ҲАР ДАРСДА +3

Диалог

– Hello! How are you? Can you speak English?

– Нима деяпсиз? Тушунмадим.

– Привет, как тебя зовут? Ты говоришь по русский?

– А....

Муаммо

Ҳозирги кунда исталган мактаб ўқувчисига шундай саволлар берсангиз, аксариятигина сиз билан мулоқот қила олади. Деярли 90 фоиз 4-5-синф ўқувчилари сизнинг нима деяётганингизни тушунмайди ҳам, айниқса, қишлоқ жойларида... Ҳаттоки, баъзи мактаб битирувчилари рус тилида ўзининг қайси мактабда ўқишини айтолмайди.

Фараз қилайлик, шундай битирувчилардан бири мактабни тугатди. ОТМга ҳам киролмади. Энди ишлашга кетади ёки ёлланиб ишлайди, бу одатий ҳол. Хўш, Россияда ёки Тошкентда ишламоқчи. Қаерда бўлишидан, ким бўлиб ишлашидан қатъий назар, тил билиш бугунги кун талаби ва эҳтиёжи. Аммо бизда юқоридаги ҳолат...

Ким айбдор? Ўқувчими? Ўқувчига ниманидир чин дилдан ўргатсангиз, қабул қилиб олади. Қизиғи шундаки, бу ерда ўқитувчи ҳам айбдор эмас. У ҳам ўзига юклатилган режани бажаради, тамом.

Таклиф

Менинг фикримча, ўқувчи ҳар бир дарсга кирганида ўқитувчисидан кам деганда 2 та ўзи учун янги маълумотни билиб олса, бу ҳаётда, албатта, асқотади.

Ҳурматли устозлар, агарда сиз инглиз ёки рус тилидан дарс берсангиз, биттагина илтимосим бор. Ҳафтада 2 мартадан, йил давомида камида 60 соат дарс ўтасиз. Имкони бўлса, ҳар бир дарсингизда ўқувчиларингизга қийин эмас, соддагина 3 та гап ўргатсангиз, йил давомида синфингиздагилар 180 га яқин гап айта олади. Бу ўқувчингиз учун ва сиз учун қувонарли бўлишига шубҳа йўқ. Тўғри, синфда турфа хил ўқувчилар ўқийди, уларни қизиқтира билиш энди сизнинг маҳоратингизга боғлиқ. Умумтаълим мактабида ўқитувчимиз айтгандилар: ўқитувчи сермазмун дарс ўтиши учун ўзи зерикарли дарсни тинглаб кўриши ҳамда ўқувчиларини зериктирмаслик усулларини ўйлаб топиши керак.

Мана шундай қила олсангиз, сизга бўлган ҳурматим яна ҳам ошар эди. Шунчаки, янги шиор: “Ҳар дарсда +3”.

Оддийгина таклиф, лекин самараси яхши бўлади, деб ўйлайман.

Лайло ОЛИМОВА, ЎзЖОКУ халқаро журналистика факультети талабаси.