МИНИ ФУТБОЛ БЎЙИЧА ЎЗБЕКИСТОН РЕСПУБЛИКАСИ ДХХ ҚОРАҚАЛПОҒИСТОН РЕСПУБЛИКАСИ БЎЙИЧА БОШҚАРМАСИ БОШЛИҒИ КУБОГИ МУСОБАҚАЛАРИ ЎТКАЗИЛДИ

Футбол – миллионлар ўйини, шу билан бирга мазкур спорт тури билан шуғулланувчилар учун оммавий жисмоний чиниқиш воситаси ҳамдир. Шу боис, футбол билан шуғулланувчилар орасида турли ёш тоифасидаги спортчилар, айниқса, ёшлар кўпчиликни ташкил этади. Туманимизда ҳам футбол спорти билан шуғулланувчилар сафи йил сайин ошиб бормоқда. Буни турли саналар муносабати билан ўтказилаётган футбол мусобақаларининг тобора оммавийлашиб бораётганидан ҳам билиш мумкин.

Жорий йилнинг 27-28 май кунлари ёшлар ўртасида ўтказилган мини футбол мусобақаларида туманимиздаги 49 та овул ва маҳалла фуқаролар йиғинларининг барчасидан футболчилар жамоалари фаол иштирок этишди.

Ўзбекистон Республикаси Давлат хавфсизлик хизмати Қорақалпоғистон Республикаси бошқармаси бошлиғи кубоги учун бўлиб ўтган мини футбол мусобақаларида  туманимизнинг 8 та ҳудудида тузилган спортчилар жамоалари ўзаро куч синашдилар.

Туманда спортнинг мини футбол турини ривожлантириш, ушбу спорт тури бўйича кучли спортчиларни аниқлаш, овул ва маҳаллалардаги ёшларни спортга жалб қилиш, уларнинг бўш вақтларини мазмунли ўтказиш, ўсиб келаётган ёш авлодни ватанпарварлик руҳида тарбиялаш, аҳоли ўртасида соғлом турмуш тарзини тарғиб қилиш орқали аҳолининг маданий дам олишини таъминлаш мақсадида ташкил қилинган мусобақанинг 27 май куни ҳудудий босқичи ўтказилди. Унда туманимизнинг 8 та  ҳудуди  бўйича тузилган мини футбол жамоалари қаташдилар.

Мусобақаларнинг шаффофлигини таъминлаш мақсадида туман Жисмоний тарбия ва спорт бўлими томонидан тажрибали ҳакамлар гуруҳи шакллантирилиб. Мусобақалар Халқаро спорт Федерацияси қоидалари асосида олиб борилди ва ҳар бири 15 дақиқадан иборат иккита бўлимда спортчилар тўп  сурдилар.

Қизиқарли таассуротларга бой тарзда ўтган ҳудудий босқичда 49 та  минифутбол жамоалари орасидан энг кучлилари мусобақанинг туман босқичида иштирок этиш ҳуқуқини қўлга киритишди. Унга кўра  1-ҳудудда Бешовул маҳалласи, 2-ҳудуд бўйича Тўлқин овули, 3-ҳудудда Ўрта қалъа овули, 4-ҳудудда Куюк кўпир овуллари, 5-, 6-, 7-, 8-ҳудудлар бўйича Уйшин, Дурунки, Беруний номли ва Бўстон маҳаллалари жамоалари ўзларининг ҳамжиҳатликлари, чиройли ўйин кўрсатганликлари билан мусобақа ҳаками ҳамда томошабинлар олқишларига сазовор бўлишди ва мусобақанинг туман босқичида иштирок этиш ҳуқуқини қўлга киритишди.

28 май куни мазкур мусобақанинг туман босқичи Чордара маҳалласи ҳудудидаги сунъий қопламали мини футбол майдонида ўтказилди. Бирдамлик ва ўзаро ҳурмат, самимият асосида ўтган мусобақаларда биринчи босқичда ғолибликка эришган Бўстон, Беруний номли, Бешовул, Уйшин, Дурунки маҳаллалари ва Тўлқин, Ўрта қалъа, Куюк кўпир овуллари мини футбол жамоалари ўзаро беллашдилар.

Мусобақа якунида Ўзбекистон  Республикаси Давлат хавфсизлик хизмати Қорақалпоғистон Республикаси бошқармаси бошлиғи кубоги мусобақасининг туман бўйича ғолиб ва совриндорлари аниқланди. Унга кўра, 1-ўринни Ўрта қалъа овули, 2-ўринни Дурунки, 3-ўринни Беруний номли маҳалла жамоалари эгалладилар ва Давлат хавфсизлик хизмати томонидан 1-, 2-, 3- даражали Диплом ҳамда қимматбаҳо совғалар билан тақдирландилар ҳамда мазкур мусобақанинг Қорақалпоғистон Республикаси босқичига йўлланма олдилар.

Робия ЙЎЛДОШЕВА.