АЙРИМ КАСБ ЭГАЛАРИ МАЖБУРИЙ ТИББИЙ КЎРИКДАН ЎТИШИ ШАРТ

Ўзбекистон Республикаси Соғлиқни сақлаш вазирининг “Мажбурий тиббий қўриқдан ўтмаган ёхуд атрофдагиларга сил касаллигини юқтириш хавфи мавжуд бўлган шахсларнинг бажариши рухсат этилмайдиган ишлар рўйхатини тасдиқлаш тўғрисида” буйруғи қабул қилиниб, Ўзбекистон Республикаси Адлия вазирлиги томонидан шу йил 2 ноябрда рўйхатдан ўтказилди.

Буйруққа кўра мажбурий тиббий кўрикдан ўтмаган ёхуд атрофдагиларга сил касаллигини юқтириш хавфи мавжуд бўлган шахсларнинг бажариши рухсат этилмайдиган ишлар рўйхати тасдиқланди. Мажбурий тиббий кўрикдан ўтмаган ёхуд атрофдагиларга сил касаллигини юқтириш хавфи мавжуд бўлган шахсларнинг бажариши рухсат этилмайдиган ишлар рўйхатига даволаш-профилактика муассасаларида, яъни туғруқхоналар, туғруқ, чақалоқлар патологияси ва чала туғилган чақалоқлар бўлимларида чақалоқлар билан бевосита мулоқотда бўлган ҳолда бажариладиган ишлар киритилди. Бундай ишларни бажарадиган касблар эгалари, яъни акушерка, барча номдаги тиббиёт ҳамширалари, барча мутахассисликдаги врачлар, беморга қараш бўйича кичик тиббиёт ҳамшира, болалар таомлари ва парҳез таомлари ошпази, санитаркалар, буфетчилар мажбурий тиббий кўрикдан ўтиши шарт.

Рўйхатга болаларга хизмат кўрсатиши мумкин бўлган барча даволаш-профилактика муассасалари, шу жумладан болаларга мўлжалланган соғломлаштириш, жисмоний ривожлантириш, сиҳатгоҳ ва реабилитация масканларида, профилакторияларда болалар билан бевосита мулоқотда бўлган ҳолда бажариладиган ишлар ҳам киритилган. Ундан ташқари, мактабгача таълим ташкилотлари ва болалар уйларида болалар билан бевосита мулоқотда бўлган ҳолда бажариладиган ишлар, мактабгача ёшдаги болаларга хизмат кўрсатиши мумкин бўлган таълим ва спорт муассасаларида, шунингдек, ушбу мақсадларда ташкил этилган тўгаракларда болалар билан бевосита мулоқотда бўлган ҳолда бажариладиган ишлар ҳам ушбу рўйхатга олинган.

Мазкур рўйхатда назарда тутилган ишларда ишловчи шахслар, яъни тарбиячилар, барча номдаги тиббиёт ҳамширалари, барча мутахассисликдаги врачлар, беморга қараш бўйича кичик тиббиёт ҳамшира, болалар таомлари ва парҳез таомлари ошпази,буфетчи ва санитаркалар, тўгарак раҳбари, ўқитувчи, логопед, ўқитувчи логопедлар белгиланган муддатларда мажбурий тиббий кўрикдан ўтишлари шарт бўлиб, улар тиббий кўрик натижаларига кўра сил касаллигига чалинмаган деб топилган тақдирдагина, бундай ишларга қўйилади.

М.Матюсупов, туман Адлия бўлими бошлиғи.