ЎҚИШНИ ЎРГАНГАН БОЛАЛАР ҚУВОНЧИ
Умумтаълим мактабларида ўқув йилининг иккинчи чорак якуни бири-биридан қувончли воқеаларга бой бўлди. Айниқса, ўқув йилининг иккинчи чорагини муваффақиятли якунлаган ўқувчилар Янги йил томошаларида Қорбобо ва Қорқиз томонидан рағбатлантирилгани уларга янада завқли лаҳзаларни ҳадя этди.
Туман халқ таълими бўлими тасарруфидаги 20-сонли умумтаълим мактабининг 1-синфига мазкур ўқув йилида 25 нафар ўқувчи қабул қилинди. Синф раҳбари Дилдора Жумабоева ўқувчиларни белгиланган дарс-режасига мувофиқ ўқитиш, “Алифбо”ни мукаммал ўзлаштиришлари учун зарур шарт-шароитлар яратиш мақсадида ўқув йили бошиданоқ таълим-тарбия жараёнини узвийлик асосида пухта ташкил этди. Инновацион педагогик технологиялардан самарали фойдаланган ҳолда ҳар бир дарс-машғулотни кўргазмали воситалар асосида намунали тарзда амалга оширди.
Натижада ўқув йилининг иккинчи чораги якунланмасиданоқ ўқувчилар “Алифбо” сабоқларини пухта ўзлаштирдилар. Алифбони ўзлаштириб, ўқиш, ёзишни ўрганган болажонлар эндиликда ўзлари учун қадрли бўлган Она, Ватан каби сўзларни ҳеч қийналмай ўқий олади.
Жорий йилнинг 23 декабрь санасида мактабда “Саводхонлик байрами” ташкил этилиб, унда 1-синфнинг 25 нафар ўқувчиси ўзларининг “Алифбо”дан олган сабоқларини амалда намойиш этишди.
“Саводхонлик байрами”га бағишланган маънавий-маърифий тадбирни мактаб директори Жаҳонгир Матназаров очди ва 1-синф ўқувчилари ва уларнинг ота-оналарини байрам билан самимий табриклади.
Шундан сўнг, фарзандларининг қувончларига шерик бўлиш учун байрам тадбирига ташриф буюрган ўқувчиларнинг ота-оналари ва мактаб ўқитувчиларининг олқишлари остида даврага ўқувчиларнинг “Алифбо” китоби ҳамда она тилимиздаги барча ҳарфларни ифода этувчи кўргазмали чиқишлари намойиш этилди. Болалар альфавит тартибида сафланиб, ҳар бир ҳарфнинг шеърий талқинини ифодалаб бердилар. Бундан ташқари, ўқувчилар ўзлари ёдлаган шеър ва қўшиқларни айтиб беришиб, ота-оналари ҳамда устозларини хурсанд қилдилар.
Тадбир давомида билимдон болаларни табриклаш учун улар даврасига Қорбобо ва Қорқиз совғалари билан кириб келишди. “Алифбо”даги барча ҳарфларни тартиби билан ёддан айтиб берган, табиатдаги фасллар, она табиат неъматлари, она Ватан, дўстлик, тинчлик, ота-она ва меҳр-оқибат мавзуларида шеърлар айтган ўқувчиларга, 1-синфнинг иккинчи чорагини фақат “аъло” баҳоларга якунлаган билимдон болаларга Янги йил совғалари берилди.
“Саводхонлик байрами”да 1-синф ўқувчиларини уларнинг ота-оналари ҳам табриклаб, совғалар тақдим этишди. Даврага кириб келган “Ўқиш китоби ва “Она тили” китобларини қувониб қарши олган ўқувчилар ота-оналари ва устозлари билан рақсга тушдилар.
“Саводхонлик байрами”да иштирок этиш, алифбодаги ҳарфлар билан бошланувчи шеърлар айтиш болажонларга ўзига хос завқ бағишлади. Қолаверса, байрамда ота-оналарининг иштирок этгани болажонларнинг қувончига қувонч қўшди. Ота-оналар ҳам фарзандларининг ютуқларини ўз кўзлари билан кўриб, уларнинг саводхон бўлиб олганиданқалбларида фахр-ифтихор туйғуларини туйдилар. Бу сана болажонлар ва уларнинг ота-оналарининг қалбида бир умр муҳрланиб қолиши табиий.
Рисолат ИБРАГИМОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
