ЯНГИ ЙИЛ МУБОРАК, АЗИЗЛАР!
Азиз юртдошлар! Муҳтарам отахон ва онахонлар, мунис ва меҳрибон опа-сингиллар, қондош ва қариндош ака-укалар!
Халқимизнинг келажаги, ишончи ва таянчи бўлган навқирон ёшлар!
Аввало, барчамизнинг ҳаётимизда янги саҳифа очиб, ҳар биримизнинг қалбимизда янги орзу-ниятлар уйғотиб, она Ватанимизга кириб келаётган Янги – 2022 йил муборак бўлсин. Сиз азизларга юксак эҳтиром ва ҳурмат ила эзгу тилакларимизни изҳор этамиз.
Азизлар, ҳаёт давом этар экан, албатта, синовлар бор, қийинчиликлар бор. Шунинг учун ҳам донишманд халқимиз: “Йил йилга ўхшамайди, ҳар йилнинг ўз сир-синоати бор”, деб бежиз айтмаган. Буни шу кунларда дилдан ҳис этмоқдамиз. Тарих саҳифаларидан жой олаётган 2021 йилда ҳам аввалги йилдаги каби коронавирус деган кўринмас ёв хавф-хатарини бошимиздан кечирдик. Албатта, бу хавф-хатарларни бартараф этиш учун давлатимиз, ҳукуматимиз барча чораларни кўрди, халқимиз бир тан-у бир жон бўлиб жипслашди. Нуроний отахон ва онахонларимизнинг дуолари билан юксак онглилик ҳамда мустаҳкам интизом туфайли бу синовни, иншааллоҳ, енгиб ўтмоқдамиз.
Бутун мамлакатимиз халқи каби амударёликлар ҳам синовлар қаршисида синмай, матонат ва мардлик намуналарини кўрсатаётганлари қалбимизга қувонч ва ғурур бағишлайди. Ниҳоятда мураккаб келган, қурғоқчилик, сув танқислиги, ҳарорат кескин кўтарилиб, жазирама иссиқ ҳаво кузатилган 2021 йилда туман ишлаб чиқаришининг барча соҳаларида муваффақиятларга эришилди. Миришкор деҳқонларимиз – чорвадор-у ғаллакор, пахтакор ва пиллакорлар, соҳибкор-боғбонлар, тадбиркор ва ишбилармонлар эришган ютуқлар солномаси ҳар бир кўнгилга хотиржамлик, эртанги кунга юксак ишонч бағишлайди. Чунки бу ютуқларда халқимизнинг обод ва фаровон ҳаёти намоён.
Юртимизга Янги йил кириб келаётган тарихий лаҳзаларда билимга чанқоқ, интилувчан, дунё ёшлари билан беллашишга қодир амударёлик ёшларнинг қалбларга нур ва сурур бағишловчи эзгу орзулари йўлида дадил олға ташлаётган ҳар бир қадами нафақат Аму элига, балки жонажон Ўзбекистонимиз тараққиётига, келажагига бетакрор қудрат бағишлашига чин дилдан ишонамиз.
Азиз ва қадрли юртдошлар!
Илоҳим, дилимиздаги жамики олижаноб туйғуларимиз, орзу-интилишларимиз рўёбга чиқсин! Халқимиз тинч ва хотиржам, Ватанимиз сарҳадлари дахлсиз, осмонимиз мусаффо бўлсин. Кириб келаётган 2022 йил ҳар бир хонадонга меҳр-оқибат, кўнгилларга хотиржамлик, юртимизга файз-барака, тан-у жонларимизга соғлик бахш этсин!
Янги йил муборак, азизлар!
Янги йил ҳар қалбда Қуёшдай балқсин,
Хавф-у хатарлардан йироқ бўлсин дил.
Эзгу ниятларга пойидор халқим,
Умрингизга порлоқ чироқ бўлсин йил!
"Тараққиёт кўзгуси" газетаси таҳририяти
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
