ЖОРИЙ ЎҚУВ ЙИЛИНИ ЯНГИ МИЛЛИЙ ЎҚУВ ДАСТУРИ АСОСИДА ТАШКИЛ ЭТИШ БЎЙИЧА СЕМИНАР МАШҒУЛОТЛАРИ ЎТКАЗИЛДИ

Янги ўқув йилига қизғин тайёргарлик кўрилаётган шу кунларда “Барча умумий ўрта таълим мактабларида Миллий ўқув дастурини 1-2-синфларда амалиётга жорий қилиш” мавзусида семинар машғулотлари ташкил этилди. Уч кун давомида бўлиб ўтган семинар машғулотларида туман ҳудудидаги умумтаълим мактабларнинг бошланғич таълим, рус ва хорижий тиллар, амалий ва табиий, филология фанларининг метод бирлашма раҳбарлари ҳамда ёш ижодкор ўқитувчилар иштирок қилишди.

9 август куни 55-сонли умутаълим мактабида бошланган семинарнинг дастлабки машғулотларида туман Халқ таълими бўлими мудири Акмал Исмаилов иштирок этди ва тадбирни кириш сўзи билан очиб берди. Семинарга ташриф буюрган соҳа ходимларини яқинлашиб келаётган Мустақиллигимизнинг 30 йиллик байрами билан қизғин қутлаб, янги ўқув йилида муваффақият тилади. Шунингдек, Янги Миллий ўқув дастурининг афзалликлари, таълим сифатини оширишдаги аҳамияти ҳақида сўз юритди.

Маълумки, Президентимиз хорижий экспертлар ва тажрибали ўқитувчиларни кенг жалб қилган ҳолда, умумий таълимнинг Миллий ўқув дастури лойиҳасини ишлаб чиқиш ва ўтган ўқув йили давомида уни илмий-тадқиқот ва таълим муассасаларида синовдан ўтказиш таклифини билдирган эди. Шунга кўра Ўзбекистон Республикаси Таълим маркази томонидан катта лойиҳа, яъни барча фанлардан Миллий ўқув дастурлари яратилди.

Таъкидланганидек, янги Миллий ўқув дастури мазмуни 50 фоиз назария, 50 фоиз амалиётдан иборат бўлади ва ўқувчининг мустақил фаолиятини қўллаб-қувватлашга қаратилади. Олдинги ўқув дастурларида баҳолаш фақат эслаб қолган билимлар ҳажмини аниқлашга қаратилган. Янги дастур асосида ўқувчиларда шаклланган кўникмалар баҳоланади. Шунингдек, фанлар сони ва ўқув юкламалари оптималлаштирилиб, ўқувчилар қизиқишига кўра фанларни танлаб, ўқиш имконини берувчи вариатив ўқув дастурлар асосида ҳаётга ва касбий фаолиятга тайёрлаш имкони яратилади.

Семинарда Миллий ўқув дастури асосида фанлар чизиқли тартибда эмас, спиралсимон тарзда ўқитилиши, яъни мавзулар такрорий эмас, бир-бирини мантиқан давом эттирувчи ҳамда соддадан мураккабга томон йўналтирилган тарзда киритилиши айтиб ўтилди. Ундан ташқари, ушбу ўқув дастури асосида 1−2-синфлар учун дарсликлар яратилгани тўғрисида маълумот берилди. Дарсликлардаги ўзгаришлар, таълим услублари, сифат даражасини оширишдаги аҳамияти тўғрисида сўз юритилиб, ҳозир амалда бўлган дарсликлар билан янги яратилаётган дарсликларнинг фарқи бўйича педагоглар билан мунозаралар ўтказилди. 

 Шундан сўнг, ўқитувчилар секцияларга бўлинган ҳолда фаолият олиб бордилар. Семинар машғулотларида туман Халқ таълими бўлимининг бошланғич таълим методисти Шерзод Муродов бошланғич синфларда математика фани бўйича машғулотларини ташкил этишда самарали методлардан фойдаланиш бўйича маъруза қилиб, тавсиялар берди. Шунингдек, филология фанидан бўлим методисти Ўткир Матмуродов ва 30-сонли мактабнинг ўзбек тили фани ўқитувчиси Умида Раҳимова, табиий фанлар бўйича методист Отабек Оллаяров, рус тили фани бўйича методист Тамара Кенжаева ҳамда амалий фанлар бўйича методист Каромат Худойбергановалар ҳам машғулотларда тренерлик қилдилар.

Бўлиб ўтган машғулотлар давомида ўқитувчилар Янги Миллий ўқув дастури асосида ўқитиш, дарсларни ташкил этиш бўйича батафсил маълумотларга эга бўлдилар.

О. Худойберганова.