Грант лойиҳаси доирасида 43-сонли МТТда мусобақа ўтказилди

Амударё туманининг ижтимоий-сиёсий ва оммабоп газетаси – “Тараққиёт кўзгуси” нашрида аҳолини соғлом турмуш кечиришга рағбатлантириш, соғлом яшаш афзалликларини тарғиб этиш ва саломатлик асоси бўлган жисмоний тарбия ва спорт билан шуғулланишга жалб этишга алоҳида эътибор қаратиб келинмоқда.

Таҳририят Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди таъсис этган грант танловларида бир неча марта ижтимоий аҳамиятга эга лойиҳалари билан қатнашиб, ғолиб бўлиб, лойиҳаларни муваффақиятли амалга ошириб келмоқда. Таҳририятнинг фондга тақдим этган “Соғлом турмуш тарзи – фаровон ҳаёт асоси” номли лойиҳаси навбатдаги грант танловида ғолиб бўлди. 2021 йилнинг декабрь ойидан лойиҳани амалга ошириш бошланди.

Яқинда лойиҳада кўзда тутилган тадбирлардан бири – болажонларни спортга ошно қилиш мақсадида туман жисмоний тарбия ва спорт бўлими билан ҳамкорликда Манғит шаҳаридаги 43-сонли мактабгача таълим ташкилотида тарбияланувчи болажонлар ўртасида “Ким эпчил, ким чаққон” деб номланган “Қувноқ стартлар” мусобақаси ўтказилди.

Мусобақада ушбу ташкилотда тарбияланаётган эпчил, чаққон ва зийрак 8 нафар кичкинтойлардан ташкил топган “Қуёшжон” ва “Камалак” жамоалари ўзаро баҳслашдилар.

Мусобақадан ўрин олган югуриш, шарларни ёриш, баскетбол тўпини тўрга тушириш, илонизи бўлиб юриш ва қопда юриш бўйича беллашувларда кичкинтойлар ўзларининг бор куч-ғайратини ва маҳоратини ишга солишга ҳаракат қилдилар. Ушбу шартларнинг бажарилишини тажрибали тарбиячилар ва туман Мактабгача таълим бўлими ходими Нодира Тожимуродовалар одилона баҳолаб бордилар.

Президентимиз илгари сурган бешта муҳим ташаббуснинг иккинчи йўналиши ижросига қаратилган спорт беллашуви қизғин баҳс ва муросасиз курашлар остида ўтди. Тенгдошларининг, тарбиячи опаларининг қўллаб-қувватлашлари, қарсаклар билан олқишлаб туришлари ҳар иккала жамоа вакилларини ҳам ғолиблик учун астойдил интилишга руҳлантирди.

Мусобақа жараёнида шу жажжи, мурғак болалар қалбида ҳам ҳеч кимдан орқада қолмаслик, кам бўлмасликка астойдил ҳаракат қилиш ҳисси яққол намоён бўлди.

Мусобақа якунида болажонларнинг иштироки шартларни бажаришдаги аниқ ҳаракат қилиши, эпчиллиги, чаққонлиги инобатга олинган ҳолда баҳоланди ва рағбатлантирилди.

“Соғлом турмуш тарзи – фаровон ҳаёт асоси” номли грант лойиҳаси доирасида ўтказилган мусобақа мактабгача таълим ташкилотида тарбияланаётган барча болажонлар қалбида ҳам спорт билан шуғулланишга иштиёқ уйғотди.

Албатта, аҳоли айниқса, ёшлар ўртасида соғлом турмуш тарғиботини бўйича жисмоний фаол бўлишга, болаларни кичкиналигидан спортга ошно қилишга даъват этувчи бунингдек тадбирлар келгусида ўзининг ижобий самараларини беради, соғлом турмуш асоси ҳисобланмиз жисмоний тарбия ва спортнинг оммалашувида муҳим роль ўйнайди.

Ойгул РАЖАБОВА.