ЛОЙИҲА ДОИРАСИДА УЧРАШУВ ТАШКИЛ ЭТИЛДИ

Туманимизда фаолият юритаётган “Жайхун илҳомлари” нодавлат нотижорат ташкилоти томонидан “Ёшлар – янги Ўзбекистон бунёдкорлари” лойиҳаси доирасида жойларда учрашувлар, тадбирлар ўтказилмоқда. Бу учрашувларнинг самарали ва мазмунли, кенг қамровли бўлиши учун турли соҳа вакилларини ҳам лойиҳа режаларини амалга ошириш ишларига жалб қилиш кўзда тутилган. Шу мақсадда бу масаладаги тарғибот ишларини олиб бориш учун ишчи гуруҳга журналистлар, тиббиёт, маориф ходимлари, Маҳалла ва  оилани қўллаб-қувватлаш бўлими мутахассислари ҳам таклиф этилди.

“Оилада фарзанд тарбиясининг аҳамияти, ёшларни зарарли иллатлар ва турли ахлоқсизликлардан ҳимоя қилишда ота-оналар ва маҳалланинг ўрни” мавзусидаги навбатдаги учрашув маҳалла фаоллари, имомлар, маънавият тарғиботчилари, кенг жамоатчилик вакиллари, 13-сонли мактаб ўқитувчилари, фаол ўқувчи ёшлари иштирокида “Боғ” маҳалласида ўтказилди.

Учрашувда Халқ таълими бўлими маънавий-ахлоқий болаларнинг ҳимоя шўъбаси мудири Зафар Абдуллаев ёшларни зарарли иллатлар ва турли ахлоқсизликлардан ҳимоя қилишда мактабнинг ўрни, ўқитувчилар олдида турган маъсул вазифаларга тўхталиб ўтди. Замонавий мактабларда билим олаётган ўқувчилар яратилиб қўйилган имкониятлардан унумли фойдаланиб, куч-ғайратларини фақат чуқур билим олишга қаратиши лозимлигини алоҳида таъкидлади.

“Жайхун илҳомлари” нодавлат нотижорат ташкилотининг раиси Ўрозали Рейимов ташкилотнинг асосий  вазифаси ва мақсади халқимиз маънавиятини юксалтириш, ёш авлодни Ватанга муҳаббат, миллий ва умуминсоний қадриятлар руҳида камол топтиришда бадиий адабиётнинг ўрни, таъсири ва аҳамиятини янада ошириш, адабиёт, мусиқа, бадиий ва амалий санъат равнақига ҳисса қўшиш ҳамда ҳаваскор шоирлар ва ҳаваскор ёзувчилар, ижодкорлар, санъаткорлар, бадиий ва амалий санъат усталарини қўллаб-қувватлаш, уларнинг ижодий салоҳиятларини рўёбга чиқариш орқали жамиятда ижтимоий-маънавий муҳитни янада яхшилашга ҳисса қўшишдан иборат эканлиги ҳақида гапириб ўтди.

Шунингдек, ташкилотнинг грант лойиҳаси асосида олиб бориладиган ишлар, жумладан, жойларда 42 маротаба маънавият таълим-тарбия, саломат турмуш тарзини яхшилашга бағишланган учрашув ва суҳбатлар ўтказиш, турли мавзуларда иншолар танловларини ташкил қилиш ва ғолибларни моддий-маънавий жиҳатдан рағбатлантириб бориш режалари билан учрашув қатнашчиларини таништириб ўтди.

Учрашувда туман Тиббиёт бирлашмаси саломатлик маркази шифокори Матёқуб Эрназаров саломат турмуш тарзини шакллантириш борасидаги ўз фикр-мулоҳазаларини билдириб ўтди. Мутахассиснинг мулоҳазаларига кўра инсон ҳаётда бекам-у кўст яшай олиши учун аввало унга саломатлик керак. Саломатлик эса ўз қўлимизда. Шахсий гигиенага амал қилиш, турли касалликлардан ҳар ким ўзини ҳимоя қила билиши, ёмон иллатлардан тийилиши, озодаликка ҳар қадамда эътибор бериш борасида шифокор йиғилганларга қимматли маслаҳатларини бериб ўтди.

Туман Маҳалла ва оилани қўллаб-қувватлаш бўлими етакчи мутахассиси Раҳмон Бобожонов олдида турган долзарб вазифаларни бажаришда маҳалланинг, айниқса, ҳаёт мактабини ўтаган ёши улуғ инсонларнинг роли жуда катта эканлиги хусусида сўзлади. Бунинг учун жойларда оқсоқоллар кенгаши билан жипсликда иш олиб бориш кераклигини таъкидлаб, камчиликларни бартараф этишда тажрибали инсонлар ўгитларига таяниб иш кўришга чақирди.

“Боғ” маҳалласи фуқаролар йиғини раисаси Мақсуда Раҳимова ёшлар тарбияси, уларнинг маънавиятини юқори даражага кўтариш, турли иллат ва ахлоқсизликлардан сақлаш борасида ҳудудда олиб борилаётган ишлар хусусида учрашув иштирокчиларни таништириб ўтди. У бу борадаги ишларни янада самаралироқ амалга ошириш учун олиб борилиши зарур бўлган вазифаларга алоҳида тўхталди.

Мазкур учрашувда умумтаълим мактабларига янгидан бириктирилган ижодий-маданий масалалар бўйича тарғиботчилар ҳам иштирок этишди. Уларнинг вазифаси мактабларда фақат бадиий тўгаракларни ривожлантириш эмас, балки кенг омма орасида ҳам маънавий-марифий, тарбиявий ишларни олиб боришга қаратилиши лозимлиги таъкидланди.

Учрашув очиқ мулоқот, савол-жавоблар тарзида мазмунли ўтди. Шундай учрашувларни келгуси даврларда барча ҳудудларда ўтказиб боришга келишиб олинди.

Ўрозали Рейимов.