ҚОРАҚАЛПОҒИСТОН РЕСПУБЛИКАСИ СУДИ СУДЬЯСИ АМУДАРЁ ТУМАНИ СУД-ҲУҚУҚ СОҲАСИ МАСЪУЛЛАРИ ИШТИРОКИДА МАЖЛИС ЎТКАЗДИ

Амударё тумани Давлат хизматлари Маркази биносида “Республика судлари раислари, судьялари ва суд ходимлари иштирокида 2021 йил 27 февраль куни кенгайтирилган тарзда ўтказилган Олий суд Раёсати йиғилишида белгиланган вазифалар юзасидан “Йўл харитаси”нинг ижроси, яъни судловга тааллуқлилик масаласига бағишланган мажлис бўлиб ўтди.

Мажлисда Қорақалпоғистон Республикаси судининг фуқаролик ишлари бўйича судьяси Абдимурат Керимбаев, фуқаролик ишлари бўйича Амударё туман суди раиси Қайрулла Атамуратов, Жиноят ишлари бўйича Амударё туман суди раиси Жасур  Ўразбаев, суд ходимлари ва суд-ҳуқуқ соҳаси мутахассислари, оммавий ахборот вакиллари иштирок этдилар.

Қорақалпоғистон Республикаси судининг фуқаролик ишлари бўйича судьяси Абдимурат Керимбаев раислигида ўтказилган мажлисда Ўзбекистон Республикаси Олий суди раиси томонидан 2021 йил 9 мартда тасдиқланган “Йўл харитаси” ижросини таъминлаш бўйича иштирокчиларга батафсил маълумот берди. Хусусан, мазкур “Йўл харитаси”нинг 112-бандида тааллуқли бўлмаганлиги учун қабул қилиш рад қилинаётган даъво аризаларни, судга мурожаат қилган шахсларни сарсон қилмаслик мақсадида, ушбу даъво аризасини  кўриб чиқиш учун тааллуқли бўлган судга тўғридан-тўғри юбориш чорасини кўриш ва ишларнинг тааллуқлиги масалаларида юзага келаётган ҳолатларни вилоятлар ҳамда Қорақалпоғистон Республикаси миқёсида муҳокама қилиб, ҳал этилишини таъминлаш вазифаси белгиланганлигини айтиб ўтди.

Абдимурат Керимбаев ўз маърузасида  Ўзбекистон Республикаси Маъмурий суд ишларини юритиш тўғрисидаги Кодекснинг 26-моддасига кўра, маъмурий судга фуқаролар ва юридик шахсларнинг бузилган ёки низолашилаётган ҳуқуқлари, эркинликлари ва қонуний манфаатларини ҳимоя қилиш тўғрисидаги, маъмурий ва бошқа оммавий ҳуқуқий муносабатлардан келиб чиқадиган ишлар тааллуқли эканлигини мисоллар орқали тушунтирди.

Шундан сўнг, мажлис иштирокчилари амалиётда судловга тегишлилик масаласида бир қанча тушунмовчиликлар мавжуд эканлиги, шу сабабли судга мурожаат қилган шахсларни сарсон қилмаслик мақсадида тааллуқли бўлмаганлиги учун қабул қилиш рад қилинаётган даъво аризаларни, ушбу даъво аризасини кўриб чиқиш учун тааллуқли бўлган судга тўғридан-тўғри  юбориш амалиётини йўлга қўйиш бўйича ўз фикр-мулоҳазаларини билдирдилар.

Фуқаролик ишлари бўйича Амударё туман суди раиси Қайрулла Атамуратов сўзга чиқиб, тааллуқли бўлмаганлиги  учун қабул қилиш рад қилинаётган даъво аризаларни,  ушбу даъво аризаси кўриб чиқиш учун тааллуқли бўлган судга тўғридан-тўғри юбориш амалиётини йўлга қўйиш мақсадга мувофиқ бўлиши ҳақида амалиётда юзага келаётган муаммоларни келтирган ҳолда ўз фикрларини билдирди.

Мажлис иштирокчилари судга мурожаат қилган шахсларни сарсон қилмаслик мақсадида тааллуқли бўлмаганлиги учун қабул қилиш рад қилинаётган даъво аризаларни, ушбу даъво аризасини кўриб чиқиш учун тааллуқли бўлган судга тўғридан-тўғри юбориш амалиётини йўлга  қўйиш мақсадга мувофиқлиги, ушбу амалиётни қонунчилик билан тартибга солиш лозимлиги ҳақидаги фикрларини билдирдилар.

Мажлис давомида соҳа ходимлари кўрилган масала юзасидан ўзларини қизиқтирган саволлар билан мурожаат қилдилар. Барча саволларга Қорақалпоғистон Республикаси  судининг фуқаролик ишлари бўйича судьяси А.Керимбаев батафсил жавоб берди.

Робия ЙЎЛДОШЕВА.