Туманимизда 1 октябрь - “Ўқитувчи ва мураббийлар куни” байрами кенг нишонланди
Дунёда шундай касб эгалари борки, уларсиз ҳаётимизни тасаввур қилиш қийин. Ўқитувчи ва мураббийлар ҳақиқий маънода ҳаётимиз чароғбонларидир. Биз ким бўлмайлик, қайси соҳада фаолият олиб бормайлик, барчамизга устоз ва муаллимлар таълим-тарбия беришган.
Халқимизда "Устоз отангдек улуғ", деган сўз бор. Кимки бу ҳаётда бирор ютуққа эришса, касбидан эъзоз топса, унинг қалбида устозларига, биринчи ўқитувчисига бўлган ҳурмат абадий муҳрланади.
Юртимизда 1 октябрь санасида ушбу шарафли ва машаққатли касб эгалари янада эъзозланиб, “Ўқитувчи ва мураббийлар куни” байрами кенг нишонланади. Жорий йилда ҳам бутун мамлакатимиз бўйлаб ушбу айём тантанали равишда нишонланиб, жойларда байрам тадбирлари кенг турда давом этмоқда.
30 сентябрь куни Амударё тумани Маданият бўлимида устоз ва мураббийларнинг касб байрамларини муносиб нишонлаш мақсадида байрам тадбири ташкил этилди. Байрам тадбирида туманимизда таълим-тарбия тизиминини янада ривожлантиришга ўзларининг муносиб ҳиссаларини қўшиб келаётган, ҳамкасбларига намуна бўлаётган ўқитувчи ва мураббийлар иштирок этдилар. Тадбирда сўзга чиққан туман ҳокими Султонбой Йўлдашев мамлакатимизда сўнгги йилларда таълим-тарбия тизимини янада ривожлантириш, ўқитувчи ва мураббийларнинг жамиятдаги мавқейини янада ошириш борасида тизимли ишлар олиб борилаётганлиги, уларнинг самарали фаолият юритишлари учун барча имкониятлар ҳамда шарт-шароитлар яратилаётганлигини таъкидлаб, устоз ва мураббийларни касб байрамлари билан самимий табриклади.
Таъкидлаш керакки, муҳтарам Президентимиз ўз лавозимига киришган илк кунларданоқ таълим соҳасига катта эътибор қаратди. Мактабгача таълим тизими тубдан ислоҳ қилиниб, соҳада давлат-хусусий шерикчилик тизими йўлга қўйилди, нодавлат мактабгача таълим ташкилотлари фаолияти йўла қўйилди. Мактаб таълими ҳам ислоҳ қилиниб, 11 йиллик таълим тизими билан биргаликда Президент, ижод ва ихтисослашган мактаблар ташкил қилинди. Шунингдек, педагог кадрлар ва халқ таълими ходимларини тайёрлаш ва қайта тайёрлаш, уларнинг малакасини оширишга алоҳида эътибор қаратилмоқда.
Байрам тадбирида туманда узоқ йиллар давомида халқ таълими тизимида фаолият юритиб келган, кўп йиллик тажрибага эга бўлган фахрий устозлардан Розия Қутлимуратова ҳамда ёш бўлишига қарамасдан катта ютуқларга эришаётган ўқитувчилардан Шерзод Ашировлар сўзга чиқиб, ҳамкасбларини байрам билан табрикладилар.
Айтиш керакки, бугунги кунда туманимизда таълим соҳаси тараққиёти йўлида машаққатли меҳнат қилиб, юқори натижаларга эришаётган, ўз касбидан камол топаётган ўқитувчи ва мураббийлар сафи тобора ортиб бормоқда. Байрам тадбирида ана шундай фидойи, жонкуяр, ўз касбига масъулият билан ёндашиб, катта муваффақиятларга эришаётган ўқитувчи ва мураббийларга қатор мукофотлар, туман ҳокимлиги номидан ташаккурнома ҳамда эсдалик совғалари туман ҳокими Султонбой Йўлдашев томонидан тантанали равишда топширилди.
Хусусан, 56-сонли мактабнинг математика фани ўқитувчиси Азимбой Сафарбоев ҳамда 16-сонли мактабнинг инглиз тили фани ўқитувчиси Мавлуда Ниязоваларга Ўзбекистон Республикаси “Халқ таълими аълочиси” кўкрак нишони, 11 нафар ўқитувчи ва мураббийларга Қорақалпоғистон Республикаси “Халқ таълими аълочиси” кўкрак нишони, соҳада самарали фаолият олиб бораётган 20 нафар таълим-тарбия фидойилари ва қатор ўқитувчиларга туман ҳокимининг ташаккурномаси ҳамда эсдалик совғалари топширилди.
Шундан сўнг байрам тадбири туман Маданият бўлими томонидан тайёрланган концерт дастурига уланди. Хонандалар томонидан куйланган ажойиб куй-қўшиқлар байрамга янада кўтаринки руҳ бағишлади.
Туман ҳокимлигининг Ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
