ТУМАН ИЧКИ ИШЛАР БЎЛИМИ БОШЛИҒИ СЕКТОР ҲУДУДИДА ЁШЛАР БИЛАН УЧРАШДИ

4 февраль куни Амударё туманининг Куюк-кўпир овул фуқаролар йиғини биносида 3-сектор раҳбари, туман Ички ишлар бўлими бошлиғи Улуғбек Худойберганов, Халқ қабулхонаси туман бўлими мудири Эркин Ражапов ҳамда туманда фаолият юритаётган муассаса, ташкилот вакиллари ва ёшлар иштирокида навбатдаги сайёр қабул ўтказилди.

Бугунги кунда Куюк-кўпир овулида яшовчи аҳолининг 1 минг 417 нафарини ёшлар ташкил қилади. Ўтказилган мазкур учрашувда Улуғбек Худойберганов туман ҳудудида вояга етмаган ва ёшлар томонидан содир этилган жиноятларнинг оқибатлари, жиноятлар содир этилишига имкон берган омиллар хусусида гапириб, вояга етмаган ва ёшлар жиноятчилигига қарши курашиш, бу тоифа шахслар ўртасида ҳуқуқбузарлик ва жиноятларни барвақт олдини олиш борасида маҳалла раисларининг ҳуқуқ-тартибот бўйича ўринбосарлари ва бошқа ҳамкор идоралар масъуллари билан биргаликда профилактик ишларни янада кучайтириш юзасидан ёшларга ўзининг таклиф ҳамда тавсияларини, мутасаддиларга топшириқ ва кўрсатмаларини берди.

Шунингдек, ёшларни маъданият, санъат, жисмоний тарбия ва спортга жалб этиш, маънавиятини юксалтириш бугунги кундаги долзарб вазифа эканлигини, бунда ёшларнинг ташаббуслари ҳар томонлама қўллаб-қувватланиб, уларга барча зарур тавсия ва амалий ёрдамлар берилишини билдириб ўтди.

Очиқ ва самимий тарзда ўтган учрашувда сектор раҳбари ва соҳавий муассаса, ташкилот масъуллари томонидан ёшларни қийнаб келаётган муаммо ва таклифлар тингланди ва атрофлича муҳокама қилинди.

Учрашувда ёшлар томонидан турли масалалардаги мурожаат ва таклифлар келиб тушди. Мурожаатлар асосан бандлик, имтиёзли кредит олиш, тўлов-контрактининг бир қисми тўлаб берилиши, е-auksion тизими орқали ер олиш шартлари каби масалаларда бўлди.

Таклифларда Кyюк-кўпир овули ҳудудида мактабгача таълим муассасаси ташкил этилиши зарурлиги қайд этиб ўтилди. Сектор раҳбари Улуғбек Худойберганов мурожаатлар ва таклифлар юзасидан идора мутасаддиларига аниқ ва манзилли топшириқлар бериб, ижроси алоҳида назоратга олиниши маълум қилди.

Туман Халқ қабулхонаси мудири Эркин Ражапов ёшларни қийнаётган мурожаат ва таклифлар ҳеч қачон жавобсиз қолмаслигини, имкон қадар ижобий ечим топишини айтиб ўтди.

Сектор раҳбари ёшларга оид ҳар қандай муаммо ҳал қилинишида маҳалладаги ёшлар етакчилари ташаббускор ва фаол бўлишлари лозимлигини, улар ўзлари бириктирилган маҳаллалардаги ҳар бир йигит-қизнинг вакили бўлишини таъкидлади.

Бундан ташқари, юртимиздан кўплаб фидоийлар етишиб чиққанлигини эслатиб, уларга муносиб авлод бўлишга барча ёшларни даъват қилди.

 Ёшлар иштирокида ўтказилган мазкур учрашув самимий ва кўтаринки руҳда бўлиб ўтди. Айни кунларда туманимизда сектор раҳбарлари томонидан ўтказилаётган сайёр қабуллар орқали ёшлар ўз муаммо ва таклифларини ҳукумат раҳбарларига ҳеч қандай тўсиқларсиз етказиб ижобий жавоблар олишмоқда.

Бундай сайёр қабуллар орқали ёшларнинг давлат идораларига бўлган ишончи янада ортмоқда ва мустаҳкамланмоқда дейишимиз мумкин.

Туман ҳокимлигининг ахборот хизмати