ФАН ОЙЛИГИ ДОИРАСИДА ТАДБИРЛАР ЎТКАЗИЛДИ
Туманимиздаги 11-сонли умумтаълим мактабида тарих фани ойлиги доирасида бири-биридан қизиқарли тадбирлар ўтказилди. Айниқса, синфлараро ўтказилган “Сиз тарихни биласизми?”, “Ўлкамиз тарихини ўрганамиз”, “Буюк аждодларимиз билан фахрланамиз”, “Темурийлар салтанати ҳақида нималарни биласиз?”, “Бобурийлар салтанати ва жаҳон” мавзуларидаги суҳбатлар, викториналар, заковат ўйинлари, иншолар ва рефератлар танловлари, мамлакатимиз тарихига оид расмлар танлови ўқувчи-ёшларнинг тарих фанига бўлган қизиқишларини янада оширди.
Янги йил байрами ва ўқув йилининг иккинчи чораги арафасида мактабда фан ойлигининг якуний босқичи ўтказилди. Унда фан ойлиги давомида амалга оширилган маънавий-маърифий тадбирларнинг мазмун-моҳиятини акс эттирувчи кўргазма ташкил этилиб, кўргазмадан ўқувчилар томонидан фан ойлиги давомида ёзилган рефератлар, маърузалар, иншолар ва шу билан биргаликда Она Ватан тарихини, истиқлол йилларида халқимиз эришган ютуқларни акс эттирувчи расмлар жой олди.
Фан ойлиги якунига бағишланган маънавий-маърифий тадбирни маънавий-маърифий ишлар бўйича мактаб директорининг ўринбосари Мунаввар Йўлдошева очди ва барчани ўқув йилининг иккинчи чораги муваффақиятли якунланиши ҳамда ҳаётимизга кириб келаётган янги йил билан табриклади. Шунингдек, фан ойлигининг муваффақиятли ўтказилишида фидойилик кўрсатган тарих фани ўқитувчиларига, шу баробарида, аълочи ва жамоат ишларида фаол ўқувчиларга миннатдорчилик билдирди.
Тадбирнинг бадиий қисмини мактабнинг 7-синф ўқувчилари бошлаб беришди. Улар ўзларининг фан ойлиги доирасида ўтказилган тадбирлардан олган таассуротлари ҳақида қувонч билан сўз юритдилар, тарихий мавзуларда шеърлар ўқиб бердилар. Шу билан бирга “Амир Темур ва Бибихоним” деб номланган саҳна кўринишини маҳорат билан намойиш этдилар. Ўқувчи-ёшлар томонидан тайёрланган саҳна кўриниши орқали ўзбек халқининг буюк тарихига алоҳида урғу берилди. Нафақат Ўрта, Осиё, балки дунё халқларини мўғуллар истилосидан озод этиб, ўзи барпо қилган буюк давлатчилик тизимида адолат ва тинчлик ўрнатган шоҳ ва саркарда, улуғ жаҳонгир бобомиз Амир Темурнинг ўз оиласи, фарзандлари тарбиясига ҳам ўта маъсулият билан ёндашгани, ҳар бир шаҳар ва роботларни бунёд этишдаги тенгсиз маҳорати, Бибихоним иштирокида амалга оширилган бунёдкорлик ишлари хусусида сўз юритишди. Бундай мураккаб саҳна кўринишини ўқувчилар катта маҳорат билан тайёрлашганидан барча мамнун бўлди.
Тадбирда 5-синф ўқувчилари ниҳоятда фаоллик кўрсатишди. Улар она Ватан, киндик қони томган тупроқ, ўзлари улғайган юрт тарихини мадҳ этувчи шеърларни жуда таъсирли қилиб ўқиб бердилар. Миллий-маънавий қадриятларимизни ўзида мужассам этган мумтоз ва замонавий рақслар ижро этишиб, тадбир иштирокчиларига олам-олам завқ бағишладилар.
Тадбир якунида фан ойлиги доирасидаги беллашувлар, тарихий суҳбатлар, заковат баҳслари, реферат ёзиш, иншолар ҳамда расмлар танловида ғолибликни қўлга киритган ўқувчилар мактаб маъмурияти томонидан тақдирланди.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
