СУДЛАР ФАОЛИЯТИ ТАКОМИЛЛАШМОҚДА

Амударё туманида ҳам Жиноят ишлари ҳамда Фуқаролик ишлари бўйича судлар янги ва замонавий кўринишдаги бинода фаолият олиб бормоқда. Барча зарур шароитлар яратилган 2 қаватли суд биносида замонавий техника воситалари имкониятларидан кенг фойдаланишга алоҳида эътибор қаратилган. Судяларнинг ҳар бирига ҳамда ходимлар учун алоҳида хоналар, маслаҳатхона, адвокат ва прокурорлар учун ҳам хоналар ажратилган бўлиб, бунинг натижасида ишдаги самарадорлик ортмоқда.  Бинода видео конференция алоқаси ҳам мавжуд бўлиб, бу қулайлик масофадан туриб суд ишларини олиб боришда қўл келмоқда. Ушбу видеоконференцалоқа тизими суднинг адолат мезонлари асосида фаолият юритишига хизмат қилмоқда.

Жорий йилнинг ўтган 10 ойи давомида Жиноят ишлари бўйича туман судига жами 118 шахсга нисбатан 80 та жиноят иши келиб тушган. Шундан 78 шахсга нисбатан кўриладиган 60 та иш кўриб тамомланган, 13 шахсга нисбатан кўриладиган 10 иш ноябрь ойига қолдирилган. 57 ишга кўра 86 шахсга нисбатан жазо тайинланиб, ҳукм чиқарилган. Шунингдек, ўтган 10 ойи давомида 52 шахсга нисбатан ёшларга оид 30 та жиноят иши кўриб тамомланди. Тарафлар ярашганлиги муносабати билан 24 шахсга нисбатан 23 та иш тугатилди. Сайёр суд мажлисларида 28 та жиноят иши кўрилди.

Ундан ташқари, 1193 нафар шахсга нисбатан 1022 та маъмурий ишлар келиб тушган эди. Шундан 869 ишга кўра 1006 нафар шахсга нисбатан маъмурий жазо қўлланилди. Айримларига нисбатан қўшимча жазо, енгилроқ жазо тайинланган бўлса, айримлари тегишли тартибда тугатилди. Сайёр суд мажлисларида 332 та иш кўрилди.

24 ноябрь куни “Гулзор” маҳалласи фуқаролар йиғини биносида судьялар иштирокида тарғибот тадбири ўтказилди. «Коррупция ривожланишга тўсиқ» мавзусидаги очиқ давра суҳбати тарзида ўтказилган тадбирда Қорақалпоғистон Республикаси Маъмурий суди судьяси Раҳима Худойберганова, Жиноят ишлари бўйича Амударё туман суди раиси Жасур Ўрозбоев, Беруний туманлараро Иқтисодий суди судьяси Байрам Бекмурадов, Амударё тумани прокурори ёрдамчиси Аббаз Ниёзимбетов, Ички ишлар бўлими бошлиғи ўринбосари Мухтор Раҳматуллаев, Юридик хизмат кўрсатиш маркази мутахассиси Мансур Матюсуповлар иштирок этдилар. Тадбирда маҳаллада яшовчи фуқаролар иштирок этдилар.

Суҳбат давомида 9 декабрь – Халқаро коррупцияга қарши курашиш куни деб белгилангани, коррупциянинг давлат жамият ривожига тўсиқлиги, коррупция билан боғлиқ жиноят ишларнинг таҳлили, бу иллатга қарши курашиш учун ҳар бир шахсда иммунитет шакиллантириш лозимлиги хусусида сўз юритилди. Коррупцияга оид ҳуқуқбузарликларнинг тизимли сабаб ва шарт-шароитларини бартараф этиш, коррупцияга қарши курашишнинг устувор ҳуқуқий асослари, ҳуқуқий оқибатлари ҳақида тушунчалар берилди. Ушбу иллатнинг сиёсий-иқтисодий, ижтимоий ва маданий жабҳаларда амалга оширилаётган ислоҳотларга ҳамда жамиятнинг ривожланиш негизига салбий таъсири хусусида алоҳида тўхталиниб, ушбу иллатга ҳар биримиз доимо ҳушёр бўлган ҳолда қарши курашишимиз зарурлиги таъкидланди.

Мамлакатимизда суд-ҳуқуқ соҳасида амалга оширилаётган ислоҳотлар судларни жазоловчи орган эмас, балки инсон ҳуқуқ ва эркинликларини ишончли ҳимоялашга хизмат қиладиган мустақил тизимга айлантиришда муҳим аҳамият касб этмоқда. Бунинг натижасида судлар чинакам маънодаги “Адолат қўрғони”га айланмоқда ва фуқароларнинг мазкур тизимга бўлган ишончи янада ортмоқда.

Ж.Ўрозбоев, Жиноят ишлари бўйича Амударё туман суд раиси.