7-СОНЛИ МАКТАБДА ЎҚУВЧИЛАРНИНГ СИФАТЛИ ТАЪЛИМ ОЛИШЛАРИ УЧУН БАРЧА ШАРОИТЛАР ЯРАТИЛГАН

Мамлакатимизда узлуксиз таълим тизимини ислоҳ қилиш, такомиллаштириш, янги сифат босқичига кўтариш, унга илғор педагогик ахборот технологияларини жорий этиш ҳамда таълим самарадорлигини ошириш давлат сиёсати даражасидаги масалалардан бири ҳисобланади. Чунки, жамиятнинг эртанги куни, келажаги таълим тизимининг қай даражада ривожлангани билан белгиланади.

 Оқ олтин овулидаги 7-сон умумий ўрта таълим мактаби 1999 йилдан буён барча қулайликларга эга бўлган бинода фаолият юритиб келмоқда. Бугунги кунда 422 ўринга мўлжалланган ушбу мактабда 50 нафар педагог ходимлар 410 нафар ўқувчиларга бир сменада таълим-тарбия бериб келмоқда. Мактабдаги 50 нафар педагог ходимларнинг 47 нафари олий маълумотли, 2 нафари тугалланмаган олий маълумотли, 1 нафар ўрта махсус маълумотли ўқитувчилар бўлиб, уларнинг 2 нафари олий тоифали, 12 нафари биринчи тоифали, 15 нафари иккинчи тоифали ва 21 нафари мутахассис ўқитувчилардир.

 Мактабда дарслардан кейин турли тўгарак машғулотларини ўтиш учун барча шарт-шароитлар бор. Барча синфларда ўқитиладиган фанлар бўйича фан тўгараклари ташкил қилинган бўлиб, ўқувчилар қизиқишлари бўйича тўгарак машғулотларига жалб қилинган. Мактабда бешта ташаббус доирасида ҳам спорт, мусиқа, тасвирий санъат, компьютер саводхонлиги, “Чевар қизлар” тўгараклари фаолият кўрсатмоқда. Шунингдек, спортнинг волейбол, баскетбол, футбол, стол тенниси ва шахмат-шашка турларидан тўгараклар ташкил қилинган. Ундан ташқари, овулдаги Деҳқонобод ва Пахтаобод маҳаллаларида яшовчи уюшмаган ёшларга ҳам ҳар куни бўш вақтларида мактаб спорт залида турли спорт машғулотлари билан шуғулланишларига имкониятлар яратилган.

 Мактаб кутубхонасида бугунги кунда 1 минг 101 нусха ва 808 номдаги бадиий, ижтимоий-сиёсий, маънавий-маърифий ва соҳаларга оид, 129 номдаги аудио китоблар мавжуд бўлиб, китобхон ёшларнинг мактаб кутубхонасидан фойдаланишлари учун етарлича адабиётлар ва шароитлар бор. Мактаб кутубхонасида китобсевар ўқувчилар томонидан мактаб ижодий-маданий ишлар тарғиботчиси Адолат Янгибоева ва кутубхоначи Муяссар Атажановалар бошчилигида турли адабий-бадиий кечалар, мушоиралар, “Бир асар мазмуни юзасидан баҳс мунозаралар” каби тадбирлар ўтказиб келинмоқда.

Мактаб кутубхонасидан нафақат ўқувчилар, балки овул аҳолисининг турли ёшдаги аъзолари ҳам фойдаланиб келмоқдалар. Кутубхона фонди кўпайишига мактабни битириб кетган собиқ ўқувчилар ҳам ўз ҳиссаларини қўшишмоқда. Айниқса, мунтазам равишда ўтказилиб келинаётган “Ўзим ўқиган мактабга китоб совға қиламан” тадбирида собиқ ўқувчилар иштирок этиб, мактаб кутубхонасига бадиий адабиётлар совға қилишмоқда. Шунингдек, 3-сектор масъуллари томонидан ҳам 12 номда 42 дона китоб совға қилинди.

Мактабга 2020 йил декабрь ойида 16 дона компьютер техникаси ўрнатилди. Бугунги кунда мактаб локал тармоққа уланган бўлиб, интернетдан фойдаланиш имконияти кенгайди. Компьютер хонасида дарсдан бўш вақтларида ўқитувчиларнинг АКТдан фойдаланиб, турли методик маълумотлар, янгиликларни олишлари учун шароит яратилган. Мактабда ўқувчилар учун ҳам иккита компьютер тўгараги ташкил қилинган. “Компьютер саводхонлиги” фан тўгарагига мактабнинг 5-11 синф ўқувчилари доимий қатнашиб келмоқдалар. Давлатимиз раҳбари ташабуси билан белгиланган “Бир миллион дастурчи” лойиҳаси асосида ташкил қилинган “Ёш дастурчи” тўгараги иштирокчиларидан 82 нафари эса ёш дастурчи сертификатини олишга муваффақ бўлдилар.

Давлатимиз раҳбари таъкидлаганидек, тараққиётнинг тамал тоши ҳам, мамлакатни қудратли, миллатни буюк қиладиган куч ҳам илм-фан, таълим ва тарбиядир. Шу боисдан ҳам 7-сонли мактабнинг ўқитувчи-педагоглари ўқувчиларни юрт келажагига муносиб, билимли, комил инсонлар қилиб тарбиялашга, чуқур билим беришга ҳаракат қилишмоқда.

Ойбек Дурдиев, 7-сонли мактаб директори ўринбосари.