“Аёллар дафтари”ни янгидан шакллантириш масаласига бағишланган семинар бўлиб ўтди

Мамлакатимизда коронавирус пандемиясининг аҳоли турмуш даражасига салбий таъсирини юмшатиш, аҳолини ижтимоий ҳимоя қилиш ва кўмакка муҳтож оилаларни моддий қўллаб-қувватлашга қаратилган тизимли ишлар амалга оширилмоқда.

Бу йўналишда манзилли, ҳар бир шахс билан индивидуал ва тизимли равишда мунтазам иш олиб боришни ташкил қилиш мақсадида моддий ёрдам ва кўмакка муҳтож оилалар бўйича — “Темир дафтар”, ижтимоий, иқтисодий, ҳуқуқий, психологик қўллаб-қувватлашга, билим ва касб-ҳунар ўрганишга эҳтиёжи ва иштиёқи бўлган хотин-қизлар ва ёшлар бўйича тегишлича “Аёллар дафтари” ва “Ёшлар дафтари” тизимлари ҳаётга татбиқ этилди.

Амударё туманида ижтимоий ҳимояга, ёрдамга муҳтож хотин-қизларни қўллаб-қувватлаш мақсадида тузилган “Аёллар дафтари”га 1832 нафар кўмакка муҳтож хотин-қизлар киритилган эди. Жорий йилнинг 20 май ҳолатига ушбу рўйхатдаги барча ёрдамга эҳтиёжи бор аёллар ижтимоий, иқтисодий, психологик қўллаб-қувватланиб, бандлиги таъминланди ҳамда 1832 нафар ёрдамга муҳтож аёл-қизлар “Аёллар дафтари”дан чиқарилди.

Яқинда туман ҳокимлигининг мажлислар залида ушбу “Аёллар дафтари”ни янгидан шакллантириш масалаларига бағишланган семинар бўлиб ўтди.

Семинарда тумандаги секторлар раҳбарлари, маҳалла фуқаролар йиғинлари масъуллари, муассасалар, корхона-ташкилотлар мутасаддилари, шунингдек, маҳаллаларда хонадонма-хонадон юриш орқали хотин-қизлар муаммолари, эҳтиёжлари ва қизиқишларини ўрганиш бўйича тузилган ишчи гуруҳ аъзолари иштирок этдилар.

Айтиш жоизки, семинарда Ўзбекистон Республикаси Вазирлар Маҳкамасининг “Моддий ёрдам ва кўмакка муҳтож оилаларни, хотин-қизлар ва ёшларни ижтимоий қўллаб-қувватлаш бўйича қўшимча чора-тадбирлар тўғрисида”ги қарори мазмун-моҳияти ҳақида тушунчалар берилди.

Таъкидланганидек, мамлакатимизда аҳоли, шу жумладан, хотин-қизлар ва ёшларнинг ижтимоий ҳимояга муҳтож, турмуш шароити оғир, ишсиз ва касб-ҳунарга эга бўлмаган, ҳуқуқий ва маънавий-психологик қўллаб-қувватлашга зарурати бўлган фуқароларга давлат томонидан манзилли кўмаклашиш бўйича мутлақо янгича тизим жорий қилинди. Бу борада ҳудудларда ташкил қилинган “Аёллар дафтари” асосида ҳар бир ижтимоий ҳимояга муҳтож хотин-қизлар тизимли равишда қўллаб-қувватланди.

Семинарда туман Маҳалла ва оилани қўллаб-қувватлаш бўлими бошлиғининг биринчи ўринбосари Муқаддас Бекназарова хотин-қизлар муаммоларини ўрганиш ҳамда иккинчи “Аёллар дафтари”га киритиладиган хотин-қизлар рўйхатини шакллантириш юзасидан олдинда турган вазифалар хусусида сўз юритди.

1-10 июль кунлари оралиғида маҳаллаларда ташкил этилган ишчи гуруҳлар хонадонма-хонадон юриб, аёл-қизларнинг муаммоларини ўрганишлари лозимлиги, ҳар бир ёрдамга муҳтож хотин-қизлар индивидуал тарзда сўровнома тўлдиришлари кераклиги ҳамда уларни туман штабига тақдим этишлари лозимлиги қайд этилди. Қолаверса, ушбу йўналишдаги ишларни ўз вақтида олиб боришда барча мутасадди раҳбарлар амалий ёрдам беришлари, масъул корхона-ташкилотлар ҳамкорликда иш юритишлари кераклиги таъкидланди.

Шунингдек, учрашувда аҳоли, айниқса, ёшлар ва хотин-қизларнинг ҳаёт ва турмуш шароитидаги муаммоларини аниқлаш, якка тартибда ишлаш орқали уларнинг ҳаёт тарзини яхшилаш ҳамда ижтимоий фаоллигини ошириш, шунингдек, аниқланган муаммоларни комплекс ва манзилли ҳал қилиш борасидаги чора-тадбирлар тизимли равишда давом эттирилиши айтиб ўтилди.

Чарос Арслонова, туман ҳокимлигининг Ахборот хизмати раҳбари.