ВАТАН ОСОЙИШТАЛИГИНИ АСРАШ ЙИГИТЛАРНИНГ БУРЧИ

Ўзбекистон Республикасида фуқароларни ҳарбий хизматга чақириш тегишли тартибда амалга оширилади. Бугунги кунда муддатли ҳарбий хизматга саралаш ва танлаш ишлари Вазирлар Маҳкамасининг 2019 йил 9 апрелдаги “Чақирилувчиларни танлаб олиш тартиби тўғрисидаги низомни тасдиқлаш ҳақида”ги қарори асосида ташкил қилинмоқда. Бу борада шаффофлик ва очиқликни таъминлаш мақсадида чақирилувчиларнинг ота-оналарига ўтказилаётган танлов тадбирларини тўғридан-тўғри кузатиб бориш имконияти яратилди.
Шунга кўра туманимизда ҳам Мудофаа ишлари бўлими томонидан чақирилувчиларни танлаб олиш ва саралаб олиш ишлари 10 августдан 10 февралгача амалга оширилади.
Танловга 18 ёшдан 27 ёшгача бўлган чақирувчилар жалб қилинади. Асосан 2-босқичда ўтадиган танловнинг 1-босқичида улар умумжисмоний тайёргарликлари, яъни турникка тортилиш, 100 метрга югуриш, 3000 метрга югуриш кабилар бўйича синаб кўрилади. Шундан сўнг, 2-босқичда якка тартибдаги суҳбатдан ўтадилар. Якка тартибдаги суҳбат давомида чақирилувчининг маҳалла ва жамиятда тутган ўрни, оилавий аҳволи, обрў-эътибори, юриш-туриши, қизиқишлари, юртимиз тарихи, буюк саркардалар, аждодларимиз ҳаёти ва фаолиятига оид билимлари аниқланади.
Муддатли ҳарбий хизматга саралаш ва танлашни амалга ошириш учун туман Мудофаа ишлари бўлимида бутлаш комиссияси тузилган. Улар саралаш ва танлов ишларида тўлиқ қатнашиб, номзодларни саралаб олишади.
Ўзбекистон Республикаси Конституциясининг 52-моддасида кўрсатилганидек, Ўзбекистон Республикасини ҳимоя қилиш – ҳар бир фуқаронинг бурчидир. Ўзбекистон Республикаси умумий ҳарбий мажбурият ва ҳарбий хизмат тўғрисидаги қонунининг 19-моддасига асосан фуқаролар қонунда белгиланган тартибда ҳарбий ёки муқобил хизматни ўташга мажбурдирлар.
Зеро, Ватанимиз тинчлиги, сарҳадларимиз осойишталигига ҳисса қўшиш, Ватанга хизмат қилиш ҳар бир йигитнинг бурчидир.

Тоҳир БОЛТАЕВ, туман Мудофаа бўлимининг

чақирув бўлинмаси бошлиғи.