ЁНҒИН ХАВФИНИНГ ОЛДИНИ ОЛИШ БЎЙИЧА ПРОФИЛАКТИК ТАДБИРЛАР ЎТКАЗИЛДИ

Ҳозирда республика ҳудудида ҳаво ҳароратининг кескин кўтарилиши натижасида жойларда турли кўринишдаги ёнғин ҳолатлари келиб чиқиши кузатилмоқда. Аҳоли ўртасида ёнғин хавфсизлиги қоидаларига амал қилиниши юзасидан тушунтириш-тарғибот ишлари кучайтирилмоқда.

Ўзбекистон Республикасининг “Ёнғин хавфсизлиги тўғрисида”ги қонунида инсонларнинг ҳаёти ва соғлигини, юридик ва жисмоний шахсларнинг мол-мулкини, атроф табиий муҳитни ёнғинлардан ҳимоя қилиш мақсадида умумий ёнғин хавфсизлиги талаблари белгиланган бўлиб, аҳоли вакилларига ушбу қоидалар кенг турда тушунтирилмоқда.

Амударё туманида ҳам Фавқулодда вазиятлар бўлими томонидан бу борада самарали ишлар йўлга қўйилди.

24 июль куни аҳоли ўртасида ёнғин билан боғлиқ кўнгилсиз ҳодисаларнинг олдини олиш мақсадида туман Фавқулодда вазиятлар бўлими ходимлари томонидан профилактик тадбирлар ташкил қилинди.

Айтиш керакки, ёнғин келиб чиқиш ҳолатлари, айниқса, автомобилларга ёқилғи қуйиш шохобчаларида кўп кузатилмоқда. Бўлим ходимлари туман ҳудудидаги масъулияти чекланган жамият шаклидаги “Манғит савдо” ҳамда “Манғит метан” автомобилларга сиқилган газ қуйиш шохобчаларида ёнғинларнинг олдини олиш бўйича тушунтириш ишлари олиб борилди. Профилактик ишлар давомида шохобчадаги ишчи-ходимларга ёнғин хавфсизлиги қоидаларига риоя қилишлари лозимлиги, мижозларга ҳам доимий равишда шохобча ҳудудида олов чиқарувчи ускуналардан, воситалардан фойдаланмасликлари зарурлиги ва чекиш мумкин эмаслигини тушунтиришлари кераклиги таъкидланди.
Маълумот тариқасида айтиш керакки, ўтказилган профилактик тадбирларга қарамасдан жорий йининг шу даврига қадар туман ҳудудида эҳтиётсизлик, эътиборсизлик натижасида 33 та ёнғин келиб чиқиш ҳолатлари кузатилган. Шундан 5 таси автотранспорт воситаларида, 8 таси аҳоли хонадонларида, 20 та ёнғин ҳолати эса молхоналарда келиб чиққан.
Ёнғин содир бўлиш ҳолати кўрсаткичларини камайтириш мақсадида туман Фавқулодда вазиятлар бўлими тизимли ишларни йўлга қўйди. Тумандаги овул ва маҳаллаларда ҳам ёнғин хавфсизлиги қоидаларига амал қилиниши, ёнғин келиб чиқишининг асосий омиллари, уларнинг аянчли оқибатлари ҳақида аҳолига кенг тарзда тушунтириш-тарғибот ишлари ҳам ўтказиб келинмоқда. Хусусан, тумандаги Чойкўл овулида аҳоли вакиллари билан ўтказилган учрашув ҳам шу мақсадда ташкил қилинди.

Учрашувда масъуллар аҳолига ёнувчи нарса ва суюқликлар оловдан ва иситиш асбобларидан узоқда сақланиши кераклиги, носоз электр асбобларидан фойдаланишда эҳтиёткор бўлиш лозимлиги, бир нечта электр асбоблари вилкаларини бир розеткага бирданига улаш мумкин эмаслиги, гугурт каби олов ҳосил қилувчи моддаларни болалар қўли етмайдиган жойларда сақлаш кераклиги таъкидланди.
Шунингдек, ёнғин содир бўлиб қолса, уйдан тез чиқишга ҳалақит бермаслиги учун зина майдончалари, балкон ортиқча буюмлардан ҳоли бўлиши кераклиги, транспорт воситаларида ҳаракатланганда ёнғин хавфсизлиги қоидаларига амал қилиш зарурлиги, ёнувчан моддаларни олиб юриш таъқиқланиши, енгил алангаланувчан суюқликларни йўловчилар кўп вагонда ташиш жуда хавфли эканлиги, уйда иложи бўлса ихчам ўт ўчиргич ҳамда уй телефони олдида авария хизматлари телефон рақамлари кўрсатилган қўлланма осиғлиқ туриши лозимлиги ҳам тушунтирилди.

Овул аҳолиси бу борада ўзларини қизиқтирган саволлар билан мурожаат қилиб, тўлиқ жавоблар олдилар. Айни кунларда овул ва маҳаллаларда бу каби профилактик тадбирлар мунтазам равишда ўтказиб борилмоқда.

Чарос Арслонова.