19-сонли мактаб ўқувчиси ментал арифметика бўйича Халқаро олимпиадада совриндор бўлди
Бугунги кунда ҳар томонлама етук маънан ва жисмонан ривожланган шахс тарбиялаш, айниқса, ёшларнинг ўз ўрнини топишлари, эгаллаган билимларини келгуси ҳаётга тадбиқ эта олиши учун уларни тўғри йўналтириш ҳар бир ўқитувчининг асосий вазифаларидан биридир. Бу борадаги ишларни замон талаблари даражасига етказиш мақсадида туманимиздаги 19-сонли мактабда турли хил тўгараклар ташкил этилган. Хусусан, спортнинг таэквандо йўналиши, волейбол, баскетбол ҳамда ментал арифметика тўгараклари фаолият юритмоқда, тўгаракларга тажрибали устозлар раҳбарлик қилишади.
Бугунги кунда одамлар орасида ментал арифметика ибораси тез-тез такрорланади. Чунки ментал арифметика – мия иккала ярим шарининг фаол ишлашини таъминлайди, эмоционал стрессни енгиллаштиради, ишчанлик фаолиятини яхшилайди.
Болалар ментал арифметика билан шуғулланса, қандай тафаккур қилишни ўрганадилар, тафаккур қилишни билган бола эса янгилик яратишни севувчи новатор бўлиб етишади. Ментал арифметикани ўрганган ўқувчи аниқ фанларни ўзлаштиришга қийналмайди, диққатини жамлашни ўрганади хотираси кучаяди.
Мактабнинг ментал арифметика тўгараги раҳбари, математика фани ўқитувчиси Зулфия Маткаримованинг бу тўгаракни ташкил қилганига унчалик кўп вақт бўлгани йўқ. Тўгаракка асосан 6 ёшдан 13 ёшгача бўлган ўқувчилар қатнашади. Тўгарак аъзолари шу қисқа вақт ичида абакусда сонларни қўшиш, айириш, кўпайтиришни ўргандилар. Қувонарлиси шундаки, яқинда ментал арифметика бўйича 8-Халқаро олимпиада ўтказилди.
Олимпиадага Қозоғистон Республикасининг Олмаота, Чимкент, Қарағанда, Петропавловск шаҳарларидан, Россиянинг Краснодор, Санкт-Петербург, Москва, Козон, Сочи шаҳарларидан, Украина, Швейцария, Қирғизистон давлатларидан ҳамда Ўзбекистоннинг Тошкент, Самарқанд, Aндижон, Фарғона ҳамда Нукус шаҳарларидан ҳам ёшлар қатнашдилар. Бу олимпиадада 19-мактабнинг 2-а синф ўқувчиси Динора Жабборберганова ва 4-а синф ўқувчиси Мирсаид Жумабоевлар ҳам муваффақиятли иштирок этишди.
Олимпиада онлайн бўлганлиги сабабли натижаларни бироз кутишга тўғри келди. Чунки ҳар бир ўқувчининг мисол ечиши видеога олиниб, ҳакамларга юборилди. Олимпиада талабларига кўра, ҳар бир иштирокчининг мисол ишлаш техникаси тезлиги ҳисобга олинди. 2 кундан сўнг натижалар эълон қилинди.
Ғолиблар орасида ўқувчисининг исмини кўрган устознинг боши осмонга етди. Чунки Динора Жабборберганова 3-ўринни эгаллаган, Мирсаид Жумабоев фаол иштироки учун сертификат билан тақдирланган эди. Динора ва Мирсаиднинг халқаро ментал арифметика олимпиадасида эришган бу ғалабаси 19-сонли мактаб педагогика жамоаси ҳамда уларнинг мактабдошларига чексиз қувонч бағишлади. Шу билан бирга тўгаракка аъзо бўлувчилар сафи янада ошди.
Муяссар ХАЛИЛЛАЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
