Назархон овули оқар сув билан таъминланмоқда
Бугунги кунда сув тақчиллиги муаммосини юмшатишда туманимизда қатор ишлар амалга оширилмоқда. Сув етиб бориши қийин бўлган овул ва маҳаллаларда яшовчи аҳоли вакилларининг муаммоларини ҳал қилишда амалий ишлар қилинмоқда. Амударё туманидаги сув етишмовчилигидан азият чекаётган ҳудудлардан бири Назархон овулида яшовчи аҳолининг муаммолари ўрганилиб, уларга тегишли ечим топилди ҳамда ҳал этилди.
Шу мақсадда инсонлар муаммоларига барҳам бериш, ҳудуд аҳолисини ичимлик ҳамда оқар сув билан таъминлаш учун туман ҳокимлиги масъуллари, тумандаги аҳолини ичимлик суви ҳамда қишлоқ хўжалик маҳсулотларини оқар сув билан таъминлашга масъул бўлган корхона-ташкилотлар мутасаддиларидан иборат ишчи гуруҳ шакллантирилди. Ишчи гуруҳ вакиллари Назархон овулига бориб, муаммони келтириб чиқарувчи сабаблар ҳамда унинг оқибатларини ўрганди.
Айтиш керакки, Назархон овули аҳолисини сув билан таъминловчи Хўжа ёп каналига сув манбайи Назархон арна каналидан келиб тушади. Назархон арна канали Мискин ҳамда Чилпиқ насос станциялари орқали сув билан таъминланадиган бўлиб, мазкур станцияларнинг ҳар бирида иккитадан жами 4 та сув насослари мавжуд. Назархон арна каналини сув билан таъминлашда мазкур сув насосларининг барчаси ишга туширилмаганлиги ҳамда каналга тўлиқ қувватда сув берилмаганлиги туфайли Назархон овули аҳолиси ҳамда қишлоқ хўжалиги майдонларига сув етказиб беришда қатор муаммолар келиб чиққан.
Бугунги кунда табиий иқлим шароитининг кескин ўзгариши натижасида нафақат Амударё туманида, балки республиканинг барча туманларида сув тақчиллиги муаммоси кузатилаётганлиги сабабли Мискин ҳамда Чилпиқ насос станцияларидаги сув насосларининг иккитасидан шимолий туманларга сув етказиб бериш мақсадида фойдаланилмоқда.
Назархон овули аҳолисини сув билан таъминлашда келиб чиқаётган муаммоларни бартараф қилиш борасида амалий ишлар қилинмоқда. Хусусан, овул аҳолисига сув етказиб берувчи Хўжа ёп каналини ҳашар йўли билан тозалаш ишлари олиб борилди. Шунингдек, жорий йилда Назархон арна каналида қазиш, таъмирлаш-тиклаш ишлари режалаштирилган бўлиб, уларни амалга ошириш мақсадида иккита экскаватор жалб қилинди ҳамда қазиш ишлари бошлаб юборилди. Экскаваторлар орқали каналдаги тўпланиб қолган лой, чиқиндилар тозаланмоқда.
Олиб борилган шу каби самарали чора-тадбирлар натижасида жорий йилнинг 13 июль санасида Назархон овули аҳолиси сув билан таъминланди. Ҳозирда овулдаги аҳоли томорқалари тўлиқ суғорилди ҳамда учта фермер хўжаликларининг пахта далаларини суғориш ишлари олиб борилмоқда.
Назархон арна каналини таъмирлаш-тиклаш ишлари якунига етказилгач, овул ахолисини сув билан таъминлаш бўйича муаммоларга тўлиқ барҳам берилади.
Туман ҳокимлигининг ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
