба алмашдилар. Ўқувчилар ўртасида Ватанимиз тарихи юзасидан рефератлар танлови, иншолар ва расмлар танловлари ўтказилди, Фан ойлиги якунида барча тадбирлар умумлаштирилди ва “Ўлкам тарихи” мавзусидаги кўргазма орқали ўқувчиларнинг энг сара ишлари намойиш этилди.
Шунингдек, ойлик доирасида ўтказилган синфлараро беллашувларда, гуруҳлараро заковат баҳсларида ҳамда реферат ва иншолар танловларида ўз билимдонликларини намойиш этган ўқувчилар, энг яхши иншо, энг яхши расмлар муаллифларининг номлари алоҳида қайд этилиб, мактаб маъмурияти томонидан фахрий ёрлиқлар билан тақдирландилар.
Фан ойлигининг якунловчи босқичида иштирок этган туман Халқ таълими бўлими услубчилари Одилбек Ҳайтимбетов ва Ўткирбек Матмуродовлар “Ўлкам тарихи” кўргазмасига юқори баҳо бердилар. Шу билан бирга, фан ойлиги доирасида ўқувчилар томонидан тайёрланган рефератлар, она Ватан тарихи, туманимиз ҳамда ўқувчиларнинг ўзлари истиқомат қилаётган маҳаллалар тарихига оид иншолар, мактабнинг ҳаваскор рассомлари чизган тарихий суратларнинг мазмун-моҳияти, ушбу ижодий ишларнинг ёшлар маънавиятини юксалтиришдаги аҳамияти хусусида атрофлича тўхталдилар.
Тарих фани ойлиги якунига бағишланган маънавий-маърифий тадбирда ўқувчи-ёшлар халқимиз севган адиб ва шоирларнинг асарларидан парчалар, бири-биридан таъсирли шеърлар ўқидилар.
“Ўлкам тарихи” мавзусидаги кўргазмали маънавий-маърифий тадбир ўқувчилар қалбида она Юртга муҳаббат, маънавий қадриятларга ва халқимизнинг буюк тарихига ҳурмат туйғуларини янада мустаҳкамлади.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
