“Мактабимиз атрофини яшил масканга айлантирамиз” шиори остида тадбирлар ўтказилмоқда

Юртимизда эълон қилинган “Яшил макон” умуммиллий лойиҳаси доирасида дарахт экиш бўйича “Долзарб 40 кунлик” акцияси юртимизни яшил масканга айлантирамиз шиори остида ҳамжиҳатлик билан амалга оширилмоқда. Акция доирасида халқ таълими муассасаларида ҳам тадбирлар ўтказилмоқда. Жорий йилнинг 13 ноябрь куни 40-сонли умумтаълим мактабида “Мактабимизни яшил масканга айлантирамиз” шиори остида турли хил мевали, манзарали кўчатлар экилди. Шу куни мактаб ҳудудига 2-сектор раҳбари, Aмударё тумани прокурори Ж.Муфтиллаев иштирокида 30 туп арча кўчати ўтқазилди. Умуммиллий лойиҳа доирасида мактаб ҳудудидаги “Ёшлар боғи”га 68 туп арча, 38 туп олма, 67 туп олча, 18 туп гилос, 34 туп нок, 12 туп манзарали дарахтлар экилди. Шунингдек, 1 гектар ер майдонлари шудгор қилиниб, баҳорги экиш ишларига тайёрлаб қўйилди.

Мактабимизда 9-11-синф ўқувчилари орасида “Ўзбекистон - яшил маскан”, “Мактабни яшил масканга айлантирамиз” шиорлари остида иншолар танлови ҳам ўтказилди. Ўқувчи-ёшлар қалбида юксак маънавий фазилатлар, шу жумладан эзгулик ва инсонийлик, меҳрибонлик ва бағрикенглик, Ватани ва халқига садоқат туйғуларини шакллантириш мақсадида ўтказилган иншолар танловида ўқувчилар бири-биридан мазмунли иншолар ёздилар. Танлов ғолиблари маънавий рағбатлантирилди, уларга тинчликнинг ва ҳозирги юртимиздаги шарт-шароитларнинг қадрига этиш ва ундан оқилона фойдаланиш, миллий анъана ва қадриятларимиз замирида Ватанга муҳаббат, ҳурмат ва эҳтиром туйғулари мужассамлиги ҳақида тушунчалар берилди. Ноябрь ойида  “Яшил макон” лойиҳаси доирасида 9-11 синфлар ўртасида “Ўзбекистон - яшил макон” мавзусида ҳам иншолар танлови ўтказилди. Унда 10-синф ўқувчиси Дилноза Бозорбоева ижодий фикрлаш доираси  кенглиги боис, 1-ўринга сазовор бўлди. 2-ўрин 9-синф ўқувчиси Ирода Норбоева, 3-ўрин 11-синф ўқувчиси Гўзалой Турсунбоевага насиб этди.

Халқимизда “Кўчат эк, боғ ярат” деган нақл бор. Чунки экилган кўчатлар униб-ўсиб чиройли манзара ҳосил қилса, кишининг бағри-дилини очиб, кўзларини қувонтиради, бундан ҳам муҳими, ҳавонинг софлигини таъминлайди. Мактаб ҳудудининг яшил маконга айланиши, албатта ўқувчи-ёшларнинг она табиатга меҳр қўйишларида, аждодларимиз сингари улкан боғ-роғлар барпо этишларида, яшилликдан баҳра олиб, илҳомланиб, янги ижод намуналари яратишларида муҳим аҳамиятга эга.

Умида Каримова, 40-сонли мактабнинг ижодий-маданий

масалалар бўйича тарғиботчиси.